情侶必試巴黎 10 大活動

聖馬丁運河係巴黎地標景點之一，露天部分全長近 2 公里，由 Rue du Faubourg du Temple 延伸至 Rue Lafayette，兩岸種滿栗子樹，深受巴黎情侶歡迎，係甜蜜散步嘅好去處。沿住瓦爾米碼頭同傑瑪佩斯碼頭行。

仲可以幫襯地道法式 Café 同餐廳，感受巴黎獨有嘅浪漫氛圍。推薦黃昏或傍晚時段嚟探索，由附近食肆買啲地道美食，喺運河邊野餐，又或者優悠漫步，欣賞日落時分嘅迷人景致。

同摯愛去巴黎度假，有乜嘢比享受雙人 SPA 更浪漫？巴黎嘅頂級酒店都有提供優質 SPA 體驗，例如喬治五世四季酒店嘅 Pop Up Spa、莫里斯酒店嘅 Spa Valmont，同埋勒布里斯托酒店嘅 Spa La Prairie，有齊專業療程，俾你同另一半極致 Relax。

浪漫生活博物館係坐落於蒙馬特山腳嘅 19 世紀大宅，一樓展出作家 George Sand 同音樂家蕭邦嘅情書、畫作等愛情信物，二樓就陳列以浪漫主義為主題嘅畫作、雕塑同藝術品。博物館本身固然充滿趣味，裡面仲設有 Café 同精緻花園，行到攰可以喺寧靜環境下歎杯咖啡，文青情侶千祈咪錯過。

嚟到 Grand Action Cinema，影迷可以玩盡全年無間嘅電影會、放映會、座談會同活動。每個人都記得喺戲院第一次約會嘅情景：熄燈時嘅興奮顫抖，同愛人沉浸於黑暗中嘅心動緊張… 而家，去 Grand Action Cinema 睇返場經典電影，就可以重溫呢份甜蜜。呢間獨立戲院位於巴黎市中心，由巴黎聖母院向南行幾步就到。

同現代化嘅多影廳戲院有好大分別，除咗保留迷人嘅復古裝潢同氛圍，仲會放映原版經典電影。

肖蒙山丘公園啱哂浪漫散步，佢建於 19 世紀末，位處巴黎東北部，以坐落喺人工湖中心島嶼頂端嘅西比爾神殿觀景點聞名。

公園隱世而寧靜，你可以飽覽城市優美景觀，係漫步途中停低抖抖嘅好地方。喺通往島嶼嘅吊橋附近，仲有一間設置露天茶座嘅雅致餐廳 Le Pavillon Du Lac，俾你補充體力。

行入巴黎 18 至 19 世紀建成嘅玻璃穹頂購物廊，你可以穿越時空，回到過去。呢啲拱廊以華麗嘅馬賽克磚聞名，係真正嘅建築奇蹟。

要數其中最靚嘅推介，就包括 Rue de la Banque 嘅 Galerie Vivienne、Rue Saint-Denis 嘅 Passage du Grand-Cerf，同埋 Rue Saint-Marc 嘅 Passage des Panoramas，裡面有各式各樣嘅小店、別致 Café 同餐廳，係「光之城」嘅隱藏寶藏。

蒙馬特山嘅日落，將迷人街道同聖心大教堂地標沐浴喺溫暖嘅金色光芒之中，營造出如詩如畫嘅浪漫氛圍，完美捕捉巴黎舊社區嘅情懷。大教堂正前面嘅廣場，完全係欣賞「光之城」日落同夜燈景致嘅好地方。

享受完夕陽灑照喺絢麗街區嘅美意之後，你仲可以去附近嘅型格 Café 或者餐廳食餐飯、飲杯嘢。蒙馬特充滿藝術氣息同波希米亞風情，令人心往神馳。

塞納河畔係黃昏時分散步嘅熱門景點，其中最受歡迎嘅路線之一，就係沿住左岸，由新橋行去蘇利橋，沿途會見到阿拉伯世界研究所、巴黎聖母院同其他歷史建築。你亦可以選擇地標同觀景點更多嘅另一條路線，由巴黎鐵塔延伸到協和橋。無論你點揀，都會享受到喺法國人氣河畔散步嘅浪漫感覺。

喺巴黎鐵塔上面嘅高級餐廳 Le Jules Verne 享用燭光晚餐，絕對可以成為旅程高潮。記得預訂窗邊座位，一邊品嚐美味嘅法國菜同葡萄酒，一邊欣賞巴黎夜景。

Le Jules Verne 服務一流，環境舒適，菜式精緻，景觀開揚，再加上燭光晚餐，足以打造難忘而獨特嘅體驗，雖然價格稍高，但都對得住餐廳嘅整體質素，建議提前訂枱。

嚟到 Terrass Hotel Paris 頂樓酒吧，你可以喺時尚用餐環境下結束一日行程，欣賞巴黎全市同巴黎鐵塔嘅壯麗景色。呢個人氣熱點位於巴黎天台酒店嘅全景露台上，有供應葡萄酒、精心調製嘅雞尾酒同烈酒。

露台配置暖氣，冬天仲幫你準備埋毛毯，一年四季都可以喺度輕鬆舒適咁飲嘢。