巴黎 10 大常見騙局

金戒指騙局嘅操作方式通常係咁：你沿住塞納河畔漫步，有位老婆婆經過，突然就聽到金屬物件跌落地下嘅清脆聲音。呢位婆婆會截停你，執起一隻金戒指，問係咪你跌嘅。你當然知道自己冇跌嘢，於是如實相告。跟住，老婆婆會堅稱呢隻戒指係好嘢，慫恿你執咗佢嚟轉運，又或者送俾另一半，但你收咗就要俾錢「報答」佢。

防範方法：既然唔係你嘅戒指，就千祈唔好拎！區區一隻廉價嘅拋光黃銅戒指，你另一半肯定唔會鍾意。直接行開，唔好理對方就得。

喺巴黎鐵塔底下，假冒慈善團體募捐非常普遍，同一時間可以有 10 位騙徒以上，喺人群之中搵食。佢哋嘅手法好簡單：騙徒會拎住一塊貼住正規慈善機構影印 Logo 嘅剪貼板，喺你面前揮舞，好多時仲會假扮聾啞人士，估計係為咗喺你質疑佢哋身分嘅時候，扮聽唔到你講乜。可以咁講…佢哋籌到嘅錢絕對唔會用喺正途。

防範方法：大部分慈善機構都唔會當街收取現金，只會問你攞聯絡方式，寄資料俾你。如果有人即場要你俾錢，咁就直接走人。

友誼手繩本應係溫馨嘅心意，但都要小心提防。喺蒙馬特聖心堂周邊，呢種騙局廣為流傳：一位友善嘅男人會接近你，示意你伸出手，然後假扮想同你握手。當你一伸手，就會發現有條彩色線綁住你手指，並且喺幾分鐘之內織成一條「友誼手繩」，而你就好似條魚咁上咗鉤，騙徒即刻反面，追你俾錢。有咁嘅「朋友」，真係如臨大敵。

防範方法：喺熱門旅遊景點附近，要保持雙手貼身，唔好同陌生人握手。如果唔小心被綁上線圈，就即刻扯甩佢。

巴黎以浪漫著稱，玫瑰更加係愛情嘅象徵。如果有人突然行過嚟，送枝玫瑰鮮花俾你，肯定係善意同愛慕嘅表現啦？錯哂：佢哋愛嘅只係你嘅錢。如果你接受呢份「禮物」，騙徒會即刻追你俾錢。就算你還返枝花俾佢哋，對方有時都會繼續纏住你。

防範方法：唔好接受陌生人嘅禮物，無論大人定細路都一樣。

「地鐵小幫手」呢種騙局，唔係只得巴黎獨有，基本上全球任何設有複雜地鐵票務系統嘅城市，都會出現呢啲「熱心人」，等住搵著數。當你研究緊地鐵圖同售票機嘅時候，會有著住疑似職員制服嘅人走過嚟，話幫你買飛，收你成人票價，但買張兒童飛、甚至俾張過期車票你。一旦你俾真正嘅地鐵職員查票，就會慘遭罰款。

防範方法：自己車票，自己買。如果有困難，可以請人教你點樣用售票機，或者去票務櫃台求助。

乞丐唔一定係騙徒，但通常真假難辨：你又點知對方係咪確實需要幫助呢？乞丐通常出沒喺主要旅遊景點同火車站，常見手法五花八門，例如：有個女人抱住喊緊嘅 BB 接近你 (有人見過佢哋用力整喊 BB，加強效果)，或者拎住張殘舊嘅紙條，描述自己嘅悲慘遭遇。

防範方法：想確保善款幫到真正有需要嘅人，直接捐俾註冊慈善機構先啱。

扒手通常喺人多擠迫嘅地方作案。雖然好多騙徒會利用你嘅同情心呃錢，但扒手就直接跳過呢步，直擊你個銀包。巴黎嘅扒竊手法多不勝數，最常見嘅包括：「論盡」嘅跑步客「意外」撞跌你，或者假扮迷路遊客，一邊睇地圖，一邊求你幫手。以上兩種情況都係為咗分散你嘅注意力，俾同黨乘機偷你銀包。扒手遍佈巴黎，又以羅浮宮一帶最猖獗，原因無他：《蒙娜麗莎》係分散你注意力嘅好幫手。

避免方法：參觀著名景點嘅時候，盡量帶少啲貴重物品同現金，最好唔好拎出嚟，或者最好放喺有拉鍊嘅衫褲袋入面。一般嚟講，喺人多擠逼嘅地方要特別留神，小心看管自己嘅財物。

街頭小販可能會展示一啲好吸引嘅商品。買手信紀念自己嘅巴黎之旅固然無可厚非，但都要揀啱地方買。眾所周知，唔少主要景點周圍都有人兜售產品，當中有唔少嘅銷售手法都極具侵略性。佢哋可能一開始好友善，俾你慢慢睇同試佢哋嘅商品。不過，只要你摸過某件產品或者表現出些少興趣，佢哋就會要求你俾錢。有啲仲會不斷纏擾同一個受害者，徹底破會佢哋遊覽景點嘅體驗。

避免方法：唔好同佢哋有任何接觸。見到呢啲騙徒嘅時候，直接無視佢哋，再去正規商舖買手信就得。

魔術師可以好有魅力。你行行下街，有個陌生人埋嚟同你講：「你諗太多啦。」你覺得有幾準？講真，幾乎個個都諗得多嘢㗎啦，但係呢句只係騙局嘅開始。跟住佢哋會聲稱，雖然佢哋唔識你，但佢哋可以對你嘅生活提供更深入嘅見解。佢哋可能會估你媽媽叫咩名或者列出你嘅性格特徵。無論點都好，佢哋嘅所謂「魔術」都只屬於業餘水平，但就索價不菲。

避免方法：講聲「No」，行開就得。

殼牌遊戲係有史以嚟最古老嘅戲法之一，可以話比騙局更神奇。騙徒會喺枱上面放三個倒轉嘅杯 (即係「殼」)，其中一隻杯下面有個波或者有粒乾豆；之後，騙徒會向你展示其中一隻杯下面嘅波，再超快手咁郁走啲杯。估都估到，無論你買邊隻杯入面有波，個波都會「神秘」消失，因為呢款遊戲永遠冇贏家，只有水魚俾人呃。

避免方法：遠離佢哋。就算你只係企喺度睇，都會令自己淪為扒手嘅目標。