巴黎 10 大浪漫活動

聖馬丁運河 (Canal Saint-Martin) 露出地面嘅部分喺聖殿郊區街 (Rue du Faubourg du Temple) 同拉法葉路 (Rue Lafayette) 之間綿延接近 2 公里，係巴黎地標之一。運河兩側分別係瓦爾米碼頭 (Quai de Valmy) 同占萬碼頭 (Quai de Jemmapes)，上面嘅行人路種滿栗子樹，又潮又可愛，喺度散步真係浪漫到暈啊！呢區除咗雅致古樸，仲有典型嘅法國 Café 同餐廳，處處洋溢巴黎嘅招牌 Romatic 氣氛。

喺巴黎度假，有乜嘢及得上兩個人一齊做 Spa 咁爽、咁開心？巴黎比較高質嘅 Spa 都要去高檔酒店先嘆到，而最出名嘅情侶 Spa，首推巴黎喬治五世四季酒店 (Four Season George V) 嘅 Pop Up Spa 出品！另一間誠意推介係 Spa Valmont at Le Meurice，同樣服務一流；最後，Spa Le Bristol by La Prairie 亦係信心保證，佢哋提供嘅 Treatment 兩個字講晒：幸福。

浪漫生活博物館 (Musée de la Vie Romantique) 位於蒙馬特山丘 (Montmartre Hill) 山腳嘅 19 世紀大宅裡面，館內一樓專門介紹喬治桑 (George Sand) 嘅愛情生活，透過用品、情信同繪畫，呈現佢同蕭邦 (Chopin) 之間嘅感情交流；二樓展示嘅繪畫、雕塑同稀有珍品就描繪愛情同浪漫主義。呢間博物館唔止別具一格，仲設有 Café 同花園仔，環境寧靜，夠哂 Relaxing！

第一次喺戲院約會嘅經歷，相信冇人會忘記—熄晒燈之後緊張到騰騰震，同鍾意嘅人喺漆黑之中共處，旁若無人，諗起都覺得 Sweet！想重拾呢啲甜蜜感覺嘅話，就要去 Grand Action 戲院睇返場經典電影喇！呢間獨立戲院位於巴黎市中心，由巴黎聖母院 (Notre-Dame Cathedral) 向南行幾步就到；院內保留咗迷人嘅復古裝飾同氣氛，經典好戲原汁原味放映，同現代戲院都好大分別架！

比特紹蒙公園 (Parc des Buttes-Chaumont) 係浪漫散步嘅理想地點，佢位於巴黎東北部，早喺 19 世紀末建成，園內嘅人工湖中心上面有個小島，島頂嘅女巫神廟 (Temple de la Sibylle) 做觀景台就啱哂，亦令公園廣受愛侶歡迎。比特紹蒙公園都算係隱世秘境，又欣賞到城市靚景，得閒嚟散吓步，感受寧靜，不知幾舒服！另外，通往小島嘅吊橋附近有間好唔錯嘅餐廳，配置戶外露台，浪漫到暈。

巴黎嘅玻璃拱頂購物廊古樸雅致，飾有美輪美奐嘅馬賽克瓷磚，係實實在在嘅建築奇觀！行入裡面，就好似返到 18、19 世紀咁。其中，最靚嘅推介有銀行街 (Rue de la Banque) 嘅薇薇安拱廊 (Galerie Vivienne)、聖迪尼斯街 (Rue Saint-Denis) 嘅巨鹿廊街 (Passage du Grand-Cerf)，同埋聖馬可街 (Rue Saint-Marc) 嘅全景拱廊 (Passage des Panoramas)，廊內開滿各種各樣嘅精品小店、古雅 Café 同餐廳，簡直係「光之城」嘅隱世瑰寶啊！

巴黎聖心大教堂 (Basilica of the Sacred Heart of Paris) 屹立喺蒙馬特山丘 (Montmartre Hill) 頂峰，俯瞰巴黎市，係巴黎最具標誌性嘅名勝之一。講到睇盡「光之城」日落靚景嘅最佳地點，就梗係大教堂正前方嘅廣場啦！廣場附近仲有好多潮爆 Café 同餐廳，睇完日落之後，是但揀返間食飯飲嘢，何其寫意。蒙馬特 (Montmartre) 係古樸嘅社區，具有濃厚嘅波希米亞藝術氣息，啱哂文青！

塞納河 (Seine River) 兩岸古樸寧靜，黃昏喺度散步，簡直浪漫到不得了！呢條海濱大道最正嗰段，喺正塞納河左岸新橋 (Pont Neuf) 同蘇利橋 (Pont de Sully) 之間，沿途會經過阿拉伯世界研究所 (Arab World Institute)、巴黎聖母院 (Notre-Dame Cathedral) 同好多歷史建築。而艾菲爾鐵塔 (Eiffel Tower) 同協和橋 (Pont de la Concorde) 中間都仲有唔少地標同靚景，亦係幾好行嘅路線嚟架！揀邊條路線都好，身處巴黎雋永不古嘅環境下，每分每刻都精彩無比。

喺艾菲爾鐵塔 (Eiffel Tower) 上面嘅一流餐廳 Le Jules Verne 食餐飯，好可能會係你巴黎之旅嘅高潮！不妨要求侍應俾張靠窗嘅枱你，咁就可以一邊品嚐精緻好味嘅法國菜同葡萄酒，一邊欣賞巴黎嘅動人夜景啦。Le Jules Verne 服務一流，環境舒適，菜式可口，景觀壯麗，喺度食個燭光晚餐，肯定永誌難忘！之不過，店家整體質素咁高，價格當然有返咁上下，仲要記住提前 Book 位喎。

嚟到最後一站，不如搵間極盡時尚嘅頂樓酒吧，好好欣賞巴黎都會同艾菲爾鐵塔 (Eiffel Tower) 嘅壯麗景色，為旅程劃上圓滿句號吖？位於蒙馬特山丘 (Montmartre Hill) 山腳嘅巴黎特拉斯酒店 (Terrass Hotel Paris) 全景露台人氣超旺，你可以喺度飲返杯葡萄酒、烈酒，又或者試吓店家特調嘅 Cocktail，都好唔錯架！冬天坐露台怕凍？唔使驚，酒店貼心提供暖氣同毛毯，實行打造全天候旅遊勝景，一年四季同樣優越。