巴黎 10 大必試親子活動

巴黎迪士尼樂園位於巴黎以北 32 公里，結合迪士尼樂園同華特迪士尼影城，係一條巨型綜合度假村，分為多個主題區，包括「邊疆世界」、「冒險世界」、「幻想世界」同「卡通城」等，每個區域都有刺激嘅機動遊戲同過山車。

當中最受歡迎嘅設施，包括「加勒比海盜」、「小小世界」、「巨雷山」同「星戰極速山」，園內仲有齊全住宿、餐廳同商舖，應有盡有。

維萊特公園位於巴黎市中心東北 5 公里，集「科學與工業城 (Cité des Sciences)」同 Géode IMAX 影院於一身，最啱一家大細玩餐飽。公園免費入場，天氣溫暖嘅時候，你可以輕鬆散步，而小朋友就可以喺「龍之花園」兒童遊樂場盡情放電，

仲有露天影院同音樂場地等文化設施，相當好行。

喺巴黎以北 35 公里嘅阿斯特里克斯公園，以法國經典漫畫角色為主題，帶你穿越返去鐵器時代高盧。園內有 40 項遊樂設施，包括 6 座過山車同 4 個水上機動遊戲。

仲有魔術表演、角鬥士表演同遠古物種動物農場，充滿趣味。另一方面，呢度有 4 間酒店同 6 間餐廳任你揀，玩足全日 (甚至玩多幾日) 都得。

國家自然歷史博物館係親子教育嘅有趣好去處，喺 1793 年開幕，毗鄰植物園，樓高三層，館藏包括恐龍骨骼、植物同昆蟲標本。

裝飾同氛圍都帶俾人一種《翻生侏羅館》嘅感覺。相鄰嘅花園非常好行，仲有個小型動物園。而博物館餐廳設有藤架露天茶座，行到攰可以即時充一充電。

巴黎鐵塔旋轉木馬以世界級地標做背景，除咗係享受下晝優悠時光嘅好去處，亦都係巴黎唯一一個順時鐘方向轉動嘅旋轉木馬，配搭木製馬仔、馬車同火車頭，喺藍色天幕下等你乘搭。裝飾擋板上面畫咗法國迷人街頭同歡快場景。

喺巴黎鐵塔夜幕燈光下，真係好似魔術咁夢幻，影相打卡一流，唔單止小朋友鍾意，好多大人都玩得開心。肚仔有啲餓？不妨隨便揀一檔小食亭，買啲法包、馬卡龍或者熱狗，補充體力。

巴黎動物園 (前稱「文森動物園」，到而家都仲有人改唔到口) 位於市中心東南 6 公里，地鐵直達超方便。動物園佔地 14.5 公頃，設有 4,000 平方米嘅熱帶雨林溫室，環境乾淨又易行，動物得到悉心照顧。

除咗獅子、長頸鹿、猴子等常見動物之外，仲有海牛同切葉蟻之類嘅稀有品種。

馴化園位於巴黎以西 7 公里，獨具型格魅力，早於 1860 年開幕，雖然有啲老派，但園內嘅 40 項設施依然超級好玩，其中包括小型農場、騎馬仔、迷你過山車、哈哈鏡屋，同埋 2 座主打兒童科學同藝術嘅博物館，應有盡有。佔地 19 公頃嘅園區有迷你火車穿梭，仲開設咗 5 間餐廳同 6 個美食攤位，夠你玩足全日。

La Tête dans les Nuages (意思係「雲端之巔」) 位於巴黎市中心，係現代化大規模遊戲機中心，有齊街機、桌上足球、迷你保齡球同桌球，既滿足「電競達人」對刺激感嘅追求，亦都有運動項目任玩。

而且，場地位處市內核心位置，周邊仲有好多間餐廳俾你揀。

肖蒙山丘公園居高臨下，飽覽巴黎優美景致，園區佔地 25 公頃，種咗多種植物同樹木，配襯 19 世紀精美建築。

仲有人工湖同瀑布洞穴，別具魅力。小朋友除咗可以喺廣闊園地上面捉迷藏，更加可以欣賞木偶劇場同玩攤位遊戲，活動豐富。而園內開設 3 間餐廳，你一定唔會餓親。

探索宮位於巴黎市中心，佔據巴黎大皇宮內 25,000 平方米嘅面積，透過精心設計嘅常設展品同互動實驗，帶你進一步了解天文、生物同化學等知識。

而 15 米穹頂天文館更加係場內亮點。呢個文娛教育殿堂非常出色，唯一缺點係真人展覽只會用法文進行。