巴黎熱門博物館 11 選

我哋精選巴黎人氣博物館名單，帶你深入「光之城」嘅文化殿堂。巴黎擁有超過 130 間博物館，而成座城市本身都好似一座活生生嘅博物館，充滿歷史、藝術、建築同軍事珍藏。無論你係歷史迷、藝術發燒友，定係單純想搵下靈感，巴黎都應該榮登你旅行清單嘅第一位。

不妨探索地標展館，沉浸喺知識、文化同創意嘅殿堂之中。我哋嘅精選推介保證令旅程更精彩，你會喺扣人心弦嘅巴黎獲得最大嘅啟發同樂趣。

巴黎酒店

1. 羅浮宮

人氣大型藝術殿堂

推介： 歷史文化, 拍照

羅浮宮嘅畫廊空間面積超過 750,000 平方英尺，係全球最大型嘅藝術博物館之一，設於巴黎市中心塞納河畔嘅 13 世紀宮殿內，喺法國人氣 No. 1。

場館咁奢華，梗係要展出非凡藏品：由達文西嘅《蒙娜麗莎》到《薩莫特拉斯的勝利女神》，再到米開蘭基羅嘅《垂死的奴隸》，羅浮宮帶你穿越人類藝術史嘅閃爍長河。

位置： 75001 Paris, France

開放時間： 星期一、星期三、星期四、星期六及星期日 09:00 至 18:00；星期五 09:00 至 21:45 (星期二休息)

電話： +33 (0)1 40 20 53 17

探索羅浮宮博物館附近的酒店

2. 奧賽博物館

車站改建嘅藝術聖殿

推介： 歷史文化, 拍照

奧賽博物館前身係 19 世紀末建成嘅火車站，珍藏住全球最豐富嘅印象派畫作，梵高、高更、雷諾瓦、塞尚等大師嘅真跡都喺齊度，展出畫作同雕塑超過 2,500 件。

事實上，建築物本身已經係一件藝術品，不妨留步，喺舊式火車站時鐘附近嘅 Café 飲杯嘢，感受時光凝止嘅錯覺。

位置： Esplanade Valéry Giscard d’Estaing, 75007 Paris, France

開放時間： 星期二至星期日 09:30 至 18:00 (星期四開到 21:45)；星期一休息)

電話： +33 (0)1 40 49 48 14

探索奧賽博物館附近的酒店

3. 橘園美術館

印象派同後印象派傑作

推介： 歷史文化, 拍照

橘園美術館規模袖珍，館藏龐大，展出印象派藝術傑作，其中嘅 2 間莫內《睡蓮》專屬展廳最出名，有舉辦常設同臨時展覽，大部分都以印象派同後印象派藝術家為焦點。

其他常設展品包括畢加索、莫迪里阿尼、盧梭等殿堂級大師嘅鉅獻，幾時嚟都睇得到。

位置： Jardin des Tuileries, Place de la Concorde (côté Seine), 75001 Paris, France

開放時間： 星期三至星期一 09:00 至 18:00 (星期二休息)

電話： +33 (0)1 44 50 43 00

探索橘園博物館附近的酒店

4. 羅丹博物館

雕塑藝術寶庫

推介： 歷史文化, 拍照

嚟到羅丹博物館，你可以全面了解羅丹，再喺 18 世紀建成嘅比隆酒店內，欣賞佢最知名嘅藝術作品。場館位於巴黎市中心，毗鄰軍事博物館。由《思想者》、《地獄之門》，以至眾多雕塑、素描同陶瓷作品，羅丹喺昔日嘅工作室裡面，留低咗令人驚嘆嘅藝術遺產。

想參觀博物館，最好揀個晴天過嚟，因為館內好多雕塑都擺喺室外嘅優美花園之中。記得善用語音指南，進一步了解呢位法國藝術天才。

位置： 77 Rue de Varenne, 75007 Paris, France

開放時間： 每日 10:00 至 18:30

電話： +33 (0)1 44 18 61 10

探索羅丹博物館附近的酒店

5. 龐畢度中心

前衛建築

推介： 伴侶, 家庭, 歷史文化, 拍照

平心而論，龐畢度中心嘅前衛建築，比起內部珍藏嘅巴黎現代藝術博物館展品更加出名。除咗博物館，呢個綜合建築群仲有圖書館、音樂中心同高級頂樓餐廳酒吧。

而且，畢加索、安迪沃荷同菲利普·斯塔克等藝術名家同設計師嘅常設展覽加埋特展，令呢度成為魅力四射嘅觀光好去處。

位置： Place Georges-Pompidou, 75004 Paris, France

開放時間： 每日 11:00 至 21:00 (星期二休息)

電話： +33 (0)1 44 78 12 33

查看附近住宿

6. 軍事博物館

戰爭嘅藝術

推介： 歷史文化, 拍照

軍事博物館嘅法文名係「les Invalides」，取自所在建築群嘅名稱，館內收藏咗法國軍隊歷史上用過嘅武器同制服。其中，榮軍院圓頂教堂係建築群嘅重要部分，安放咗拿破崙一世嘅陵墓。

