倫敦 12 大食品市場

波羅市場 (Borough Market) 係不容錯過嘅食品市集，深受當地人同遊客歡迎，自從 1756 年開幕以嚟，到而家都仲係以優質農產品同手工藝品而聞名遠近。喺市集行一圈，簡直係「感官爆炸」嘅體驗！場內充滿色彩繽紛嘅攤位，人群喧鬧聲不斷，加埋各種唔同氣味隨風飄散，可謂「色香味俱全」！波羅市場長年繁榮熱鬧，皆因每日都人頭湧湧。行到餓餓哋？不妨試吓 Mrs King's Pork 早於 1853 年就面世嘅愛心自家製凍批同熱餡餅；如果想食甜嘢，你仲可以去 Rabot 1745 大擦創意朱古力甜品添！

舊史比特市集 (Old Spitalfields Market) 已經喺你嘅必遊清單裡面？咁廚房美食廣場 (The Kitchens) 肯定令你更加有理由嚟呢度一遊再遊！呢個細市集位於比較大型嘅建築群入面，匯集咗倫敦最優秀嘅街頭美食餐廳，氣氛時尚精緻，嘢食又好味，正到冇得彈。咪睇呢度空間狹窄喎，其實開咗有成 10 間餐廳仔，全速奉上美食；而我哋嘅最愛就係 SOOD Family﹑Rök﹑Breddos Tacos﹑Berber & Q 同 Flank。仲唔揀返個心水檔口，又或者試勻哂咁多檔嘅名菜，放縱返一日？

世界各地旅客、當地 hippies 以至南倫敦 (South London) 嘅潮人，都紛紛嚟到格林威治市場 (Greenwich Market) 聚首一堂，皆因呢度同周邊區域一樣極具特色。格林威治市場位處多元文化社區，舊時曾經係泰晤士河 (Thames) 岸畔嘅古老村莊，歷史悠久；今時今日，場內有攤販專賣街頭食品﹑古董﹑手工藝品﹑復古時尚同珠寶，仲有各式各樣嘅美食，當中包括印度菜﹑埃塞俄比亞菜﹑日本菜同意大利菜等，任你試勻！每逢週末，小吃檔仲會擺埋落 Durnford 街，兼為食客提供露天枱凳。身處場內，不妨搵吓舊式打字機售貨亭喺邊—佢隔籬嘅壽司檔絕對不容錯過架！

馬爾特比街市 (Maltby Street Market) 係個靚到絕嘅市場，你嚟到實會瘋狂打卡啫！呢個市集喺鐵路拱門同一面面嘅彩旗下邊，感覺就好似遠離繁華倫敦嘅小村莊，雖然面積唔大，但勝在店家質素夠高，揀咩食都一樣咁好味，不妨漫步場內，行勻所有攤檔，試吓各式美食，兼同友善親切嘅店主傾吓計吖。一場嚟到，記得要食返個 Bad Brownie 嘅海鹽焦糖 Brownie 蛋糕，同埋佢哋嘅其他新款朱古力蛋糕喎；想暖吓身嘅話，仲可以去 Raclette Brothers 試食香腸配 raclette 芝士薯仔，襯埋上面嘅招牌煙肉麵包碎，滋味一流；想試新嘢？咁就要去 Dhan Waffle 試吓濃郁糖漿泡芙同窩夫喇！

埃克斯茅斯市場 (Exmouth Market) 坐落喺綠意盎然嘅鵝卵石「飛地」入面，巷仔兩端有一串串金黃色嘅童話燈光，中間嘅小店同 Café 古雅純樸，空氣中瀰漫住香料同香草嘅氣味，難怪吸引附近 Office 嘅後生上班族蜂擁而至，喺呢度食個 Lunch。埃克斯茅斯市場都算係快餐勝地，你可以買份滋味小食，坐喺長凳度慢慢嘆，一邊欣賞鐘樓迷人景色，食完之後再沿街 Window Shopping。講到市集嘅「大明星」，Ghanaian 加納攤檔絕對當之無愧—只要 GBP5，就可以食到一「細」碗燉飯加 2 個燉菜架喇！

Boxpark 位於肖爾迪奇 (Shoreditch)，係由貨櫃箱重新設計整成嘅食品零售園區，秉承肖爾迪奇嘅潮爆氛圍，吸引潮人嚟玩純屬意料之內。無論你係想食餐豐富啲，定係嘆少少零食配 Cocktail，Boxpark 都應有盡有。其中，Cottons Rhum Shack 嘅 Rum 酒選擇多達 250 款，而店家嘅牙買加烤雞串都好受歡迎；臨尾想食返個甜品，仲可以去 Dum Dums Donutterie 買件紅莓冬甩添！

