尼斯 12 大必試活動

盎格魯街 (Promenade des Anglais) 意思係「英國人步道」，位於地中海沿岸，由尼斯機場延伸至美國海濱大道 (Quai des États-Unis)，長約 5 公里。 呢條海濱步道吸引唔少人嚟散步、慢跑、踩單車、踩 roller 同踩滑板，係個生氣勃勃嘅好地方，既可以靜觀行人來往，又可以將海岸美景盡收眼底。

步道兩邊種滿咗棕櫚樹同擺滿藝術品。坐喺標誌性藍色長凳上抖抖，或者去 Vélo Bleu 自助點租單車踩，都非常唔錯。海灘上面仲有好多一流嘅酒吧同餐廳。至於住宿，你可以入住法國數一數二最豪華嘅酒店，享受皇室一樣嘅待遇。

本地人叫尼斯舊城區做「Vieux Nice」，佢位於天使灣 (Bay of Angels) 東端阿伯特一世花園 (Albert the 1st Garden) 同城堡山 (Castle Hill) 之間，擁有狹窄嘅鵝卵石街、紅屋頂嘅舊式房屋，仲有一眾著名景點，例如尼斯歌劇院 (Nice Opéra) 同拉斯卡里斯宮 (Lascaris Palace) 等等，好似帶你返去 18 世紀一樣。

呢個地區亦都以古樸餐廳同熱鬧夜場而聞名。遊覽期間，記得要去 Fenocchio Glacier (地址：6 Rue de la Poissonnerie) 食城中最好味嘅雪糕，獎勵下自己！

馬里涅雷斯海灘 (Marinières Beach) 又稱為 Plage des Marinières，位於濱海自由城 (Villefranche-sur-Mer)，喺尼斯以東 15 分鐘車程外，係個非常熱鬧嘅海灘，尤其喺 5 月至 9 月期間最受歡迎。有別於區內好多海灘，馬里涅雷斯海灘免費開放俾公眾前往。

馬里涅雷斯海灘雖然唔係沙質灘，但係灘上嘅石春比尼斯前面嘅卵石灘細粒好多好多，所以特別風光如畫。附近各式酒吧同餐廳林立。就算你冇帶嘢食嚟野餐，都唔怕餓親。

尼斯華麗嘅教堂展現當地豐富嘅歷史同瑰麗嘅建築，係度假期間嘅必遊勝地。好多教堂都位於尼斯舊城區，但係其實市內周圍都有令人嘆為觀止嘅教堂。聖雷帕拉特大教堂 (Cathédrale Sainte-Réparate) 係最著名嘅教堂之一，建於 12 世紀。

聖尼古拉斯俄羅斯東正教大教堂 (St Nicholas Russian Orthodox Cathedral) 係另一座令人驚嘆嘅教堂，有壯觀嘅尖塔同彩色塔樓，體現俄羅斯建築傳統，喺市內格外搶眼。尼斯其他著名教堂包括加里波第廣場 ( Place Garibaldi) 嘅聖塞普爾克雷教堂 (Chapelle du Saint-Sépulcre)、薩勒亞大道 (Cours Saleya) 嘅聖蘇艾爾教堂 (Chapelle du Saint-Suaire) 同薩勒亞大道 (Cours Saleya) 嘅慈悲教堂 (Chapelle de la Miséricorde)。

尼斯附近有連串迷人嘅海灘。藍色海灘係位於盎格魯街 (Promenade des Anglais) 嘅私人沙灘，全年開放。鐘意水上運動嘅可以去玩滑翔傘、花式滑水同滑水活動，然後去海鮮餐廳或酒廊一飽口福。當地人就鐘意去拉里瑟夫 (La Réserve)，即係位於城鎮東邊比較鮮為人知嘅小型公共海灘。呢個係鵝卵石海灘，所以記得着泳鞋去！

如果有小朋友同行，Le Voilier 海灘絕對係夠玩成日嘅好去處。呢個寬闊嘅細石海灘海水清藍，海浪平靜。海灘一半係公共，一半係私人，私人海灘嗰邊有梳化床、餐廳、熱水淋浴間同遊樂場。

勃朗峰公園 (Mont Boron Park) 坐落喺地中海植物樹林入面，有 11 公里長嘅遠足徑、全長 1.5 公里嘅運動圈，仲有野餐區同滾球場。一句講哂，你想玩咩都有，一定樂而忘返！

勃朗峰公園嘅焦點特色係 16 世紀嘅阿爾班山堡 (Fort du Mont Alban)，喺上面向西可以望到尼斯港 (Port of Nice) 嘅壯麗景色，向東就可以飽覽濱海自由城 (Villefranche-sur-Mer) 同聖讓卡普菲拉半島 (Saint-Jean-Cap-Ferrat) 嘅景色。由尼斯舊城區 (Nice Old Town) 出發遠足，大約 45 分鐘就會嚟到；搭巴士直達公園又得。

