巴黎 10 大必試活動

巴黎嘅地標景點絕對係打卡首選。難怪全球旅人都話巴黎係人生必去目的地：歷史迷可以漫遊古蹟建築，潮人血拼最 hit 設計師名店，吃貨仲可以喪試頂級法國菜同葡萄酒。

巴黎本身就係一場感官盛宴。你可以衝上地標建築，居高臨下俯瞰全城靚景，朝聖世界級藝術珍藏，或者 Hea 住漫遊靚爆街道，深入各個社區，感受獨特氛圍，坐喺街邊 Café 歎盡地道美食，再由熱鬧市集行到寧靜公園，發掘隱世寶藏。你亦都可以坐船遊塞納河，睇盡浪漫城景。巴黎景點將歷史、文化同魅力炒埋一碟，保證每位遊客嘅「光之城」旅程都難忘到極。

巴黎有邊啲必試活動？

巴黎酒店

1. 巴黎鐵塔

喺巴黎最 Iconic 嘅地標飽覽壯闊風景

推介： 伴侶, 歷史文化, 拍照

巴黎鐵塔絕對係巴黎嘅象徵，宏偉屹立喺戰神廣場，吸引無數遊客慕名而來，欣賞城市全景。嚟到巴黎，梗係要探下呢位「鋼鐵夫人」(喺法文裡面，鐵塔嘅「性別」係女仔嚟架)。事實上，鐵塔高 1,063 英尺，分為三層，設有 674 級樓梯，都幾難令人忽略。

二樓有米芝蓮餐廳同馬卡龍吧，三樓仲有香檳吧。由於巴黎鐵塔舉世知名，遊客眾多，要小心以表演為名、詐騙為實嘅「街頭藝人」。如果想搭 Lift 登上塔頂，建議提前喺網上訂飛。

位置： Champ de Mars, 5 Av. Anatole France, 75007 Paris, France

開放時間： 每日 09:15 至 22:45

探索巴黎鐵塔附近的酒店

2. 香榭麗舍大道

漫步於「世界最美大道」

推介： 伴侶, 歷史文化, 拍照

香榭麗舍大道係全球最出名、最優雅嘅林蔭大道之一，全長近 2 公里，連接凱旋門同協和廣場，以潮爆嘅高級餐廳、Café、奢侈品店同劇院聞名，係 Shopping 同打卡嘅好去處。

登上戴高樂廣場嘅凱旋門頂部，你可以俯瞰樹木林立嘅香榭麗舍大道同「勝利之路」。呢條街道以直線連接卡魯索凱旋門、協和廣場方尖碑同拉德芳斯新凱旋門，絕對係巴黎數一數二嘅經典景觀。

位置： Av. des Champs-Élysées75008 Paris, France

查看附近住宿

3. 凱旋門

巴黎最具代表性、最多人識嘅景點

推介： 歷史文化, 拍照, 經濟實惠

毫無疑問，凱旋門係巴黎最 Iconic 嘅紀念地標之一。呢座宏偉建築喺 1836 年落成，最初係為咗紀念拿破崙 1805 年打贏咗奧斯特利茨戰役，而家嘅用途就係向第一次世界大戰、拿破崙戰爭同法國大革命犧牲嘅法國士兵致敬。

拱門高 50 米，位於香榭麗舍大道西端，坐落於戴高樂廣場中心，牆身刻有法國歷代戰爭勝利同將軍嘅大名，下面就有無名烈士墓。只要爬上 280 級樓梯，仲可以欣賞埋巴黎天際線嘅壯麗景色。

位置： Place Charles de Gaulle, 75008 Paris, France

開放時間： 4 月至 9 月：每日 10:00 至 23:00。10 月至 3 月：每日 10:00 至 22:30

探索凱旋門附近的酒店

4. 羅浮宮

《蒙娜麗莎》展覽

推介： 歷史文化, 拍照

羅浮宮既係巴黎嘅歷史地標，亦係全球最大型嘅藝術博物館之一，收藏咗古代文明至 19 世紀藝術品，當中包括極具代表性嘅《蒙娜麗莎》。呢座「前皇宮」如今化身法國最出名嘅藝術殿堂，璀璨氣勢等你感受。由畫作到雕塑、由考古發現到素描，羅浮宮擁有 35,000 件藝術品同超過 350,000 件展品。

永久藏品展區佔地面積達到 60,600 平方米。入場之前，建議拎咗地圖同語音指南先，咁就可以充分享受行程，好好探索呢座世界級博物館。

位置： 75001 Paris, France

開放時間： 星期三及星期四 09:00 至 18:00；星期五 09:00 至 21:45；星期六至星期一 09:00 至 18:00 (星期二休息)

電話： +33 (0)1 40 20 53 17

探索羅浮宮博物館附近的酒店

5. 巴黎植物園

17 世紀大型植物公園

推介： 家庭, 拍照, 經濟實惠

植物園位於拉丁區，係遠離城市喧囂嘅幽靜綠洲，歷史可以追溯到 1635 年，屬於全球數一數二最古老嘅植物園。時至今日，呢度珍藏住世界各地嘅植物，當中包括稀有同瀕危物種。

