倫敦 12 大必試活動
倫敦有乜最出名？
倫敦嘅必試活動，展現出呢座城市無與倫比嘅光芒。貴為英國首都，倫敦擁有悠久歷史，同時又充滿創新活力。你可以喺博物館行幾個鐘、欣賞頂級表演藝術、去酒吧飲嘢，或者跟住歷史偉人嘅足跡漫步。如果你鍾意 Shopping，倫敦嘅市集同商場各適其適。
漫步喺知名街道上，你不時都會浮現「下個街角仲好玩」嘢感覺。想知我哋講緊乜？快啲睇下倫敦初到埗觀光指南。
倫敦有邊啲必試活動？
1. 白金漢宮
經典嘅建築，亦都係英國皇室嘅官方住宅
推介： 歷史文化, 拍照
白金漢宮自 1837 年以嚟，一直都係英國皇室嘅官方住所。無論你信唔信童話故事，參觀呢個全球僅存仍然使用中嘅皇宮之一，都係一次夢幻體驗。皇宮每年夏季開放十個禮拜，冬季同春季亦有特定日子對外開放，所以記得提早訂飛。
參加導賞團可以遊覽華麗嘅國事廳，欣賞珍貴嘅藝術品、精緻傢俬同舊日寶藏，重點包括華麗嘅大樓梯、寶座室、舞廳同埋喺翠綠嘅皇宮花園漫步。你可以選擇買花園專用飛，或者免費睇下著名嘅士兵換崗儀式。
位置： London SW1A 1AA, UK
電話： +44 (0)3031 237306
白金漢宮
2. 大笨鐘同國會大廈
泰晤士河上嘅哥德式地標
推介： 歷史文化, 拍照
哥德式嘅國會大廈係英國國會嘅所在地，而佢嘅經典鐘樓，即係大笨鐘，已經成為全球嘅時間標準超過一個世紀。大笨鐘嘅鐘聲幾乎同鐘樓本身一樣出名，全球各地都有人翻錄 Copy，難怪兩者同樣係倫敦歷久不衰嘅標誌。
由西敏站出發，你可以先好好欣賞國會廣場 (Parliament Square) 上面嘅雕像，再越過西敏橋 (Westminster Bridge)，以國會為背景，影返張經典自拍照「打卡」。過橋後繼續向前行，你就會去到南岸，欣賞到河岸對面嘅迷人市景。
位置： Westminster, London SW1A 0AA, UK
大笨鐘同國會大廈
3. 自然歷史博物館
真實嘅恐龍骨骼同月球岩石
推介： 家庭, 歷史文化, 拍照
自然歷史博物館介紹大自然由暴龍時代到現世嘅各種演變，會為你送上有趣嘅互動體驗！博物館結合恐龍骨骼真品同互動展覽，定格地球上面各種生命奇蹟，令每位遊客都對身處其中嘅世界多一份尊重，懷住敬畏嘅心情離開場館。
館內老少咸宜嘅精彩體驗數之不盡，最出名嘅就係地震模擬器，而地質展區仲珍藏住一塊真嘅月球岩石！建築本身比較似宏偉嘅大教堂，而唔多似博物館，最正嘅係，入場係免費嘅。
位置： Cromwell Rd, South Kensington, London SW7 5BD, UK
開放時間： 每日 10:00 至 17:30
電話： +44 (0)20 7942 5000
自然歷史博物館
4. 柯芬園
開始完美一日嘅好地方
推介： 家庭, 購物, 拍照
位於西區嘅柯芬園適合行路參觀，係一個理想嘅公共廣場，俾你感受到倫敦嘅活力。身處園內，街頭藝人施展渾身解數娛賓，餐廳就會喺廣場上架設室外座位，令到柯芬園滿載優悠氣氛。柯芬園市集有各式各樣嘅古董、手工藝品同新鮮農產品，任你買勻！
而柯芬園嘅食肆種類繁多，有知名連鎖餐廳、貴價 fine dining 餐廳，亦都有用微波爐「叮叮食品」嚟呃遊客嘅「黑店」，選擇多到你唔知點揀好。話雖如此，一邊悠閒咁飲杯嘢，一邊欣賞街頭表演，都算係賞心樂事嘅！想睇區內至靚景色？咁就要去 Punch & Judy 酒吧嘅露台坐吓啦。
