點樣 Plan 轉羅浮宮行程

羅浮宮 (Louvre) 中央金字塔 (Pyramid) 門口嗰條人龍，幾乎同博物館本身一樣咁出名 (笑~)！想喺金字塔入口買張門票，有時要排成個鐘頭隊，不過都無損每日 15,000 位遊客嘅參觀雅興。事實上，羅浮宮仲有其他四個入口嘅，你又知唔知喺邊？

如果你唔想排咁耐隊，不妨試吓去皇家橋 (Pont Royal) 以東獅子門 (Porte des Lions)、里沃利街 (Rue du Rivoli) 99 號、卡魯索凱旋門 (Arc du Carousel) 嘅入口，又或者直接由羅浮宮皇家博物館 (Palais Royal-Musée du Louvre) 地鐵站 (1 號線平台) 入嚟啦。

只要喺 FNAC 等等嘅百貨公司提前買定入場券，就可以避開人龍喇；不過，預先購票係會收返幾蚊歐羅服務費嘅！

羅浮宮 (Louvre) 嘅入場費係 EUR15，而只要俾 EUR17 上網買飛，就可以快速入場，唔使排長龍架喇！未滿 18 歲嘅小朋友全年免費入場，而逢星期五晚未滿 26 歲嘅遊客亦都免收入場費；嚟到每個月嘅第一個星期六 (18:00 至 21:45) 同埋法國國慶日 (7 月 14 日全日)，博物館仲全面免費開放添，只係各個展廳到時都肯定人頭湧湧啫。

羅浮宮 (Louvre) 佔地龐大，入面有成 35,000 件藝術品同 380,000 件館藏，想行勻哂所有展廳，唔覺唔覺就用足一日時間，更加唔使諗睇得哂所有藝術品喇！

所以，要概括了解呢座巨型博物館，其中一個好方法就係參加全日唔同時間由金字塔 (Pyramide) 出發嘅導賞團：

呢啲觀光行程嘅講授語言同難易程度各有不同，無論你係第一次嚟，定係藝術專家，都會獲益良多。導賞團遊覽時間日日都唔同，嚟到嗰陣記得要 Check 吓是日行程表喇！

睇唔到《蒙娜麗莎 (Mona Lisa)》同埋《米洛的維納斯 (Venus de Milo)》，又點算係嚟過羅浮宮 (Louvre) 呢？羅浮宮成日喺「無預警」下搬動啲藝術傑作，如果你唔想無休止咁逐間展廳盲搵展品，就要記得喺遊覽之前上 www.louvre.fr 確認清楚位置喇！

羅浮宮 (Louvre) 有咁多間展廳要睇，途中點都要唞吓嘅！羅浮宮嘅餐飲場地都唔少，不過 Café Denon 同埋 Café Richelieu 嘅收費會偏高囉；而 Café Mollien 就位於一樓，設有夏季露台，索價仲比較相宜添。

如果你想暫時離開吓呢座建築，不妨去杜樂麗花園 (Jardins des Tuileries) 嘅靚靚 Café，嘆啲精美小食同快餐吖！嗰度嘅流動小食店咖啡品質超卓，價格只係博物館 Café 嘅一半咋。