英格蘭 10 大海灘

菲斯特爾海灘 (Fistral Beach) 被譽為英格蘭 No.1 嘅滑浪海灘，雖然係寧靜嘅世外桃源，但其實距離人氣海濱小鎮紐基 (Newquay) 都係幾公里啫。海灘上面嘅沙粒好柔軟，周圍都係崎嶇不平嘅山丘，有時湧浪異常強勁，就會吸引唔少滑浪者喺週末過嚟玩；而灘上設有救生塔，大家都可以放心嬉水啦！

菲斯特爾海灘嘅盡頭有好多間餐廳同酒吧，玩完去食餐飯、飲幾杯啤酒，先至最寫意。其中，Headland Hotel and Spa 俯瞰到海灘美景，實在美不勝收！

般尼茅夫 (Bournemouth) 坐擁英格蘭最正嘅海灘之一，寬闊而柔軟嘅黃金沙灘綿延 11 公里，仲屢獲殊榮添！英倫海峽嘅海水唔係話特別暖，但般尼茅夫勝在得天獨厚，擁有「小氣候」，形成全英國最溫暖嘅水域，

而且海灘活動數之不盡，有獨木舟、立漿划板等；創新休憩節目都唔少，例如高空滑索同攀岩就好值得一試。咁多嘢加埋一齊，難怪令呢個好玩又迷人嘅海灘勝地零舍有活力啦！

伍拉科姆海灘 (Woolacombe Beach) 廣闊到一望無際，潮退嗰陣，沙灘同天空好似連成一線咁，蔚為奇觀。呢個海灘深受一家大細同滑浪人士歡迎，仲設有獨立放狗專區，設備齊全，更衣室、當值救生員、餐廳、雪糕車樣樣有，就連充氣城堡都搵得到，難怪一到夏天就熱鬧起嚟啦！

而區內城鎮坐落喺環繞海灘嘅蒼翠山坡上面，氣氛寧靜。當你沿住海岸漫步到下一個岬角，仲會有更加多高低不平嘅海灣映入眼簾，例如康貝蓋特海灘 (Combesgate Beach) 同格倫塔海灘 (Grunta Beach)，都好好玩架！

惠特比 (Whitby) 係充滿樂趣嘅海濱小鎮，設有碼頭拱廊，風景怡人，仲有全英國數一數二嘅炸魚薯條食添！緊貼北約克郡沼澤國家公園 (North Yorkshire Moors) 邊緣海岸嘅惠特比村地方細細，勝在個性鮮明，

一年四季都適合到訪；之不過，除咗夏日旅遊旺季之外，北海 (North Sea) 一帶平時都幾凍架。鍾意曬太陽嘅話，惠特比海灘 (Whitby Beach) 盡頭嘅桑森德 (Sandsend) 村莊算得上係人氣之選；到咗夏天，如果你想體驗英國傳統嘅海灘活動，惠特比同附近地區就啱晒你，又有得騎驢，又有雪糕車同色彩繽紛嘅海灘小屋，氣氛一流。另一方面，惠特比海灘亦都係滑浪、放風箏同掘化石嘅好地方。

韋爾斯臨海海灘 (Wells-next-the-Sea Beach) 位於諾福克郡 (Norfolk)，面積寬闊，呈新月形狀，有參天松樹林立，仲有一排排沙灘小屋，夏天特別啱 Feel！而海灘後面有一個鳥類保護區，由朝到晚都會聽到雀仔喺度吱吱喳喳。北海 (North Sea) 出哂名天氣凍，但就係「泛舟海面」嘅寫意勝地；

小鎮裡面仲有個至今依然運作嘅漁港，鎮上好多餐廳供應嘅當地魚類同蟹，都係由當地漁夫捉返嚟架！如果你想離開海灘區幾個鐘，韋爾斯臨海小鎮都有唔少值得參觀嘅古老建築。同另一半度假，想悠閒 Hea 吓，又想認識歷史同文化，嚟呢個沙灘就啱晒喇！

