Budget 有限都啱玩嘅巴黎 10 大休閒活動

Velib' 單車共享網絡係遊覽巴黎最平嘅方法之一，有普通單車同電動單車俾你揀，而巴黎全市總共有 750 個車站，隨時俾你租車還車，價格會按照你使用單車嘅時間嚟計：開戶費要 EUR1.70，頭 30 分鐘免費，之後每 1 個鐘 EUR1。另一種輕鬆遊巴黎嘅方式係買張 Passe Navigo Découverte；而如果選用 Forfait Navigo Semaine，就可以喺 1 星期內以大約 EUR30 嘅價格乘搭巴黎所有公共交通工具。

巴黎好比巨型露天博物館，就算只係漫步街頭，都足以體驗市內長達 2,200 年嘅歷史！由巴黎聖母院大教堂 (Notre-Dame Cathedral)、艾菲爾鐵塔 (Eiffel Tower) 去到凱旋門 (Arch of Triumph)，令人驚艷嘅地標遍佈全城，為你帶嚟一流嘅「打卡」機會。市內大小教堂通常都免費開放，但係其他景點就大部分都有收入場費。如果你想行勻哂眾多名勝，不妨買張巴黎城市觀光通行證 (Paris Attractions Pass) 吖，咁就可以用折扣價參觀 60 幾個景點喇！

聖圖安跳蚤市場 (Saint-Ouen Flea Market) 又名「Clignancourt 跳蚤市場」，絕對係購物天堂，位於城市北部，喺正巴黎環路 (Paris Ring Road) 側邊，佔地廣闊，色彩繽紛又充滿樂趣，係有少少嘈、少少迫啫。由衫褲、古董、傢俬以至珠寶，呢個市集乜都有賣，氣氛歡快友善，仲可以俾你講價添！不過，喺努力「殺價」嗰陣，都記住要提防扒手喎。

巴黎嘅現代藝術博物館 (Museum of Modern Art)、浪漫生活博物館 (Museum of the Romantic Life)、雨果故居 (Victor Hugo’s House) 同好多其他博物館全年免費開放；而且，就連盧浮宮 (Louvre)、奧賽博物館 (Orsay Museum)、蓬皮杜藝術中心 (Pompidou Centre) 同埋布朗利河岸希拉克博物館 (Quai Branly – Jacques Chirac Museum) 等鼎鼎大名嘅展館都會喺每個月嘅第一個星期日免收入場費架！如果你未滿 26 歲，而且嚟自歐盟國家，仲可以免費遊覽巴黎嘅大多數博物館添。如果你計劃喺旅程之中一次過參觀哂咁多間博物館，買張巴黎博物館通行證 (Paris Museum Pass) 都係幾唔錯嘅選擇嚟嘅。

聖心大教堂 (Sacré Coeur Basilica) 屹立蒙馬特山 (Montmartre Hill) 之巔，海拔 130 米，係巴黎嘅制高點之一，所屬街區充滿波西米亞藝術風情，吸引好多畫家聚腳，亦都林立人氣夜店，遠近馳名。講到睇盡日落靚景嘅最佳地點，就梗係聖心大教堂前面嘅廣場啦！你可以搭纜車上山頂，票價大約 EUR1.90，亦都可以揀行樓梯，費用全免 (笑~)。

杜樂麗花園 (Jardin des Tuileries) 位於巴黎市中心，喺正盧浮宮 (Louvre) 同協和廣場 (Concorde Square) 之間，係建於 16 世紀嘅公共公園，入面有歷經修復、由安德烈勒諾特爾 (Le Notre) 設計嘅法國花園 (Jardin à la Française)，仲有好多地標同埋壯麗雕像，當中包括卡魯塞爾凱旋門 (Arch of Triumph of the Carrousel) 添，難怪成為人氣超旺嘅散步熱點啦！

聖馬丁運河 (Canal Saint-Martin) 係巴黎至潮嘅散步熱點，全長 2 公里長嘅露天運河段吸引咗唔少人嚟行吓、食吓嘢，欣賞巴黎市中心嘅自然風光。行到餓餓哋，不如去距離運河西面 500 米城堡街 (Rue du Château d'Eau) 嘅聖馬丁市集 (Marché Saint-Martin)，選購各式新鮮美食，再去人造水道旁邊嘅栗樹樹蔭下享受野餐吖！

將墓地列為景點，聽落可能怪怪哋…之不過，呢度葬咗唔少名人，又的確係幾有趣嘅地方嚟架喎！由王爾德 (Oscar Wilde)、蕭邦 (Frédéric Chopin)、吉姆莫里森 (Jim Morrison) 到伊迪絲皮亞芙 (Edith Piaf)，眾多知名藝術家、作家、音樂家同科學家都喺拉雪茲神父公墓 (Père Lachaise Cemetery) 長眠；如果你想搵個別墓碑，墓園地圖可以喺墓地出面買到，又或者上網免費 Download 都得。

Le Baron Rouge (紅色男爵) 酒吧餐廳極受歡迎，距離巴士底廣場 (Bastille Square) 只有幾步之遙，係俾你用實惠價格嘆盡法國美酒佳餚嘅好地方。呢度每日都有芝士同埋冷盤供應，週末仲有生蠔添，就算試勻哂經典法國菜，都唔使大灑金錢。而且，你仲可以帶個空酒樽嚟，買啲由大桶舀出嚟嘅葡萄酒裝滿佢架！

學生酒吧通常係度過節慶夜晚嘅 No. 1 平價選擇。呢類酒吧遍佈巴黎各地，而小編喺度誠意推介 3 個好地方俾你揀，分別係位於穆浮達路 (Rue Mouffetard) 嘅 Le Requin Chagrin、卡內特街 (Rue des Canettes) 嘅 Chez Georges，同埋盧瓦爾河岸碼頭 (Quai de la Loire) 嘅 Paname Brewing Co.，間間都各具風格，氣氛熱鬧，而且消費極平！