位置： Covent Garden, London WC2E 8BE, UK
柯芬園
5. 牛津大街
高級百貨商場同街邊小檔
推介： 購物, 豪華住宿
牛津街係英國最好嘅購物街，雲集全國頂尖品牌嘅旗艦店，有 Selfridges 等等嘅高檔百貨公司進駐，亦有街邊小店，可以俾你買到檔次較低嘅平價手信。
如果你想全方位體驗呢個零售天堂，可以搭地鐵去托定咸宮路 (Tottenham Court Road) 站，沿住大街一路「血拚」到街尾嘅大理石拱門 (Marble Arch)。牛津圓環站位於牛津街中間位置，都幫到你認路架！想買「後生仔」時裝？咁就要兜一兜路，入去鼎鼎大名嘅卡爾納比街 (Carnaby Street) 啦。聖誕佳節前後，牛津街特別五光十色，有成千上萬嘅閃爍燈飾，同天馬行空嘅櫥窗陳列，令人目不暇給。
位置： 英國倫敦牛津街
牛津大街
6. 波羅市集
倫敦最繁忙嘅食品市場之一
推介： 美食, 伴侶, 家庭
波羅市集 (Borough Market) 美食包羅萬有，各式各樣嘅手工食品琳瑯滿目，用餐時間過嚟就最啱啦！舉凡香腸、烤肉、醃肉、貝類海產、新鮮出爐麵包，仲有你所認知嘅任何英國芝士 (另加好多款歐洲芝士)，通通都可以喺呢度搵到。波羅市集位於倫敦橋車站附近，相當易搵。
以市集嚟講，呢度嘅貨物價格偏高。不過，如果你唔怕「面懵」，周圍免費試食都夠食得飽嘅…只係，我哋就唔多建議咁做啦。
位置： 8 Southwark St, London SE1 1TL, UK
開放時間： 星期二至星期五 10:00 至 17:00，星期六 09:00 至 17:00，星期日 10:00 至 16:00 (星期一休息)
電話： +44 (0)20 7407 1002
波羅市集
7. 泰晤士河沿岸嘅河上巴士
倫敦風景
推介： 經濟實惠, 拍照
倫敦地鐵可能係最多遊客使用嘅交通工具，但係乘搭沿住泰晤士河行駛嘅水上巴士睇到嘅風景先至最靚，而且空氣仲更加清新！公共水上巴士 Thames Clippers 有幾條航線，沿泰晤士河航行，雖然評價唔及遊船，但勝在船飛平啲，感覺亦特別「貼地」。
如果你想搵沿河兩岸嘅最佳景點，建議你喺西敏上船，遊覽至塔橋落船。有 Oyster Card 嘅話 (講真…又點可以冇？)，仲可以獲享折扣優惠！
位置： Victoria Embankment, London SW1A 2JH, UK
泰晤士河沿岸嘅河上巴士
8. 史比特市集
最新嘅時尚同復古單品
推介： 購物, 美食
史比特市集 (Spitalfields Market) 以走在潮流尖端嘅時裝店同古董店聞名，全場氣氛勁正，每日營業，而到週末仲有倫敦最優秀嘅獨立設計師出動，售賣各種精選手工作品！場內各式各樣嘅時裝風格都有，既有印滿漫畫設計嘅女裝乾濕褸，亦都有「非洲風」嘅帽。史比特市集同倫敦東區嘅利物浦街站只係相隔幾步距離，方便易去。
史比特市集除咗係 Shopping 天堂，仲設有濕貨市場，俾你選購新鮮食材，又或者去種類繁多嘅特許經營餐廳醫吓肚都得。如果你想著住新買嘅潮衫「曬命一番」，可以行去埋附近嘅布里克巷 (Brick Lane) 同潮區肖迪奇 (Shoreditch)，吸引大眾眼球。
