巴黎 10 大頂樓餐廳

Le Perchoir 係一間大受歡迎嘅時尚頂樓酒吧兼餐廳，位於拉雪茲神父公墓西北 600 米嘅一棟工業大廈 6 樓同 7 樓。頂樓露台面積寬敞，可以欣賞巴黎全景，就連聖心大教堂都睇到。

Le Perchoir 採用復古工業設計風格，設有頂棚區域同露天區域，價格合理，週末 Party 氣氛熱烈。你可以住喺第 10 區附近嘅酒店，行一陣就嚟到。

Maison Blanche 係香榭麗舍劇院頂樓嘅高級餐廳，佔據 2 層空間，設有 2 個露天露台，分別叫做 George V 同 Montaigne，另外仲有一個玻璃穹頂用餐室。由露台望出去，可以飽覽巴黎鐵塔、榮軍院圓頂同塞納河嘅壯麗景色。Maison Blanche 餐廳嘅菜式一流，週末仲會化身潮流夜店。如果想住得近啲，我哋會推薦第 8 區附近嘅酒店。

Le Georges 係一間現代風格餐廳，設計同樓下嘅現代藝術博物館互相呼應，店內可以俯瞰巴黎全景，包括巴黎鐵塔同聖母院。無論天氣係點，你都可以喺室內以至室外空間睇盡壯觀景色。

置身鼎鼎大名嘅龐畢度中心頂層，不妨喺款式多樣嘅雞尾酒裡面揀杯心頭好，同朋友一齊坐喺溫馨舒適嘅露台上，歎返餐滋味美食，欣賞巴黎日落。現場仲有 DJ 打碟，炒熱氣氛。

Kong 以「大膽、獨特、壯觀」為宗旨，坐落於豪斯曼風格建築嘅 5 樓，玻璃穹頂用餐區可以眺望巴黎市嘅屋頂、新橋同塞納河。

雖然價格偏高，但係呢間亞洲/日式餐廳呈獻嘅大都會體驗獨特：試問仲有邊度可以俾你喺 19 世紀法式建築嘅頂樓食亞洲菜？

Restaurant Toit Terrasse Molitor 頂樓餐廳極具人氣，位於布洛涅森林公園南面、摩利特酒店頂層，俯瞰附近園林、羅蘭·加洛斯網球場同巴黎市中心。如果揀啱位置，仲可以由餐枱上遠眺巴黎鐵塔地標。

菜單涵括各款法式同寰宇美食，包括特色漢堡包等。推薦你點杯特調雞尾酒，配搭靚景，享受更完美。呢間熱門餐廳喺春夏季節好難 book，記得提早訂枱。

Auteuil Brasserie 係一間格調高雅嘅意大利餐廳，坐落於巴黎綠樹成蔭嘅頂樓上，雖然睇唔到城市全景，但露天用餐區充滿綠意，襯埋鄉村風裝飾，氣氛一流。萬一落雨 (或者露台已經滿座)，仲有室內座位開放。

繁忙時段嘅服務可能有少少慢，但優質美食絕對值得等待。餐廳主打高檔菜式，有精心烹調嘅意大利經典佳餚，配搭清新雞尾酒、豐富酒單選擇 (涵蓋法國當地同意大利酒款)，同埋優雅氛圍，美好時光令人回味。

Pedzouille La Grange 係一間優雅嘅法式頂樓餐廳，可以飽覽巴黎天際線 (連巴黎鐵塔都望得到)，設有半室內同露天用餐區，裝潢時尚，綠意盎然，有悠閒嘅慢板音樂飄揚於空氣之中，增添低調而私密嘅氛圍。

店內嘅拿手好菜大多數都係直接喺木炭爐裡面烤製，散發令人垂涎嘅煙燻風味。誠意推薦多汁鮮嫩嘅肋眼牛排，又或者餐廳對 KFC 幽默致敬嘅超好味炸雞。仲有肚食甜品？朱古力慕斯會俾你天堂級嘅享受。

Terrass Rooftop Bar 係蒙馬特區一間高級餐廳，坐落喺巴黎天台酒店頂樓，食客可以坐喺優雅嘅玻璃露台上，飽覽巴黎全景 (記得要求鐵塔景觀座位)。再加上一流服務、頂尖雞尾酒同埋完美無瑕嘅擺盤，舒坦氛圍極致昇華。

雖然店家冇推出單點 Menu，但係精心設計嘅三道菜午市同晚市套餐選擇豐富。瞓醒覺，肚仔餓？任食 Brunch 自助餐有各式甜鹹美食供應，包你滿足。呢度全日人氣爆棚，強烈建議提早訂枱。

Rooftop Café Oz 係一間活力十足嘅澳洲風格餐廳酒吧，坐擁塞納河寧靜景色。雖然呢間全國連鎖店以狂野 Party 聞名，但係食物質素同樣有保證。炭火 Pizza、爆汁大漢堡同新鮮什錦冷盤，配搭河畔靚景享受一流。

如果想靜靜哋食飯，建議早啲嚟到，因為入夜後會有狂歡人潮湧至。玩到凌晨想飲返杯？咁就要做好排長龍嘅心理準備，同埋接受保安嚴密檢查。雖然係有少少麻煩，不過一入到場，包你玩到唔捨得走。

Ilvolo Bar Rooftop 當代酒吧行型格路線，可以近距離欣賞巴黎鐵塔景色，係市內嘅人氣熱點，佔據巴黎諾富特沃日拉爾蒙帕納斯酒店 7 樓。喺法文裡面，「Ilvolo」解作「飛鳥」，所以酒吧外牆採用咗獨特嘅鳥巢設計，以北歐現代風家具配搭冷色調時尚裝潢，營造出雅致氛圍。

除咗環境一流，呢度嘅 Tapas 西班牙小食同頂級雞尾酒同樣出名，調酒大師 Matthias Giroud 精心調製每杯特飲，風味平衡，觀感別具創意。而地中海風味 Tapas 餐單選擇豐富，由炸飯糰到釀翠玉瓜花配布拉塔芝士，款款精緻。