喺倫敦學習新事物嘅 6 個好地方

倫敦係歷史悠久嘅城市，市內每座博物館都會講述嚟自世界各地嘅故事。其中，大英博物館 (British Museum) 始建於 1753 年，坐落喺巨型玻璃屋頂建築群入面，係全球新舊文化嘅文物庫，

館內珍藏設計地道精美嘅埃及棺木、壯麗宏偉嘅羅馬遺跡同埋英國早期文物；仲有充滿傳奇色彩嘅羅塞塔石碑 (Rosetta Stone) 亦都不容錯過—就係佢幫科學家解讀失傳已久嘅古代語言架喇！

對於一眾藝術發燒友嚟講，無論你鍾意古怪嘅當代作品，定係舊時代嘅傑作，要行勻倫敦所有一流畫廊，冇返三幾日時間都搞唔掂！其中，國家美術館 (National Gallery) 立足於歷史悠久嘅特拉法加廣場 (Trafalgar Square)，被納爾遜勳爵 (Lord Nelson) 嘅雕像一直凝視住，而館內就收藏咗 2,300 幾幅驚世畫作。

行入展館，你可以為新古典主義石柱而驚艷，同時感受穹頂嘅宏偉氣勢；畫廊入口仲展出咗 13 世紀初藝術家塞尚 (Cezanne) 同梵高 (Van Gogh) 等歐洲大師嘅心血之作添！

無論你喺倫敦市中心邊度漫步，都一定會偶遇各式各樣嘅地標建築—喺河邊行吓，有聖保羅大教堂 (St Paul’s Cathedral) 映入眼簾；身處西敏寺 (Westminster)，就會見到白金漢宮 (Buckingham Palace) 喺正隔籬，名勝景點氣勢魁宏！其中，接近 1,000 年前落成嘅倫敦塔 (Tower of London) 絕對係歷史同諾曼 (Norman) 建築發燒友嘅必遊之地。

記得要去埋石砌城垛上面散個步，喺綠茵庭院睇黑烏鴉，同時參觀吓有兩排閃亮盔甲昂立嘅大廳。除此之外，白塔 (White Tower) 同樣不容錯過，佢係城堡入面最古老、最臭名昭著嘅一部分，塔內仲設有一座羅馬式小教堂添！

倫敦眼 (London Eye) 係一座巨型嘅銀白色摩天輪，喺 2000 年開幕，位於南岸 (South Bank) 嘅文化地帶，高達 135 米，直入雲端，宏偉壯麗，堪稱現代建築奇觀。

買飛之後，你就可以行入寬敞嘅橢圓形客艙，有 45 分鐘時間鳥瞰倫敦嘅天際線，呢種經歷勢必畢生難忘！

倫敦嘅劇院發展相當蓬勃，尤其係西區特別繽紛多彩；之不過，大部分遊客都會選擇湧哂去環球劇場 (Globe)，欣賞經典華麗嘅巴德 (Bard) 作品。莎士比亞環球劇場位於泰晤士 (Thames) 河畔，幾乎抄足哂圓形環球劇場 (Globe Theatre)，亦即係伊麗莎白時代嘅表演場地，而莎士比亞正正係喺嗰度向觀眾展出唔少戲劇作品架喇！

新一代環球劇場高度重視歷史細節，場地完全由堅固嘅英國橡木建成，擁有倫敦唯一嘅茅草屋頂，仲會舉辦燭光音樂會、現代戲劇作品表演，同埋梗係唔少得莎士比亞嘅神劇啦！

追求現代型格嘅潮人，好應該去倫敦市中心泰晤士河 (Thames) 晶亮水面南岸嘅泰特現代美術館 (Tate Modern) 朝聖！呢座展館坐落喺昔日嘅班克賽德發電站 (Bankside Power Station) 入面，佢嘅紅磚工業建築低調而隱約，館內展出咗「表現主義」、「超現實主義」同「抽象派」嘅藝術品，你仲可以欣賞到馬蒂斯 (Matisse) 同羅斯科 (Rothko) 等偉大藝術家、以至出色畫壇新星嘅作品添。