巴黎 14 個 Instagram 打卡勝地

唔使講都知—艾菲爾鐵塔 (Eiffel Tower) 一定係巴黎最多人影相嘅地標，喺唔同角度影都極盡時尚型格，取景勝地包括投卡德候廣場 (Place du Trocadéro)、戰神廣場 (Champs-de-Mars) 同畢哈亙橋 (Pont de Bir-Hakeim) 等等。艾菲爾鐵塔周圍有好多酒店，係房價貴少少啫！

走上凱旋門頂端，由上而下拍攝呢條「世界最美麗大道」，效果一定令人驚艷。黃昏時分，你仲可以試吓企喺路中心嘅安全島上，以凱旋門為背景，「長曝」拍攝車水馬龍嘅盛況，不過要小心唔好俾車撞親喎！

喺聖心大教堂「一石二鳥」立足蒙馬特山丘 (Montmartre Hill) 嘅頂巔，你會飽覽到巴黎最佳全景，同時欣賞呢座城市最受歡迎嘅地標之一！

香榭麗舍大道上嘅 Ladurée、同埋波拿巴特街 (Rue Bonaparte) 上嘅 Pierre Hermé 都係鼎鼎大名嘅餅店，入去品嚐美食之前，梗係要透過櫥窗影吓啲馬卡龍先啦！你同小編一樣減緊肥？唔緊要啦…間唔中放縱自己一日，都 Okay 嘅 (心虛~)…

凡爾賽宮 (Château of Versailles) 嘅鏡廳 (Hall of Mirrors)、花園以至大特里亞農 (Grand Trianon) 都不失為影相「打卡」嘅勝地，記得 Check 清楚相機有冇充足 Memory，先好出發喎！如果你打算喺凡爾賽逗留耐啲，就一定要 Book 宮殿附近嘅酒店喇。巴黎距離凡爾賽宮 1 個鐘車程。

想同蒙娜麗莎自拍？恐怕難啲囉…因為嗰間房一定人頭湧湧！好彩，羅浮宮博物館 (Louvre Museum) 都仲有好多令人印象深刻嘅獨特藝術品，你實會搵到最啱心水嘅據點，可以影啲精彩靚相返屋企。博物館建築物外部嘅玻璃金字塔極具標誌性，都值得喺度自拍「打卡」架！住宿方面，第一區 (1st Arrondissement) 附近都有唔錯嘅選擇。

榮譽庭院 (Cour d'Honneur 或 Honour Courtyard) 嘅圓柱由法國藝術家 Daniel Burens 於 1986 年設計同增設；企喺柱頂影返張相，都咪話唔型！皇家宮殿新古典主義建築同現代圓柱之間嘅反差，令人嘆為觀止。

雖然呢座橋叫做新橋 (Pont Neuf 或 New Bridge)，但其實係巴黎最古老嘅直立橋，歷史可以追溯到 16 世紀，位於城島 (Île de la Cité) 西端，橫跨塞納河 (Seine River)。

老佛爺百貨公司 (Galeries Lafayette) 喺 19 世紀由奧斯曼 (Haussmann) 翻新之後，成為巴黎重生嘅典型標誌！呢間高檔百貨公司於 1912 年落成，採用新藝術風格設計，瑰麗迷人。

卡尼爾歌劇院 (Opéra Garnier) 嘅外觀融合咗巴洛克、古典同文藝復興時期嘅建築風格，零舍上鏡；而佢嘅內部設計同外觀一樣宏偉，梗係要入去影多幾張相啦！

身處 17 世紀盧森堡花園 (Jardin du Luxembourg)，就連空氣都特別清新；而園內有噴泉、雕像、綠樹成蔭嘅長廊、花壇同水池，仲為攝影師提供咗好多創作素材添！想住近公園？第六區 (6th Arrondissement) 附近嘅酒店都係唔錯嘅選擇。

聽落好似好得人驚，但係如果你想影啲標奇立異嘅相，巴黎地下墓穴 (Catacombs of Paris) 嘅背景就最令人興奮雀躍！通往呢個地下藏骨堂嘅主要入口，位於第 14 區 (14th Arrondissement) 嘅亨利羅爾坦古伊上校大道 (Avenue du Colonel Henri Rol-Tanguy)；身處其中，記得要保持肅穆—因為，呢度嘅先人曾經同你、同我一樣，都係活生生嘅人類嚟架。

呢度曾經係尚保羅沙特 (Jean-Paul Sartre) 同阿貝爾卡繆 (Albert Camus) 等法國知名哲學家同知識分子休閒聚會嘅場地，由古至今一如既往咁受歡迎。夜晚想搵個地方傾通宵，仲有邊度夠巴黎經典 Café 露台更加適合？所以，好多人都鍾意喺度影相上 Instagram，「大曬特曬」！

巴黎聖母院壯麗宏偉，就連雨果 (Victor Hugo) 嘅小說《鐘樓駝俠》(同埋迪士尼電影) 都因為呢度而變得動人！