馬克夏卡爾博物館 (Marc Chagall Museum) 收藏咗俄羅斯出生嘅藝術家馬克夏卡爾 (Marc Chagall) 嘅作品，館藏屬全球數一數二；以一間博物館嚟講，呢個場地更加可以話係異常熱鬧！館外嘅花園設有古樸嘅酒吧/餐廳，亦有舉辦現場古典音樂會嘅大廳同埋戲院，放映關於呢位多面向藝術家生平嘅電影。

博物館位於尼斯市中心嘅梅納德博士大街 (Dr.Ménard Avenue)，收藏咗呢位藝術家嘅 17 幅聖經主題畫作。館內提供導覽服務，同埋會為兒童舉辦互動創意課程。

城堡山，當地語言叫做 Colline du Château，係尼斯最高點，海拔 92 米，位於舊城區東面。你可以沿住風景優美嘅登山路線徒步上山頂，搭𨋢方便啲又得，或者坐古雅嘅迷你火車都得。

上到山頂之後，你會見到浪漫嘅城堡遺跡、壯觀嘅大型人工瀑布、古老公墓，仲有間別緻嘅 Café。你可以喺城堡山飽覽尼斯絕美全景，西望天使灣 (Bay of Angels)，向東就睇到港口靚景。公園環境怡人，最啱散步，仲可以帶埋小朋友嚟呢度嘅遊樂場盡情放電！

金梅德新大道 (Jean Médecin Avenue) 位於舊城區 (Old Town) 以北嘅馬塞納廣場 (Place Massena) 同尼斯火車站之間，係尼斯市中心最熱鬧嘅購物街，長近 900 米，設有寬闊嘅行人路同各種類型嘅購物場所，由小型精品店、大型購物中心、百貨公司到超市都應有盡有。

精選店舖包括 H&M 同 Zara 呢類人氣國際品牌，仲有提供獨特商品同紀念品嘅時尚精品店。呢度仲有各式各樣嘅食肆，由法式 Café 到高級餐廳都有，肯定可以令你大飽口福。提提你：過馬路嗰陣，記得小心留意有冇電車嚟緊！

尼斯馬蒂斯博物館 (法文：Musée Matisse) 收藏咗呢位知名法國野獸派畫家亨利馬蒂斯 (Henri Matisse) 嘅大量畫作、繪圖、雕塑同攝影作品。博物館位於尼斯西米耶茲 (Cimiez)，坐落喺迷人嘅 17 世紀別墅阿雷內斯別墅 (Villa des Arenes) 入面。

馬蒂斯同佢嘅繼承人亦都向博物館捐贈咗好多作品，所以宜家博物館收藏咗大量畫作同水粉畫、繪圖同版畫、雕塑同攝影作品。你仲可以欣賞到呢位藝術家所擁有嘅精彩物品，包括陶瓷、彩繪玻璃同埋文件等等。喺博物館展品之中，佢比較著名嘅作品包括《閱讀的女人》(Woman Reading)、《生活的幸福》(Le Bonheur de Vivre)、《藍色裸體》(Blue Nudes) 同埋《甜品：紅色的和諧》(The Dessert: Harmony in Red)。

鳳凰公園係個令人嘆為觀止嘅植物園兼動物園，而且尼斯亞洲藝術博物館 (Nice Asian Arts Museum) 亦都喺呢度。呢座金字塔形建築歐洲最大型嘅溫室之一，入面有多種唔同嘅熱帶氣候，種咗巨型棕櫚樹、奇特嘅蝴蝶、粉紅色紅鶴同其他珍奇動植物。鳳凰公園帶你穿越 20 幾個主題花園，俾你認識下袋鼠、鱷魚以至眼鏡凱門鱷等等眾多奇特動物，刺激無比。

另外，公園仲有個大型兒童遊樂區，對細路嚟講簡直係樂園。

當地人叫莎萊雅廣場市集 (Cours Saleya Market) 做「尼斯花卉市場 (Nice Flower Market)」，但市集入面除咗花之外，仲有好多美味蔬果，陳列方式充滿藝術感。你仲可以買到自家製蜂蜜、精心製作嘅番梘同其他精選好物。

呢個熱鬧嘅市集喺莎萊雅廣場上面架設，正正位於舊城區同海灘之間，絕對係你品嚐當地新鮮食品、同檔主傾偈交流嘅好地方。要數莎萊雅廣場市集嘅必試名物，點會少得 socca？呢款鷹嘴豆烤餅係正宗地道菜式，令人食指大動，幫襯 1920 年代就喺市集擺檔嘅 Chez Thérésa 就可以試到。