斯特拉斯堡 8 大休閒活動
斯特拉斯堡最出名嘅係乜嘢？
作為法國大東部地區嘅首府，斯特拉斯堡既具有中世紀城市古樸嘅往昔魅力，亦都有歐洲強大政治中心嘅「權能」氣息。斯特拉斯堡毗鄰德國邊境，所以建築、美食同文化都融合咗德法元素。
由佔據市中心大部分領地嘅舊區、到現代科學技術博物館等等，斯特拉斯堡往往俾人一種穿越時空、雋永經典嘅感覺；而飲食文化亦都係呢度嘅另一個寶藏—惹味嘅地道菜、優質嘅葡萄酒、清爽嘅本地啤酒樣樣俱全，叫呢座城市做「歐洲十字路口」絕對事出有因！
斯特拉斯堡最好玩嘅活動係乜嘢？
1. 漫步小法國區
喺歷史悠久嘅小法國區散步
推介： 歷史文化, 拍照, 經濟實惠
小法國 (La Petite France 或 Little France) 亦稱為皮革區 (Quartier des Tanneurs)，係位於大島 (Grande Île 或 Big Island) 西端歷史悠久嘅街區，喺斯特拉斯堡 (Strasbourg) 市中心好易搵路去到。而大島被伊爾河 (River Ill) 環繞，成座島都列為聯合國教科文組織世界文化遺產架！
中世紀時期，小法國曾經住滿皮革工人、漁民同磨坊主，呢度嘅中世紀建築遺蹟保存完好，其中包括半木結構建築、狹窄嘅鵝卵石巷同有蓋橋樑；區內仲有好多古樸嘅小酒館，行到攰可以坐低食啲小食，飲返杯嘢。
位置： 位於斯特拉斯堡中心大島西端
漫步小法國區
2. 必睇景點：斯特拉斯堡大教堂
參觀世界上最高嘅教堂之一
推介： 歷史文化, 拍照, 經濟實惠
斯特拉斯堡大教堂 (Cathédrale Notre Dame de Strasbourg) 建於 11 世紀初，高 142 米，係世界上最高嘅教堂之一，建築非凡，最初採用羅馬式風格，後來增添咗哥德式建築元素，喺時光鴻流嘅洗禮下，成為咗一件令人嘆為觀止嘅藝術品。舉凡 12 世紀嘅彩色玻璃窗、16 世紀嘅聖潘克拉斯 (St. Pancrace) 祭壇、17 世紀嘅天文鐘等等…斯特拉斯堡大教堂嘅特色數之不盡！
位置： 位於斯特拉斯堡中心大島
開放時間： 4 月至 9 月每日 09:00 至 19:30；10 月至 3 月每日 10:00 至 17:30；6 月至 8 月逢星期五及六開放至 22:00
必睇景點：斯特拉斯堡大教堂
3. 沃邦攔河壩
立足歷史建築嘅全景露台上
推介： 歷史文化, 拍照
沃邦攔河壩 (Barrage Vauban 或 Vauban Dam) 建於 17 世紀末，當時係用嚟保衛斯特拉斯堡 (Strasbourg)，萬一有人入侵，就會用洪水淹沒城市南邊嘅入口！今時今日，呢度既見證住沃邦 (Vauban) 呢位工程天才嘅橫溢才華，亦都存放咗羅昂宮 (Palais Roha) 同大教堂歷史悠久嘅石膏像，仲有雕像複製品添！沃邦攔河壩頂部嘅平台絕對係焦點特色，你可以喺上面欣賞到伊爾河 (River Ill) 同小法國 (Petite France) 嘅景色，盡情影靚相。
位置： 斯特拉斯堡市中心大島 (Grande Île) 西南端對開
開放時間： 每日 09:00 至 19:30
沃邦攔河壩
4. 喺橘園公園放鬆身心
喺景色怡人嘅公園呼吸新鮮空氣
推介： 伴侶, 家庭, 拍照, 經濟實惠
橘園公園 (Parc de l’Orangerie) 建於 18 世紀末，坐落喺斯特拉斯堡 (Strasbourg) 東北部，佔地 26 公頃，之所以叫做「橘園公園」，皆因園內種滿橙樹；而呢啲橙樹其實係共和黨人喺法國大革命期間去布維萊城堡 (Bouxwiller Castle) 偷返嚟，交俾市政廳嘅！今時今日，橘園公園成為最啱散步嘅幽靜樂園，有動物園、保齡球場、兒童遊樂場、法式滾球場 (pétanque)、運動場，另外有一間叫做 Le Buerehiesel 嘅米芝蓮星級餐廳；而你仲可以租返艘船仔，喺湖上嚟個浪漫之旅添！
