威尼斯 10 大親子活動

坐貢多拉遊覽威尼斯，固然係獨一無二嘅體驗；之但係，如果你淨係想同屋企人平平哋、hea hea 哋咁去欣賞大運河 (Grand Canal) 嘅話，慢速行駛嘅公共水上巴士 (vaporetto) 就可能更加啱你喇！

你可以任揀運河沿岸是但一個 ACTV 停靠點上船，而總站就位於安康 (Salute)。記得早啲去排隊，先可以揀返個前排露天座位架！一路向聖馬可廣場 (St Mark's Square) 進發，一路欣賞威尼斯數之不盡嘅重要宮殿同地標，極盡寫意。

「獅子口 (bocche dei leoni)」其實係雕刻成美杜莎 (Medusa) 女妖或者獅子頭形狀嘅石頭郵箱，曾經係公民挺身向威尼斯市政府舉報腐敗官員或者罪案嘅途徑之一，但就因而衍生猖獗嘅勒索行為，令到好多人被「未審先判」，面臨刑罰。

環顧威尼斯周圍，總督府 (Doge's Palace)、聖瑪爾定堂 (Church of San Martino) 同聖瑪利亞痛苦之母堂 (Santa Maria della Visitazione) 等嘅主要景點都有各種唔同款式嘅「獅子口」，不妨放隻手入去，擺 Pose 影張相吖！

威尼斯獅子 (The Lion of Venice) 係呢座城市同埋市內主保聖人聖馬可 (St Mark) 嘅象徵。喺聖馬可廣場 (Piazza San Marco) 嘅古老花崗岩柱頂上，你會見到一尊宏偉嘅青銅紀念碑，上面隻獅子有翼，攬住咗本聖經，形象鮮明；

而你仲可以帶小朋友行勻市內各處，再搵多啲有翼、冇翼嘅獅子，當係尋寶都好好玩架！有啲獅子像印咗喺隨風飄揚嘅旗幟上面，有啲刻喺噴泉四側，有啲就成為咗壯麗地標牆上嘅浮雕。

威尼斯面具嘅歷史可以追溯至 18 世紀，當時只有貴族 (尤其係女性) 先戴得，最經典嘅款式叫做「moretta」或者「muta」，會襯埋美輪美奐嘅威尼斯服裝一齊著。當時，面具唔係用嚟遮住女仔個樣，反而係化裝舞會同狂歡節慶嘅飾物，吸引眾人目光同注視，亦都因而漸漸演變成「誘惑面具」。

Ca'Macana 係多爾索杜羅區 (Dorsoduro) 內嘅一間好玩小店，保留咗威尼斯製作面具嘅傳統，仲有搞繪畫工作坊，俾你喺度創作屬於自己嘅彩色手信添！

威尼斯自然歷史博物館 (Museo di Storia Naturale di Venezia) 位於大運河 (Grand Canal) 南岸，十足一座宏偉宮殿，裡面珍藏咗各種各樣有關植物學、動物學、古生物學同人種學嘅展品，係一班威尼斯探險家 (包括馬可勃羅) 用咗幾個世紀時間收集架；

而館內仲有蝴蝶標本，同埋一比一尺寸嘅恐龍化石展覽，最得小朋友歡心。講到最具特色嘅館藏，絕非嚟自非洲嘅翼龍化石莫屬！

喺由大運河 (Grand Canal) 自然延伸出嚟嘅 Naviglio del Brenta 河岸上，皮薩尼別墅 (Villa Pisani) 係最碩大宏偉、最富麗堂皇嘅威尼斯別墅，呈現後巴洛克風格，宅內總共有 114 間客房，以前仲曾經接待過總督同到訪貴族添！

除咗遊覽裝飾咗雅緻壁畫嘅宴會廳、享受「時光倒流」嘅情懷之外，你仲可以探索修剪整齊嘅果園同溫室，挑戰裡面鼎鼎大名嘅樹籬迷宮—據講，就連拿破崙本人都試過喺迷宮盪失路，都咪話唔難行喎！

喺穆拉諾島 (Murano) 上，玻璃吹製傳統已經有幾百年歴史，孕育出「穆拉諾玻璃」呢種細膩精緻嘅藝術風格，不妨參加導賞團，參觀島上嘅玻璃吹製工場，了解藝術品幕後嘅製作過程吖！其中，Vetreria Artistica Colleoni 都係唔錯嘅選擇，

小朋友可以見證大師級工匠即席施展手藝，喺熾熱嘅熔融沙板上面極速吹製、切割同雕刻精美多彩嘅工藝品，肯定睇到目瞪口呆！由威尼斯搭穆拉諾直通水上巴士，只需 20 分鐘車程，就會嚟到穆拉諾。

Compagnia Arcieri del Leon 係威尼斯麗都 (Lido di Venezia) 嘅射箭學校，裡面設有室內同室外射擊場，課程專為 9 歲以上嘅初學者而設。

經過導師悉心指導，你將會學識點樣喺做足基本安全措施嘅情況下，利用現場提供嘅弓、箭同箭筒練習射箭。上完堂之後，你仲會獲頒參與證書添！

威尼托山丘 (Veneto Hills) 距離威尼斯潟湖 (Venetian Lagoon) 唔夠一個鐘頭車程，山上嘅純樸鄉村、以至威尼斯潟湖海岸本身都有好多適合騎馬嘅得意小徑。正因為咁，威尼托山丘開設咗一間又一間騎馬中心，帶領遊客去北方嘅貝盧諾多洛米提山脈 (Belluno Dolomites)，體驗騎馬樂趣；

而區內嘅威尼托馬術中心 (Equestrian Center Veneto) 等學校專為 4 歲或以上嘅小朋友而設，有別緻小巧嘅迷你馬同你玩遊戲。嚟到威尼斯麗都 (Lido di Venezia) 海岸，不妨去埋 Circolo Ippico Venezia Lido Amateur Sports Association，一邊練騎馬，一邊欣賞威尼斯潟湖平靜水域嘅景色吖！

威尼斯麗都 (Lido di Venezia) 係威尼斯東南面嘅一座小島，亦都係威尼斯潟湖 (Venetian Lagoon) 嘅「旱地」，但就一啲都唔 dry，反而有長達 12 公里嘅海峽沿岸，可以俾你盡情喺岸邊踩單車，又或者騎馬睇風景。由威尼斯搭水上巴士，輕輕鬆鬆就嚟到麗都。

麗都大部分範圍屬於自然保護區，有金色沙丘同茂密松樹林接壤，最啱曬吓日光浴、游吓水。溫馨提示：聖尼古洛 (San Nicolò) 同穆拉齊 (Murazzi；暱稱「藍月 (Bluemoon)」) 海灘冇硬性規定遊客著衫，你話唔定會見到「天體客」架！