巴黎 14 大 IG 打卡熱點

巴黎市中心嘅艾菲爾鐵塔係呢座城市嘅終極象徵，亦都係夢想打卡熱點。唔使講都知，艾菲爾鐵塔一定係巴黎最多人影相嘅地標，喺唔同角度影都極盡時尚型格。想影張鐵塔經典打卡相，你可以去戰神廣場 (Champs-de-Mars)、投卡德候廣場 (Place du Trocadéro) 同畢哈亙橋 (Pont de Bir-Hakeim) 等等嘅取景勝地。唔好唔記得影埋閃亮夜景相！

但係，艾菲爾鐵塔充滿魅力既原因，不單止因為佢夠宏偉；鐵塔精巧嘅鐵藝同優雅嘅建築風格，相當適合拍攝一流嘅近鏡特寫同抽象照片。無論你係影晨光或者神秘迷霧之中嘅鐵塔，定係夕陽前嘅輪廓，都肯定可以出到超搶眼社交媒體 post。

登上凱旋門最頂，由上而下拍攝人稱「世界最美麗大道」嘅香榭麗舍大道，效果一定令人驚艷。人在高處，自然可以用獨特嘅視野欣賞香榭麗舍大道美景，影到令大家「哇」一聲嘅靚相。

黃昏時分，你仲可以試吓以凱旋門為背景「長曝」拍攝，捕捉往來交通嘅活力。你可以試吓企喺路中心嘅安全島上面影，但嗰度交通好繁忙，記得要安全至上！

經典地標聖心大教堂 (Sacré-Cœur Basilica) 立足於蒙馬特山丘 (Montmartre Hill) 山頂。喺呢度，除咗欣賞呢座城市數一數二最受歡迎嘅地標之外，你仲可以飽覽到巴黎最佳全景！

宏偉嘅大教堂同一覽無遺嘅城市景觀相結合，呢度絕對係遊客畢生難忘嘅影相勝地。無論係建築嘅複雜細節，定係金色夕陽下嘅城市天際線，呢趟聖心大教堂之旅一定會令你嘅旅行相更添巴黎魅力。

巴黎餅店放滿色彩繽紛嘅馬卡龍，唔單止睇落賞心悅目，而且亦都係打卡好去處。香榭麗舍大道嘅 Ladurée 同波拿巴街 (Rue Bonaparte) 嘅 Pierre Hermé 都係名店，店內擺設咗優雅嘅馬卡龍，絕對係影相好去處。

馬卡龍色彩鮮豔，陳列精緻，幾乎算係經典巴黎風情，令人著迷。縱情享受美味馬卡龍可以話係指定動作。所以相機食完之後，唔好唔記得盡情品嚐！

參觀凡爾賽宮，肯定會令你影相影到冇停手。由鏡廳 (Hall of Mirrors)、廣闊嘅花園以至大特里亞農 (Grand Trianon) 都充滿皇家氣派，華麗非凡。出發前記得睇清楚相機夠唔夠位！

如果你打算喺凡爾賽逗留耐啲，就記得預訂宮殿附近嘅酒店啦。巴黎距離呢度只係一個鐘車程，可以順手去埋，影更多靚相！

羅浮宮係巴黎藝術遺產嘅縮影。一齊入去參觀，捕捉館內嘅精緻美感啦。既然嚟到呢座宏偉嘅博物館，當然唔好淨係去經典神秘畫作蒙娜麗莎度同人逼同埋同幅畫自拍合照啦。呢度嘅展廳仲陳列咗多姿多采嘅藝術品，值得逐一用鏡頭細味。每件傑作都肯定能夠影到值得擺上 Instagram 嘅靚相，反映你嘅藝術品味。

羅浮宮唔止室內靚，室外仲有佢嘅經典地標玻璃金字塔，蔚為奇觀。你嘅巴黎之旅相簿又點少得呢個景？如果你要搵住宿，可以睇下第一區 (1st Arrondissement) 附近嘅選擇。

一齊參觀巴黎打卡勝地之中嘅勝地：皇宮，享受一場視覺之旅！榮譽庭院 (Cour d'Honneur 或 Honour Courtyard) 入面有好多圓柱，係由法國藝術家 Daniel Burens 於 1986 年製作；不妨企喺柱頂影返張入型入格嘅相啦！現代化圓柱同皇宮嘅新古典主義建築之間反差強烈，用嚟做影相背景一流。

呢個標誌性地點將歷史同當代藝術融為一體，錯過就走寶。一張相有齊截然不同嘅新舊風格，肯定會令你個 post 更加搶眼。

雖然呢座橋叫做新橋 (Pont Neuf 或 New Bridge)，但其實係巴黎最古老嘅直立橋，真係估佢唔到！呢條宏偉嘅橋歷史可以追溯到 16 世紀。佢位於城島 (Île de la Cité) 西端，橫跨塞納河。

