法國
出發前須知
法國係西歐最大嘅國家，所以呢度嘅度假勝地種類亦都多不勝數，有超過 3,000 公里嘅海岸線、3 個主要山脈，仲有 150,000 幾平方公里嘅森林，各式靚景任君選擇。法國歷史悠久而豐富，留低咗好多城堡同邊防城市，帶你時光倒流，返去騎士時代。
法國唔單止歷史同地理出名，連法國菜都一樣聞名於世，每個地區都有自家地道特色，例如鮮味十足嘅馬賽魚湯 (bouillabaisse)、極盡惹味嘅勃艮第紅酒燉雞 (coq au vin)；而法國芝士同葡萄酒更加被視為珍品。法國首都巴黎亦係藝術同高雅時尚嘅集中地！巴黎交通四通八達，感受完大都會嘅高級奢華、精緻魅力，眨下眼就可以去到鄉間，沉醉於質樸無華嘅氣息之中。你可以隨心任揀心水目的地，例如去巴黎過個浪漫週末；去里昂食餐好嘅唞唞氣；去蔚藍海岸 (French Riviera) 嘅海灘遠離繁囂；或者去伊澤爾谷 (Val d’Isère) 滑雪。
法國夜生活推介
巴黎 10 大頂樓餐廳
巴黎嘅頂樓餐廳等緊你，喺「光之城」享受有靚景、有美食嘅晚餐。巴黎同紐約或者曼谷唔一樣，唔係以摩天大廈聞名，而市內大部分建築都唔算高。講係咁講，巴黎嘅魅力在於度度都有歷史長達 2,000 年嘅地標建築。 我哋精選咗橫跨各種預算嘅好選擇。呢啲餐廳唔單止菜式好味，仲可以飽覽巴黎嘅迷人景色。一於將高樓大廈拋諸腦後：嚟到巴黎，行程重點係居高臨下，欣賞古老街道嘅魅力。