布里克斯頓村市場 (Brixton Village Market) 同 Market Row 市場 (Market Row Market) 都坐落喺倫敦南部，分別設於兩個購物廊裡面，但就因為同樣滿載布里克斯頓嘅豐富文化歷史，所以緊密相連。呢兩個市集總共有 120 幾間獨立店舖，當中包括鼎鼎大名嘅 Franco Manca 同 Honest Burger，而兩者都係喺呢區發源嘅。另一方面，場內仲有好多間型格餐廳同 Café：Etta’s Seafood Kitchen 主打牙買加/歐洲 fusion 海鮮；Brixton Village Grill 就專門炮製煙燻葡萄牙烤肉，見到都流口水；再加埋多不勝數嘅加勒比一流餐廳同外賣店，你大把選擇，點會餓親？

百老匯市場 (Broadway Market) 坐落喺哈克尼 (Hackney) 嘅心臟地帶，連接倫敦菲爾德 (London Fields) 同麗晶運河(Regent's Canal)。喺陽光明媚嘅日子，唔同年齡段嘅人群都陶醉喺市場歡樂氣氛裡面，令場內充滿活力同歡笑。百老匯市場總共雲集 135 個攤位，有賣街頭食品﹑新鮮農產品﹑花卉﹑古著服裝﹑書籍﹑雜貨同咖啡等等，淨係星期六先做生意；至於其餘日子，你都可以去迷人 Café 同時尚精品店行吓嘅。想試啲特別嘢？咁就要去 Yorkshire Burritos 食返份 Sunday Roast 星期日限定墨西哥捲餅喇；其他值得一試嘅地道名物仲包括 Fin and Flounder 嘅蟹肉漢堡，同埋 Floris Bakery 嘅朱古力泡芙。

Flat Iron Square 籠罩喺碎片大廈 (The Shard) 嘅影子之下，係街頭餐飲同跳舞熱點。每逢週末，呢度嘅跳蚤市場有如雨後春筍咁冒出頭嚟，專賣古著服飾﹑相機﹑家庭用品﹑書籍等等。每日收工時間，廣場往往人流熙攘，無論係遊客定係後生上班族，都會嚟飲返杯、食個漢堡。街邊嘅攤位同美食車有各式國際佳餚出爐，例如 Baz Fred 嘅那不勒斯風格 Pizza、Manti by Mike + Ollie 嘅土耳其餃子等；到咗冬天，你仲可以去 Apres 冬季「滑雪木屋」，飲吓店家供應嘅熱雞尾酒，感受吓舒適氛圍添！

Mercato Metropolitano 位於 Elephant & Castle 工業區，主打休閒氣氛同意式美食，算得上係巨型美食廣場，肯定會令你留低深刻印象！呢度有 26 個美食檔，各式各樣嘅意大利食物都有得賣，當中包括新鮮 Pizza﹑意粉﹑什錦炸 (fritto misto) 同意大利炸飯波 (arancini)。意大利菜唔啱口味？唔使擔心，場內仲有土耳其菜﹑印度菜﹑墨西哥菜同黎巴嫩菜，任君選擇，而且，呢度環境好 Chill，一路食好嘢，一路睇靚景，極盡寫意！食飽飽喇，不妨去埋隱世 Backyard 戲院，喺仿真太空飛船上面，睇返套科幻電影吖；如果想運動吓，咁樓上瑜伽 Studio 就啱哂你。

KERB 主打 Yummy 街頭美食，以此為榮，亦希望大家都試得到佢哋嘅出品！通常，嚟 KERB 市集嘅人群都係上班族，午市同晚市最多人。倫敦市內總共有 5 個 KERB，又以帕丁頓 (Paddington) 同卡姆登 (Camden) 嘅兩個人氣最旺：喺每兩個星期舉行一次嘅帕丁頓市場上，你會試到 Anna Mae's 嘅芝士通心粉同埋 Cally Munchy 嘅惹味蕃茄大米飯 (jollof) 配豌豆；而卡姆登市場全個禮拜日日開放，不妨試吓 Oli Baba's 嘅哈羅米芝士炸薯條，又或者係 Bian Dong 嘅台式蒸包吖！

要數最出名嘅 Street Feast 市場，首推肖爾迪奇 (Shoreditch) 嘅 Dinerama！Street Feast 市集全部都設於又型又潮嘅地帶—其中，Dinerama 坐落喺舊解款貨車倉庫裡面，Lewisham 市場就選址喺 50 年代舊市集設立，憑藉出色嘅音響系統﹑搶眼嘅雞尾酒吧同天堂級街頭美食，為你帶嚟美好時光。無論你喺 Lunch Break 去 Woolwich 市場玩 (唔建議咁做，費事你未行過癮就要走)，定係去 Canary Wharf 食餃子，都肯定玩得開心 (仲可能會飲到宿醉添~)！