巴黎 5 大食品市場同跳蚤市集

聖圖安跳蚤市場 (Saint-Ouen Flea Market) 又名「Clignancourt 跳蚤市場」，佔地 7 公頃，好多時都被譽為全球規模最大嘅古董市集，人氣超旺，既有賣首飾同傢俬，亦有時裝同各式家用設備，場內嘅二手貨種類超乎你預期，難怪「長開長有」！簡而言之，如果你鍾意講價，聖圖安跳蚤市場就係你夢寐以求嘅購物天堂。不過有一點要留意—呢度地方擠迫，小心提防扒手！

紅孩兒市集 (Le Marché des Enfants Rouges) 嗰名嘅由來，係因為呢度曾經於 16 世紀開設孤兒院，而院內嘅細路都著住紅色衫。呢度係巴黎最古老嘅有蓋市集，極受歡迎，裡面有攤販賣意大利、非洲、黎巴嫩、甚至世界各地嘅菜餚。喺獨一無二嘅歷史背景之下，呢個市集就更富情調喇！

凡夫跳蚤市場 (Porte de Vanves Flea Market) 係名副其實嘅街邊市集，場內大約有 200 個攤位，每逢週末喺 Marc Sangnier 大街同 Georges Lafenestre 大街上架設，各位攤主都唔算 hard sell，為呢個古樸嘅市集添上有如小村莊二手市場嘅輕快氣氛。想搵珍貴古董？呢度真係未必有…不過唔使失望—由復古裝飾以至趣怪珍品，凡夫跳蚤市場都應有盡有，肯定俾你滿載而歸，記住早啲出發，包保買到心水貨！

顧名思義，拉斯派有機市集 (Raspail Organic Market) 主打不含農藥嘅新鮮生果同蔬菜，仲有賣不含添加劑嘅肉同魚架！呢嗰繁忙市集嘅產品質量首屈一指；怕運輸有困難？你仲可以買蜂蜜同樽裝油等等方便攜帶嘅手信。場內嘅小食檔多不勝數，你一定有機會試盡地道小食，享用輕便午餐—其中，呢度嘅英式麵包檔人流極旺，唔係冇原因架，你又點可以錯過？

蒙特勒伊跳蚤市場 (Montreuil Flea Market) 成立於 1860 年，係巴黎最古老嘅跳蚤市集之一，場內商品多不勝數，令人印象深刻，梗係唔止得機械零件、新衫舊衫、古董玻璃器皿同廚房用具啦！如果你識講價，仲可以用超低價搵到奇珍異寶添。之不過，身處市集，記得要提防扒手！