位置： 65 Brushfield St, London E1 6AA, UK
開放時間： 星期一至星期五 08:00 至 23:00；星期六至星期日 09:00 至 23:00
電話： +44 (0)20 7377 1496
史比特市集
9. 唐人街大門
倫敦唐人街入口
推介： 拍照, 經濟實惠
唐人街牌坊係倫敦著名唐人街嘅大門，而大門本身就係一個地標。大門以鮮艷嘅紅同金色裝飾，代表中國文化，拱門上面仲有精緻嘅中文字畫。
喺門口自拍之後，入到裡面就會見到條街上都係中國餐廳、雜貨店同埋紀念品店。如果你啱啱好喺一月或二月嚟到，記得睇下日曆留意吓幾時係中國新年。每年都有一次新年嘉年華，而舞龍表演真係一個不容錯過嘅景象。
位置： 16-17 Wardour St, London W1F 8AT, UK
唐人街大門
10. 碎片塔
喺倫敦一邊享受美酒佳餚，一邊欣賞壯麗城市全景
推介： 伴侶, 晚間娛樂, 豪華住宿
碎片塔 (The Shard) 樓高過千呎，外牆採用全玻璃建造，大廈形狀有如巨型冰柱，無論你身處倫敦邊一個位置，都一定會留意到佢。如果你冇入住到 34 樓到 52 樓嘅香格里拉酒店，不如考慮喺嗰度展開你嘅倫敦狂歡夜，享受美酒佳餚。呢個體驗定必相當難忘，你可以盡情欣賞到城市壯麗嘅天際景色，係開始你倫敦狂歡夜嘅完美地方。
喺眾多精緻華麗嘅餐廳同雞尾酒廊之中，Aqua Shard 係我哋首選嘅當代英式美食天堂。如果想喺臨瞓之前飲返杯，52 樓嘅 Gong 酒吧都唔錯㗎！
位置： 32 London Bridge St, London SE1 9SG, UK
電話： +44 (0)34 4499 7222
碎片塔
11. 倫敦西區
倫敦市中心劇院區
推介： 伴侶, 家庭, 晚間娛樂
倫敦西區 (West End) 堪稱「現場戲劇表演」嘅代名詞，尤其是音樂劇特別精彩。貴為全球首屈一指嘅表演藝術勝地，呢度上演嘅節目多不勝數，由《孤星淚 (Les Misérables)》之類歷久不衰嘅經典、最新鉅製，以至眾多由新銳藝術家創作嘅實驗劇場都有。
嚟到倫敦最受歡迎嘅劇場，大部分高級座位票價唔平，但係如果你靈活安排日程，都可以上網搵即時平飛嘅。識揀一定係揀閒日嘅日間場，買到靚位嘅機會大好多㗎！
倫敦西區
12. 塔橋
泰晤士河上嘅經典橋樑
推介： 拍照, 經濟實惠, 歷史文化
塔橋橫跨泰晤士河，連接住倫敦塔同市政廳。佢係一座開合橋，即係佢嘅中間部分可以向上升起，等較高嘅船隻可以通過。呢條橋可以同時比車輛同行人通過。呢度仲有一間博物館，俾你了解橋樑嘅運作方式，仲可以參觀維多利亞時代嘅機房。
千祈唔好錯過喺橋上高空行走，喺超過 40 米高嘅天橋上散步，俯瞰下方景色。喺呢度望落去嘅景色，絕對係倫敦最靚嘅景之一，亦係倫敦其中一個最精彩嘅活動。
位置： Tower Bridge Rd, London SE1 2UP, UK
開放時間： 每日 09:30 至 18:00
電話： +44 (0)20 7403 3761
塔橋
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。