班伯城堡海灘 (Bamburgh Beach) 係英格蘭北部崎嶇延綿嘅海岸，極具標誌性，仲有一座宏偉嘅諾曼 (Norman) 時代城堡聳立其上，堪比世外桃源，可以俾你暫避現代世界嘅煩囂，沿住海邊散吓步。海灘距離蘇格蘭邊界以南大約 32 公里，所屬嘅北海 (North Sea) 海域多數時間都好凍，但夏天喺度撐一陣艇，都冇問題嘅！海岸對開啲陣風就真係幾猛喇，吸引唔少人嚟呢度滑浪。

除咗喺海灘上面 Hea 吓之外，參觀班伯城堡附近地帶，都算係老少咸宜嘅活動，你可以從中認識到關於維京人 (Viking) 侵襲同埋蘇格蘭叛亂嘅故事，激盪人心。

懷特島 (Isle of Wight) 上面有 17 個藍旗 (Blue Flag) 海灘，海岸線超過 80 公里，一流沙灘數之不盡！呢個南部島嶼位於樸次茅夫 (Portsmouth) 海岸附近，係頂級海灘度假勝地，成座島只有 37 公里闊，要由一個沙灘跑去另一個，簡直話都冇咁易。

迷人海灘成群，我哋又淨係揀得一個，咁唯有揀文特諾海灘 (Ventnor Beach) 啦，皆因佢揉合咗柔軟細沙、洶湧海浪同合家歡娛樂活動等等嘅特點，又有唔少商舖同康樂設施，同時透現懷舊風味，保留舊日足跡。想搵地方落腳？海邊嘅維多利亞時代小鎮有唔少海景酒店同民宿，可以租住。

黑池 (Blackpool) 海灘主要由圓卵石組成，雖然唔算靚絕英格蘭，但喺「海邊遊樂勝地」領域肯定名列前茅，樂趣滿分！黑池碼頭 (Blackpool Pier) 係英國最正嘅碼頭之一，配搭黑池塔 (Blackpool Tower) 同遊樂海灘 (Pleasure Beach)，包保你嘅旅程絕無悶場。

你可以騎吓驢仔，玩吓燈光閃閃嘅街機，仲有歌舞表演幾十年如一日，魅力非凡。太陽落山後，黑池旋即變身「告別單身」Party 勝地，大家都會玩到通宵達旦。

如果你想反璞歸真，而且「不計路遙」，誠意推介你穿越哈特蘭摩斯國家公園 (Hartland Moors)，去多塞特郡嘅斯杜蘭灣 (Studland Bay) 玩返日。呢片新月形沙灘唔受風雨影響，同時得到國家信託基金會 (National Trust) 保護，梗係晉身全英格蘭最靚海灘之一啦！

海灘由北向南延伸超過 6 公里，滿足到旅客各種各樣嘅需求，南端有帆船俱樂部；北端比較僻靜，算係「天體」勝地；中間就有柔軟嘅黃金沙灘，最啱放鬆休息。而西南海岸小徑 (South West Coast Path) 沿住海灘延伸，好多人都鍾意喺呢度散步架！

斯杜蘭灣距離般尼茅夫 (Bournemouth) 海岸只有大約 13 公里，不過就要搭渡輪越過小海峽先去到，記得預鬆啲時間。

斯卡布羅 (Scarborough) 嘅南部灣海灘 (South Bay Beach) 喺英格蘭北部嘅人氣數一數二，皆因呢度水清沙幼，有遊樂中心，又有騎驢活動，仲有宏偉嘅大酒店 (Grand Hotel) 喺崖頂俯瞰海灘添！早喺維多利亞時代，度假客會搭懸崖纜車由酒店直達海灘，而呢個傳統特色仲保留至今。

每到陽光明媚嘅夏日，南部灣海灘嘅熱鬧同好玩程度旋即拍得上地中海任何一個海灘，唯一分別在於北海 (North Sea) 氣溫低幾度啫！幾百年嚟，呢個歷史悠久嘅海港都係斯卡布羅嘅命脈，漁民每日依然會帶住新鮮漁獲返嚟，一流海鮮餐廳亦都應運而生。