倫敦嘅 5 大除夕活動

每年除夕，倫敦市中心都會舉行矚目嘅煙花大匯演，迎接新年，仲未睇過呢個煙火盛會，又點稱得上係嚟過倫敦歡度除夕呢？沿住維多利亞堤岸 (Victoria Embankment) 一直到西敏橋 (Westminster Bridge) 嘅夜空，煙花連珠爆發，場面何其璀璨！

如果你想感受最震撼嘅一刻，可以喺 RS Hispaniola Book 定張枱，一路望住對岸嘅倫敦眼 (London Eye)，一路嘆住美酒佳釀，將煙花盛放嘅難忘一幕刻入腦海。倫敦市政府網站會派發除夕盛會嘅門票，而且仲會公佈有關當晚嘅資訊添，記得留意喇！

同身邊摯愛歡度新年固然開心；想搞搞新意思，仲可以喺自然史博物館 (Natural History Museum) 近距離接觸獨一無二嘅動物，一齊迎接 2020 添！喺特選展廳入面，你會見到叢林貓、恐龍等唔同動物；而場內仲會提供雞尾酒同香檳招待遊客，俾你喺心愛動物嘅陪伴下慶祝除夕。

提早買飛有專享優惠添架，成人門票只需 GBP90，一張飛夠你玩盡所有精彩活動，當中包括除夕跨年 Party，你可以喺中庭大廳 (Hintze Hall)「放飛自我」，全晚盡情同嚟自南肯辛頓 (South Kensington) 至 Cute 嘅 Party Animal 狂歡熱舞。

想睇住聖保羅大教堂 (St Paul's) 嘅靚景、兼任飲雞尾酒歡度新年？咁就要去到滑鐵盧 (Waterloo) 唯一嘅天台酒吧 Bar Elba 玩返轉。想一路聽最悠揚嘅音樂，一路嘆最出名嘅特色小食，不妨坐特快專用升降機去河岸街 (The Strand) 嘅 Radio Rooftop Bar，過返個最啱你心水嘅除夕夜吖！

想喺都市中心搵綠州樂土？芬喬奇街 (Fenchurch Street) 高聳入雲嘅空中花園 (SkyGarden) 酒吧擺放咗好多青蔥嘅熱帶植物，仲睇到全市最靚嘅景色添，啱哂欣賞煙花盛放，留到 02:00 先盡興而歸！

想令除夕夜與別不同？不妨悉心扮靚靚，以 90 年代造型出席 Bounce 嘅活力之夜，打返場乒乓波，再聽住經典音樂跳舞吖！如果你想盛裝登場，又鍾意型格嘅場地裝修，Mews of Mayfair Masquerade 就啱晒你，一於喺最 Grand 嘅造型同環境下，迎接新一年啦！

仲決定唔到去邊間酒吧倒數？NYE Pub Crawl 會舉辦大型慶祝活動，夠你狂歡一晚。你仲可以參加埋 1 Big Night Out，同其他遊客組團一齊遊覽西區 (West End) 添！上述每個慶祝地點都有得免費影相，你嘅除夕夜一定又 High 又難忘。

想喺泰晤士河 (Thames) 度過精彩到爆嘅除夕？你可以登上遊船，泛舟河上，大嘆精美食物，睇住夜空綻放嘅煙花，享受零舍唔同嘅除夕夜！

無論你揀邊種套餐，都唔少得喺平靜嘅水面欣賞城市風光，飲住香檳慶祝，同摯愛望住水波粼粼，無憂無慮咁歡度一晚。