位置： 斯特拉斯堡東北部歐洲人權法院 (European Court of Human Rights) 大樓附近
開放時間： 24/7
喺橘園公園放鬆身心
5. 參觀阿爾薩斯博物館
探索阿爾薩斯人過去嘅日常生活
推介： 歷史文化, 拍照
阿爾薩斯博物館 (Alsatian Museum) 坐落於精心修復嘅 5 層高木框架建築裡面，歡迎你親臨發掘當地歷史同文化。雖然博物館格局相當隨意，但係都樂趣無窮，珍藏住絢麗嘅阿爾薩斯傳統服裝、器皿、傢俱、工具同玩具，其中大部分歷史可以追溯到 2 個世紀、甚至更早之前。售票處有提供好多 種語言嘅小冊子，仲有附帶耳筒嘅導覽機，俾你借用；而館內庭院係人氣超旺嘅影相「打卡點」，千祈咪錯過！
位置： 古坦魯區 (Krutenau District) 聖尼古拉斯之墓 (Quai Saint-Nicolas)
開放時間： 星期三至一 10:00 至 18:00 (逢星期二休館)
參觀阿爾薩斯博物館
6. Le Vaisseau 科學探索之旅
帶埋你嘅小朋友 (仲有你內心嗰個小朋友) 去妙趣科學中心玩餐飽
推介： 家庭, 拍照
Le Vaisseau 科學科技博物館位於市中心南部，經過特別設計，用有趣而富教育意義嘅方式介紹科學，主要對象係 3 至 15 歲嘅細路仔，難怪成為合家歡旅遊勝地！Le Vaisseau 有 6 個常設展覽，每個都有特定主題，分別係關於人類嘅「Being Human」、關於動物嘅「The Animals」、關於建造嘅「I Build」、關於水嘅「Water」、關於邏輯思考嘅「Log’hic」，同埋關於大自然嘅「The Garden」，俾你同小朋友透過 100 幾種互動元素，以休閒方式探索科學。
位置： 1 Bis Rue Philippe Dollinger, 67100 Strasbourg, France
開放時間： 星期二至日 10:00 至 18:00 (逢星期一休館)
電話： +33 (0)3 69 33 26 69
Le Vaisseau 科學探索之旅
7. 最後一站去古坦魯區
喺呢區度過熱鬧一夜
推介： 晚間娛樂
古坦魯區 (Quartier Krutenau) 係斯特拉斯堡 (Strasbourg) 最古老嘅地區之一，位於大島 (Grande Île) 東南部，兩者被伊爾河 (Ill River) 上面嘅狹長港灣隔開。呢區而家人氣爆燈，區內有好多精心修復嘅半木框架結構房屋，周圍仲開滿現代風格酒吧、餐廳、時裝店同美術館添！天黑之後，你可以先去伴 侶街 (Rue des Couples) 嘅 Ze Trou 飲返杯，先至再去屠夫街 (Rue des Bouchers) 嘅 Stand Up 徹夜熱舞。
位置： 斯特拉斯堡市中心附近大島正東南部
最後一站去古坦魯區
8. 斯特拉斯堡聖誕市集小食
喺歐洲最古老嘅聖誕市集之一同賀佳節
推介： 伴侶, 家庭, 購物, 拍照, 美食
斯特拉斯堡聖誕市集 (Christmas Market；正式名稱係「Christkindelsmärik」) 每年 11 月底至 12 月底喺斯特拉斯堡大教堂 (Strasbourg Cathedral) 前面架設，氣氛正到你唔信，尤其係夜晚街燈同聖誕裝飾閃閃發光嗰陣，就更加璀璨無雙！節日氣氛咁濃厚，周圍又有咁多地道產品任你揀，你喺攤檔之間行街途中，一定會俾薑餅同香料酒 (mulled wine) 嘅氣味所吸引。溫馨提示：呢個市集嘅人氣屬全歐洲數一數二，如果你想喺酒店行幾步就嚟到，就要盡早 book 房喇！
位置： 斯特拉斯堡大教堂前廣場
開放時間： 12 月每日 11:00 至 20:00
斯特拉斯堡聖誕市集小食
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。