倫敦夏日 8 大型爆玩樂活動

呢個豐富街頭節日皆在歌頌加勒比文化，巡遊路線貫穿西倫敦 (West London) 好多個街區，算係歐洲最大型嘅街頭 Party，每年 8 月銀行假日週末舉行。想玩埋一份嘅話，你可以搭地鐵去韋斯特本公園 (Westbourne Park) 或者諾丁山門 (Notting Hill Gate)，然後再行去巡遊區，

一係企定定望住載咗鋼鼓樂隊、DJ 同成群 Dancers 嘅花車經過，一係跟住心儀花車一齊行。玩到餓喇，遍佈成條巡遊路線嘅美食車會為你奉上多姿多彩嘅加勒比海菜式，聞到都流口水！每年，呢場狂歡節都吸引幾百萬人參加，主要巡遊會喺星期一進行，而星期日通常都被認定為 Family Day。

海德公園 (Hyde Park) 嘅面積冠絕倫敦，一早已經成為倫敦人嘅夏日聚腳點，大家都會同親朋好友一齊嚟玩飛碟，一邊野餐，一邊享受怡人天氣。

除咗大型夏季音樂節 (例如 British Summer Time) 之外，呢度嘅其他休閒活動都唔少架，例如用大螢幕播放嘅夏季體育賽事同電影，仲有美食節等你參加添！

揀啱場景睇經典好戲，為故事情節增添「臨場感」不妨想像吓坐住艇仔喺湖上面睇《大白鯊》，又或者去墓園睇經典鬼片，係幾咁正呢！(唔使擔心，唔係淨得恐怖片揀嘅~)每年夏季，倫敦嘅特拉法加廣場 (Trafalgar Square)、海德公園 (Hyde Park)、泰晤士河 (River Thames) 上面嘅渡輪，以至市內大部分屋頂都會化身戶外戲院，上網就會搵到呢啲「快閃」活動嘅資訊架喇。

呢場花展由皇家園藝協會 (Royal Horticultural Society) 主辦，雲集全球最出色嘅園林設計師參賽，爭相建造最靚嘅花園，概念性作品年年創新，藝術感滿瀉，令人驚艷，仲有園藝建議同埋示範，涵蓋植物修復同保育，內容豐富！

花展場地位於切爾西皇家醫院 (Royal Hospital Chelsea) 地面，最近嘅地鐵站係斯隆廣場 (Sloane Square)。嚟到花展最後一日，唔少植物同花卉都會大平賣，鍾意講價嘅你又點可以錯過！

九曲湖 (Serpentine) 係海德公園 (Hyde Park) 入面最大型嘅人造湖，除咗可以玩一系列水上活動，湖裡面仲開設咗叫做「麗都 (Lido)」嘅游泳區，水面放滿哂浮標，係度過仲夏下晝嘅好地方。湖水由 3 個窿湧入嚟，每星期都會接受測試，確保水質乾淨清潔。

游咗一陣水，不妨坐喺日光躺椅上面 hea 返吓，去 Café 飲杯嘢，又或者帶小朋友去遊樂場玩吓吖；而湖嘅另一側仲可以撐艇添！

夏天喺倫敦室外劇院睇 Show，都係極具人氣嘅夜間活動嚟架！成個夏季，場內總共會演出 5 場戲，每晚一場，由莎士比亞歌劇以至兒童話劇都應有盡有，確切節目表同門票資訊可以喺網上搵到。露天劇院 (The Open Air Theatre) 位於攝政公園 (Regent’s Park)，設有專屬地鐵站。

一年一度嘅英國廣播公司舞會 (BBC Proms) 喺成個夏季持續 8 星期上演，以全倫敦嘅各式古典音樂場地為焦點，當中大部分 Show 嘅價格都相當合理，內容由全球最出色嘅管弦樂團表演、音樂劇配樂、到遠至非洲同加勒比海地區嘅環球音樂都一應俱全；而最大型嘅活動就會喺肯辛頓 (Kensington) 嘅皇家阿爾伯特音樂廳 (Royal Albert Hall) 舉行。