新橋充滿永恆不朽嘅魅力，加上塞納河不斷變化嘅倒影，呢度絕對係影相絕佳好去處。歷史魅力同自然美景完美結合，肯定會吸引到你啲觀眾。

老佛爺百貨公司位於巴黎市中心，係巴黎喺 19 世紀重生嘅見證。呢間高檔百貨公司喺 1912 年落成，唔止係零售天堂，仲係體現新藝術風格嘅建築奇觀，一個幾世紀以嚟一直係巴黎典雅嘅象徵。

行入老佛爺百貨嗰一刻，你就會即刻俾精緻嘅設計同搶眼嘅玻璃圓頂所吸引；圓頂為成間店帶嚟溫暖嘅自然光。呢座宏偉建築每個角落都係完美嘅影相位，係一眾時尚達人同攝影師嘅必遊聖地。

卡尼爾歌劇院 (Palais Garnier Opéra) 位於巴黎市中心，建築融合咗巴洛克、古典同文藝復興時期嘅風格，外觀格外宏偉，鐘意影相嘅話，路過梗係要影多幾張相啦！

不過，唔好淨係影外面。入到入面，你會發現內部設計同外觀一樣咁宏偉。極盡奢麗嘅設計同埋精巧嘅細節，用嚟影相做背景一流。卡尼爾歌劇院係展現巴黎歷久常新優雅演出嘅舞台，帶俾大家一場視覺饗宴，想打卡更加絕對唔可以錯過！

盧森堡花園 (Jardin du Luxembourg) 係巴黎市中心寧靜嘅綠色空間，俾遊人盡情投入 17 世紀嘅優雅氣氛，令身心感覺煥然一新。園內有綠樹成蔭嘅長廊、雕塑、噴泉，為你提供多姿多采嘅攝影素材！

盧森堡花園嘅每條小徑都各有不同嘅景色，從生氣勃勃嘅花壇到寧靜嘅水池都有。不妨用鏡頭捕捉綠蔭下雕塑嘅光影變化，將自己所身處呢一幅活生生嘅藝術品影低，同全世界分享啦！酒店方面，第六區 (6th Arrondissement) 附近有啲唔錯嘅選擇。

巴黎人來人往嘅街道地底隱藏咗個令人意想不到嘅寶藏：地下墓穴。聽落好似好得人驚，但係如果你想影啲標奇立異嘅相，用呢個地下墓穴做背景，應該可以影到獨一無二嘅刺激相片。唔想去巴黎普通地標嘅話，呢度肯定會俾到你一次有趣嘅旅程。

深入地下墓穴探險，你會發現自己入咗去個充滿神秘嘅世界。每個頭骨同骨頭都講述緊某人生前嘅故事，令你啲相更有深度。雖然地下墓穴唔係傳統旅遊景點，但就提供咗一流機會俾你捕捉巴黎隱藏嘅一面。不過記住，佢地曾經同你、同我一樣，都係活生生嘅人。所以影還影，記得保持肅穆尊重。

不妨坐喺經典嘅 Café 露台，俾自己盡情感受經典巴黎風情啦！呢啲迷人嘅地方係好多法國知名哲學家同知識分子休閒聚會嘅場地，例如尚保羅沙特 (Jean-Paul Sartre) 同阿貝爾卡繆 (Albert Camus) 都會去，由古至今一如既往咁受歡迎，宜家仍然係傾計、靜思同打卡曬命勝地。

想搵個地方討論人生哲理，或者影幾張相打下卡，巴黎經典 Café 露台都係不二之選。每個 Café 露台都係巴黎生活嘅一部分，係巴黎歷久常新既景象。不妨加入其中，再同大家分享啦！

巴黎聖母院矗立喺巴黎市中心，非常宏偉，係呢座城市輝煌歷史同建築嘅活生生見證。2019 年大火之後，聖母院宜家修復緊，逐漸回復昔日嘅輝煌。雖然係咁，但係呢度仍然係非常吸引嘅影相背景。雨果 (Victor Hugo) 嘅小說 (同埋迪士尼電影)《鐘樓駝俠》入面就提及到呢座不朽傳奇。

呢座歷久常新嘅建築傑作超越咗宗教象徵意義，喺巴黎文化嘅標誌，打卡愛好者更加不容錯過。不妨仔細睇下四周圍嘅歷史相片，等大家可以加入無數被巴黎嘅美麗感動到嘅人，用佢地嘅角度去欣賞巴黎。不過四處參觀之餘，記得留心唔好影響到嗰度嘅重建工作。