巴黎 10 大常見騙局

沿住塞納河 (Seine) 嘅岸邊行，有一位老太太路過；突然之間，你就聽到金屬撞擊嘅聲音。呢位太太叫停咗你，執起一隻金戒指，問係咪你跌嘅。因為戒指唔屬於你，所以你就話「冇」啦。之但係，太太認為呢隻戒指好靚，堅持要你收咗佢，仲話咁樣會為你帶嚟好運添；你自己唔想要，送俾另一半都好吖！你心動喇，收咗戒指，之後…唔該俾返錢「報答」佢！

避免方法：唔係你嘅戒指，千祈唔好拎！講真，望落咁 Cheap 嘅拋光黃銅戒指，你另一半都唔會鍾意啦 (笑~)。只要行開，唔好理騙徒，就冇事架喇。

喺艾菲爾鐵塔 (Eiffle Tower) 下面，呢種騙案非常普遍，同一時間可能仲有多達 10 個以上嘅騙徒假扮藝術家，混入人群之中添！佢哋行騙嘅手法非常簡單：有人會向你揮舞剪貼板，通常貼咗印有合法慈善機構標記嘅影印本，而佢哋似乎特別鍾意扮聾啞人士籌款，可能係因為當你懷疑佢哋而提問嘅時候，佢哋可以即刻扮答你唔到。我夠膽講，佢哋募集到嘅錢永遠都唔會用於慈善囉！

避免方法：大多數慈善機構都唔會喺大街大巷收 Cash，只會詢問你嘅聯絡方式，之後向你提供更多資訊。如果有人想即場索取現金，就記得要走開喇！

呢種騙案喺蒙馬特嘅聖心大教堂 (Sacre Coeur) 周圍經常發生，你會見到一個貌似友善嘅人行埋嚟，想引你伸隻手出去，同佢握手。之後，你會發現手指上面無啦啦纏咗一條彩色線，短短幾分鐘仲會織成一條友誼手鍊添！好不幸，你而家就好似上咗鉤嘅魚一樣，任由騙徒「宰割」…喺異地交朋友唔係咁易架；而呢啲所謂「朋友」當你水魚，又點會有 friend 做？

避免方法：身處熱門旅遊景點附近，記得要收起雙手，唔好隨便同陌生人握手。如果佢哋纏住你，記得盡快除低條手鍊。

巴黎素以浪漫氣氛而聞名，如果有人行近你，遞上一支新鮮玫瑰，肯定係想表達友善同愛意啦，你話係咪？「愛意」都有嘅，不過佢哋淨係愛你啲錢囉！如果你收咗呢支花，騙徒就會即刻要求你俾錢，就算當下還返俾佢哋，佢哋都依然會繼續煩住你。

避免方法：細路哥嗰陣咪學過囉—唔好接受陌生人嘅禮物啊！

呢種騙徒並唔係巴黎獨有—實際上，全球任何一個擁有複雜票務系統嘅城市，都會有人零舍「樂於助人」，繼而從中獲利。喺你好努力睇緊地圖同嘗試買飛嘅時候，呢啲著住正式制服嘅人會行埋嚟，表示願意幫你買飛，仲會向你收取成人票嘅費用添，但就只會幫你買兒童票，有時仲會用過期嘅車飛嚟魚目混珠！萬一你俾真嘅地鐵職員捉到，就要交罰款架喇。

避免方法：絕對要親自買火車票，先可以保證買到真飛！如果遇到困難，不妨問吓人點樣操作售票機，或者直接去售票櫃枱查詢。

要辨別對方係「真乞衣」定「假騙徒」，相當棘手…市內主要旅遊景點同火車站附近，都成日會遇到乞衣，你又點知行緊埋嚟嗰位係咪真係需要你幫手呢？可以提提你嘅係，騙徒嘅手法萬變不離其中：一個女人喺 Café 入面抱住喊緊嘅 BB，並且嘗試接近你，而其他人就會一五一十咁講俾你聽佢哋有幾慘 (梗係慘啦…個 BB 吖嘛—有人見到啲騙徒會好粗暴咁整喊佢囉，冇人性架！)

避免方法：如果你想確保善款交到去真正有需要嘅人手上，不妨捐錢俾註冊慈善機構啦。

有啲騙徒會利用你嘅善心嚟賺錢，而有啲就連呢步都慳返，直接喺你銀包入面攞錢！巴黎扒手嘅手法層出不窮，最常見嘅有慢跑人士「論論盡盡」咁撞到你，又或者「盪失路」嘅遊客請你幫手教佢哋睇吓地圖，兩者目的都係分散你嘅注意力，令佢哋本人或者同夥可以順利偷錢。扒手遍佈巴黎，喺羅浮宮 (The Louvre) 館內同周圍特別多，皆因《蒙娜麗莎 (Mona Lisa)》已經幫到佢哋分散你嘅注意力吖嘛！

避免方法：參觀知名景點嗰陣，盡可能帶少啲貴重物品同現金，同時最好將佢哋放喺內隔或者拉鏈袋入面；行到人多擠迫嘅地方，就要特別留神喇！

喺巴黎買手信固然無可厚非，但都要揀啱地方架！眾所周知，唔少主要景點周圍都有人兜售產品，Sell 嘢技巧極具侵略性，一開頭扮哂 Nice，引你試用佢哋嘅商品；只要你輕輕摸過某件產品，又或者表現出少少興趣之後，佢哋就會要求你俾錢。有啲衰人仲會不斷不斷纏擾同一個受害者，完全破壞哂佢哋喺景點嘅遊覽體驗…

避免方法：完全唔好同佢哋互動！見到呢啲騙徒嘅時候，直接無視佢哋，再去正規商舖買手信就得。

你喺街上行緊嘅時候，突然間有個人同你講：「你諗得太多喇！」你覺得佢講得準？講真，都市人有邊個唔諗得多嘢呢？而且，呢個只係騙局嘅開端…呢個人會宣稱佢就算唔識你，都對你嘅生活有深入了解，可能會估下你媽媽叫咩名，又或者列出你嘅性格特徵。無論點都好，佢哋嘅所謂「魔術」都只屬於業餘水平，但就索價不菲！

避免方法：講聲「No」，行開就得。

呢個係有史以嚟最古老嘅戲法之一，可以話比騙局更神奇！騙徒會喺枱上面放三個倒轉嘅杯 (佢哋就係「殼」)，其中一隻杯下面有一個波或者一粒乾豆；之後，騙徒會向你展示其中一隻杯下面嘅波，再超快手咁郁走啲杯。估都估到，無論你買邊隻杯入面有波，個波都會「神秘」消失，因為呢款遊戲永遠冇贏家，只有水魚俾人呃…

避免方法：遠離佢哋—即使你只係企喺度睇，都會令自己淪為扒手嘅目標架！