仲有地質礦物館同國家自然歷史博物館等教育景點，俾你喺造景優美嘅花園裡面，享受平靜時光。另一方面，園內設有動物園，住咗超過 1,000 隻動物。植物園免費開放，值得一遊。

位置： 57 Rue Cuvier, 75005 Paris, France

開放時間： 每日 08:00 至 17:30

電話： +33 (0)1 40 79 56 01

查看附近住宿

6. 蒙馬特

藝術氣息濃厚嘅靚景山頂村莊

推介： 歷史文化, 美食, 晚間娛樂

蒙馬特係巴黎最靚、最上鏡嘅地區之一，別致古雅，感覺似係大城市裡面嘅小村莊，街道充滿魅力，洋溢波希米亞氛圍。呢度雄踞山頂，有聖心大教堂屹立，散發羅馬拜占庭式建築嘅壯麗氣勢，俯瞰全城。

而且藝術氣質濃厚，吸引無數畫家、音樂家同作家嚟搵靈感，每晚都非常熱鬧。不妨去夜店、現場音樂場地同世界知名嘅紅磨坊，欣賞表演。

位置： Montmartre, 75018 Paris, France

探索蒙馬特酒店

7. 塞納河遊船

由另一角度欣賞巴黎地標

推介： 伴侶, 家庭, 拍照

塞納河係法國第五長河，流經巴黎市中心，帶你由唔同角度欣賞城市一眾地標。你可以登上 Bateaux Mouches (意思係「飛船」)，坐喺又長又幼嘅開放式觀光船上面，遊盡巴黎鐵塔、羅浮宮、市政廳等景點，航程大約 1 個鐘。

坐船遊塞納河，固然睇勻哂河畔兩岸嘅巴黎建築靚景。想再寵愛自己多一啲？咁就要參加晚餐遊船團，就算額外洗多一筆，都絕對值得，因為夜燈下嘅地標更加迷人。

位置： 巴黎塞納河遊船嘅登船碼頭包括：會議港、布爾多奈港、布朗利碼頭同蒙特貝羅碼頭

8. 巴黎迪士尼樂園

法國最受歡迎嘅主題樂園

推介： 家庭, 拍照, 遊歷

巴黎迪士尼樂園位於馬恩拉瓦萊，距離巴黎市中心大約 32 公里，係一家大細必去景點。園區佔地 20 平方公里，有大量迪士尼角色同電影主題嘅遊樂設施，當中包括《星戰》同 Marvel 系列，設施橫跨過山車、鬼屋、海盜船等。

而且，園內有超過 50 間餐廳同 7 間酒店，你仲可以喺 9 洞同 18 洞高爾夫球場，盡情揮桿。

位置： Bd de Parc, 77700 Coupvray, France

開放時間： 星期一至星期五 09:30 至 22:00；星期六及星期日 09:00 至 22:00

電話： +33 (0)1 60 30 60 53

探索巴黎迪士尼樂園附近的酒店

9. 凡爾賽宮

追隨太陽王嘅腳步

推介： 伴侶, 歷史文化, 拍照

凡爾賽宮唔喺巴黎，反而距離市中心西南大約 20 公里，係法國絕對君主制度嘅象徵，自 1789 年法國大革命推翻皇權，而家就成為咗博物館，亦都係法國人氣最高嘅古蹟景點之一。宮殿完全重現 17 世紀嘅瑰麗原貌，行入鏡廳或者國王套房，感覺都好似穿越時空一樣。

另一方面，凡爾賽宮嘅花園係法式園藝風格嘅典範，旁邊仲有好多間餐廳同小食店，選擇相當豐富，值得用一日時間細意探索。

位置： Place d’Armes, 78000 Versailles, France

開放時間： 星期二至星期日 09:00 至 17:30 (星期一休息) 花園同公園每日 08:00 至 18:00 開放。

電話： +33 (0)1 30 83 78 00

探索凡爾賽宮附近的酒店

10. 巴黎葡萄園

葡萄栽培同葡萄酒試飲

推介： 伴侶, 美食, 非一般行程

巴黎嘅葡萄種植同釀酒歷史可以追溯到羅馬帝國時期，雖然唔及勃艮第同香檳區出名，但你都可以去 Clos Montmartre 參觀吓，品嚐巴黎本地釀造嘅葡萄酒。

Clos Montmartre 葡萄園佔地 1,550 平方米，距離聖心大教堂只有 300 米，主打優質嘅佳美/黑皮諾葡萄酒。每年 10 月，呢度仲會舉辦蒙馬特豐收節，慶祝葡萄收成。

位置： 18 Rue des Saules, 75018 Paris, France

電話： +33 (0)1 42 62 21 21

查看附近住宿

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。