你一定要體驗嘅 7 個巴黎型格節日同巿集

世界音樂節 (Fête de la Musique) 每年 6 月 21 日舉行，大家都會鼓勵全國各地所有音樂家走上街頭表演，而巴黎梗係最「墟冚」啦！除咗喺條街度演奏嘅業餘樂隊同音樂家之外，巴黎嘅主要廣場上面仲會舉辦大型免費音樂會，邀請專業藝人登台演出。

時間：每年 6 月 21 日
地點：巴黎 (同埋法國所有城市) 嘅街道同廣場

Foire du Trône 係一場大型遊藝會，每年 4 月同 5 月喺 Vincennes Woods 西面嘅 Pelouse de Reuilly 舉行，裡面有數之不盡嘅經典遊樂設施，包括過山車、摩天輪同幽靈火車，帶你直接「回到過去」。除咗驚險刺激嘅機動遊戲之外，遊樂園仲有主題日同埋嘉年華會等等嘅節慶活動，樂趣滿載！

時間：每年 4 月同 5 月
地點：Vincennes Woods 西面嘅 Pelouse de Reuilly

Paris Fringe Festival 主打國際劇場同表演藝術，展出咗世界各地藝術家同劇團嘅作品，節目包括現代舞、喜劇同戲劇，而大多數表演都會用英文進行。講到 Paris Fringe Festival 嘅奇怪點，就係佢每年舉辦嘅時間同地點都唔同，令人「期待指數」急升！

時間：每年一度
地點：巴黎其中一間劇院

每年 10 月尾，朱古力迷一定要去巴黎會議宮 (Palais des Congrès de Paris) 走返轉，參加 Salon du Chocolat 巴黎朱古力展啊！呢場國際貿易展覽會展出嚟自超過 60 個國家/地區工匠、頂級廚師、朱古力公司同埋可可生產商嘅產品，俾你同場試勻全世界最好味嘅朱古力，仲有朱古力 Fashion Show、朱古力雕塑展等眾多活動舉辦添，節目豐富。

時間：每年 10 月底
地點：波特門勒洛特廣場 (Place de la Porte Maillot) 嘅巴黎會議宮

明日馬戲節 (Festival Mondial du Cirque de Demain) 期間，世界各地嘅年輕馬戲表演者都會施展渾身解數，喺國際評審團同埋馬戲 Fans 面前表演，競逐金、銀、銅牌，情況就好似馬戲界嘅「奧運會」咁，演出節目包括雜技、踩鋼線、雜耍等等。你準備好未？呢班未夠 25 歲嘅表演者將會帶嚟驚艷演出！

時間： Annually, at the end of January
地點：Vincennes Woods 西面嘅 Pelouse de Reuilly

蒙馬特葡萄酒豐收節 (Fête des Vendanges) 每年 10 月中會喺蒙馬特山 (Montmartre Hill) 西坡舉行，俾你一試巴黎最後一座葡萄園 Clos Montmartre 出產嘅葡萄酒。場內其他節目仲包括品嚐手工製地道名物，亦都有音樂會同埋展覽，等你欣賞，氣氛非常熱鬧，吸引巴黎第 18 區 (18th Arrondissement) 40 幾間酒吧同餐廳一齊參加。

時間：每年 10 月中
地點：蒙馬特山西面