倫敦 16 大合家歡休閒活動

倫敦眼 (London Eye) 係一座巨型嘅銀白色摩天輪，喺 2000 年開幕，位於南岸 (South Bank) 嘅文化地帶，高達 135 米，直入雲端，宏偉壯麗，堪稱現代建築奇觀。

買飛之後，你就可以行入寬敞嘅橢圓形客艙，有 45 分鐘時間鳥瞰倫敦嘅天際線，呢種經歷勢必畢生難忘！

屋企小朋友想見吓碧咸、占士邦，甚至英女皇？杜莎夫人蠟像館 (Madame Tussauds) 就可以一次過滿足 N 個願望！呢間展館啱哂一家大細參觀，館內名人、歌手、英雄、歷史人物嘅蠟像模型栩栩如生，近至當紅明星、遠至差利卓別靈，都有喺度現身。

V&A 兒童博物館 (V&A Museum of Childhood) 展品琳琅滿目，包括 17 世紀嘅公仔屋，亦有 1950 年代嘅 Scalextric 玩具賽車，大人細路見到同樣 High 爆！館內遊樂設施都唔少，小朋友可以喺沙池嬉戲同騎木馬，大啲啲嘅細路哥就可以用磁石碎畫畫，各適其適。玩到餓餓哋？你自備野餐又得，坐喺 Café「擦餐勁」亦得。

倫敦地牢 (London Dungeon) 不設年齡限制，不過可能會嚇親細路仔囉…呢座生動好玩嘅博物館雖然陰森恐怖，但只要你夠大膽，實會喺恐懼同樂趣之間，得到完美平衡嘅體驗。倫敦地牢融合戲劇演員、活動舞台佈景同古怪遊樂設施於一身，演示主題包羅萬有，創意萬分，當中包括「V 煞」Guy Fawkes，亦有「魔街理髮師」Sweeney Todd，遊客有如親歷其境。

嚟到聖馬田教堂 (St Martin-in-the-Fields)，你可以試吓整中世紀青銅騎士或者五彩繽紛嘅「聖喬治與蛟龍 (St George and the Dragon)」，拎件獨一無二嘅作品返屋企。拓印中心仲擺滿咗尺寸、水平同用色各異嘅金屬蠟拓印複製品，琳瑯滿目！午餐時段，教堂大廳有免費音樂會，歡迎遊客細賞。

Benjamin Pollock’s Toyshop 迷你玩具專門店主打各式手工玩具，例如有隻公仔彈出嚟嗰款音樂盒、扯線木偶等等，而好多人都鍾意買傳統劇院紙模型返去做手信添！呢間玩具店位於熱鬧嘅柯芬園 (Covent Garden) 市集內，周圍有街頭劇場同 Café，仲有街頭藝人表演，相當好行。

ZSL 倫敦動物園 (ZSL London Zoo) 建於 1828 年，係世界上最古老嘅科學動物園，致力創造令人大開眼界嘅展品，帶領遊客見識大自然最叻最犀利嘅動物。你可以先帶小朋友行入「大猩猩王國 (Gorilla Kingdom)」，再穿過「熱帶雨林生態 (Rainforest Life)」室內展區，入去「老虎領地 (Tiger Territory)」，就有蘇門答臘斑紋虎喺嗰度迎接你哋架喇！

獨角獸劇院 (Unicorn Theatre) 位於倫敦，建構盡顯心思，全年都有節目上演，內容老少皆宜，日頭有講故事環節，亦都有為青少年而設嘅莎士比亞劇目，同埋特色木偶劇表演，啱哂一家大細。

唔講唔知—Hard Rock Café 其實係喺倫敦創立嘅；而呢間門店就秉承「崇美」傳統，有賣豐富好味嘅紐約三文治、食到你 Lam Lam 脷嘅炸雞，仲有各式「新鮮滾熱辣」嘅美式食品，小朋友一定滿足！至於熱愛音樂嘅爸爸媽媽，見到店內琳瑯滿目嘅搖滾樂紀念裝飾，一定「好滾動」，連仔女都話唔定會受到啟發添。

海德公園 (Hyde Park) 佔地廣闊，園內嘅九曲湖 (Serpentine Lake) 有艇仔同腳踏船出租，係暢玩戶外活動嘅好去處。夏季時分，你可以喺九曲湖游泳俱樂部 (Serpentine Swimming Club) 暢泳，嗰度仲有專為小朋友而設嘅嬉水池添！

漢普頓宮 (Hampton Court Palace) 庭園綠意盎然，走廊有如迷宮，行入去實蕩失路啫！園內音響裝置播放住柔和嘅聲音，包括「吱吱朕」嘅傾計聲、中世紀音樂選段，仲有咯咯笑聲，旋即帶大家返到去亨利八世 (Henry VIII) 嘅皇朝時代，感覺幾可亂真。

康登市集 (Camden Market) 位於運河邊，專賣另類時裝，有型爆 T 恤、Goth 時裝、Funky 靚鞋，簡直係後生仔至愛！而非洲面具同手工首飾攤檔遍佈室內嘅馬廄市集 (Stables Market)，裡面仲有小食檔，供應世界各地美食添。

登上開往格林威治 (Greenwich) 嘅無人駕駛地面列車，大人細路都會忍唔住坐喺前座，扮吓司機 (笑~)。船塢區輕軌鐵路 (Docklands Light Railway) 向東行駛，眨吓眼就去到金絲雀碼頭 (Canary Wharf) 嘅摩天大樓區，下一站就係格林威治。區內有個佔地廣闊嘅公園，而大名鼎鼎嘅子午線 (Meridian Line) 正正就係穿過呢片園林架喇！

沿住泰晤士河 (River Thames) Hea 吓，欣賞國會大廈 (Houses of Parliament) 嘅靚景，何其寫意！喺南岸嘅滑鐵盧碼頭 (Waterloo Pier) 同加布里埃爾碼頭 (Gabriel's Wharf) 之間，有各式各樣嘅合家歡餐廳同 Café 任你揀，一站式試勻 Pizza、新鮮三文治、意式熟食等等，你肯定唔會餓親。

Discover Children’s Story Centre (發現兒童故事中心) 專為 12 歲以下小朋友而設，用講故事、變裝打扮同「故事徑 (Story Trail)」嘅形式，鼓勵小朋友發揮想像力。每逢週末，呢度仲有更精彩嘅大型展覽同互動式冒險活動，一家大細可以即場參加。

食得太多漢堡包？係時候帶小朋友去 Masala Zone，試吓第二啲嘢！呢間正宗印度小型連鎖餐廳嘅員工親切，氣氛悠閒，菜式採用上等食材炮製，好啱細路仔食。店家主打款式繁多嘅印度經典菜同地方特色菜，正好幫小朋友開闊味蕾，另外亦有專為 7 歲以下細路仔而設嘅兒童餐單，價錢仲平啲添！