身處呢座巨型博物館，你可以沉浸於戰爭藝術之中，認識法國悠久而自豪嘅軍事歷史，詳盡了解法國歷來嘅多場重要戰役。

位置： 129 Rue de Grenelle, 75007 Paris, France

開放時間： 每日 10:00 至 18:00

電話： +33 (0)1 44 42 38 77

探索榮軍院附近的酒店

7. 建築與遺產城

法國設計同建築

推介： 歷史文化, 拍照

建築與遺產城博物館設於夏約宮內，帶你探索法國嘅豐富建築遺產。場館坐落特羅卡德羅廣場上，對正巴黎鐵塔。

展出各項建築元素嘅重塑紀念品、以至全座建築嘅等比例模型，帶你踏上 12 世紀至今嘅法國設計與建築之旅。要數博物館嘅亮點之一，絕對係全尺寸重建嘅哥德式教堂地下室。

位置： 1 Pl. du Trocadéro et du 11 Novembre, 75116 Paris, France

開放時間： 星期三至星期一 11:00 至 19:00 (星期四開到 21:00)；星期二休息

電話： +33 (0)1 58 51 52 00

查看附近住宿

8. 布朗利碼頭希拉克博物館

原住民藝術與文化展品

推介： 歷史文化, 拍照

布朗利碼頭希拉克博物館致力呈現非洲、亞洲、太平洋同美洲嘅原住民藝術同文化，以所在嘅布朗利碼頭、加埋下令興建場館嘅前法國總統希拉克命名，輪番展出超過 40 萬件藏品之中嘅 3,500 件。

身處館內，你可以喺現代化展廳內試玩互動裝置，探索嚟自世界各地嘅原始藝術。

位置： 37 Quai Jacques Chirac, 75007 Paris, France

開放時間： 星期一至星期三 10:30 至 19:00；星期四 10:30 至 22:00；星期五及星期六 10:30 至 19:00；星期日 10:30 至 19:00

電話： +33 (0)1 56 61 70 00

探索布朗利河岸博物館附近的酒店

9. 達利巴黎

超現實主義嘅巔峰之作

推介： 歷史文化, 拍照

達利巴黎係一間小型私人博物館，距離蒙馬特山腰嘅德爾特廣場只有幾步之遙，帶你進入達利嘅超現實世界。呢位乖僻嘅藝術家想像力豐富，而場館由好多方面展出佢嘅才華，展品包括大約 300 件原創藝術品。

橫跨繪畫、雕塑、版畫同攝影，帶你欣賞達利所涉獵嘅各種藝術流派。

位置： 11 Rue Poulbot, 75018 Paris, France

開放時間： 每日 10:00 至 18:30

電話： +33 (0)1 42 64 40 10

探索達利空間附近的酒店

10. 國家自然歷史博物館

別具教育意義嘅合家歡好玩景點

推介： 伴侶, 家庭, 歷史文化, 拍照

巴黎國家自然歷史博物館自 1793 年起成為重要科研中心，全國各地都有幾個展區，主館就位於綠意盎然嘅植物園裡面，設有 8 個展廳、幾間溫室、Café、商舖、植物園同小型動物園。

博物館將古代傳統結合尖端科技，展出路易十五世曾經擁有嘅犀牛骨骼，配搭現代觸控螢幕展板同虛擬實境頭盔。而且，場館建築以 19 世紀宏偉結構配搭高聳嘅現代玻璃屋頂，同樣融合新舊風格。博物館名下嘅植物園、動物保護區同海洋研究設施遍佈法國各地，為關鍵科研事業作出貢獻。

位置： 57 Rue Cuvier, 75005 Paris, France

開放時間： 每日 10:00 至 18:00 (星期二休息)

電話： +33 (0)1 40 79 56 01

11. 路易威登基金會

巴黎現代藝術博物館地標

推介： 歷史文化, 拍照, 團體

路易威登基金會係巴黎布洛涅森林公園內嘅當代藝術博物館地標，場館本身已經係一件藝術品，由著名建築師 Frank Gehry 設計，帆形結構相當創新，以 3,600 塊玻璃同 19,000 塊白色管板砌成。

行入館內，讓-米歇爾·巴斯奎特同埃貢·席勒等現代大師嘅作品發人深省。不妨下載實用嘅手機 App，了解導覽背景資訊。喺繁忙時段，館方每 30 分鐘會有一節私人導賞團。博物館經 Les Sablons 地鐵站 (1 號線) 同 La Garenne-Colombes-Charlebourg 巴士站 (73號線) 都可以輕鬆到達。

位置： 8 Av. du Mahatma Gandhi, 75016 Paris, France

開放時間： 星期一、星期三、星期六及星期日 11:00 至 20:00；星期四 10:00 至 20:00；星期五 11:00 至 21:00 (星期二休息)

電話： +33 (0)1 40 69 96 00

探索LV 基金博物館附近的酒店

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。