8 大米蘭購物熱點

意大利嘅時裝中心地帶位於黃金四角 (Quadrilatero d'Oro) 一帶嘅街道，圍繞住蒙特拿破崙大街 (Via Montenapoleone)、斯皮加街 (Via della Spiga) 同聖安德烈街 (Via Sant'Andrea)，你可以喺度選購 Prada 淺口無帶鞋同 Gucci 女裝衫，櫥窗入面所有貨物都好似散發緊優雅嘅光芒咁，實會令你望到眼都唔眨！

埃馬努埃萊二世拱廊 (Galleria Vittorio Emanuele II) 擁有 19 世紀年代嘅雅致拱廊、華麗嘅馬賽克地板，配襯鋼鐵同玻璃建築，喺度掃貨真係一大享受！由米蘭主教座堂 (Duomo cathedral) 行過嚟，幾步路就到。你可以先去 Prada、Louis Vuitton 同 Dolce＆Gabbana 等等嘅名店 Shopping (就算淨睇唔買都夠爽)，然後再去畫廊酒吧坐吓，望吓遊人來來往往。

離開名牌中心，係時候去見識米蘭人最鍾意嘅街頭嘉年華—佢就係逢星期六架設嘅 Fiera di Sinigaglia 露天跳蚤市集喇！喺提契諾 (Ticinese) 運河區嘅大街行吓，你實會搵到又平又正嘅「獵物」，仲可以搜羅 70 年代復古風 Disco 上衣、南美針織品、CD、型格靚鞋、軍事裝備同舊漫畫書添。

Peck 食品店堪稱本土傳奇，放滿令人垂涎嘅美食，包括黑松露、香辣戈貢佐拉 (Gorgonzola)、托斯卡尼 (Tuscany) 火腿同埋一支支巴羅洛 (Barolo) 紅酒。喺熟食櫃枱前停低，仲有得試食，跟住再去上層飲杯咖啡，嘆返個芝士拼盤配搭各式甜品，聽見都流口水！

每年 1 月初至 2 月、同埋 7 至 8 月都係米蘭嘅減價旺季，要嚟掃平貨，就要及早 Book 定酒店喇！各式產品低至原價四折，仲唔係搜羅 Prada 高踭鞋同 Gucci 女裝嘅最佳時機？而布宜諾斯艾利斯大街 (Corso Buenos Aires) 被譽為米蘭最大型嘅購物街，記住嚟行吓喎。

都靈大街連接大教堂廣場 (Piazza Duomo) 同運河旁邊嘅提契諾 (Ticinese) 區，係「愛鞋一族」嘅天堂，由潮爆嘅「鬆糕鞋」到行走各種地形都啱著嘅遠足鞋，通通都買得到。沿住提契諾再向前行，你仲會見到一班工匠喺 Studio 縫製飾品同皮革製品添！

Spazio Armani 係 Georgia Armani 嘅多元概念店，位於優雅嘅曼佐尼街 (Via Manzoni)，佔地 6,000 平方米，設有時裝、飾物、鮮花同 Sony 高科技產品展廳。盡情 Shopping 之後，不妨去樓上嘅 Emporio Armani Cafè 飲杯醒胃酒或者咖啡，又或者喺日本 Nobu 餐廳訂枱食飯吖！全部店舖都喺同一座建築入面，方便到極。

如果你想買質地好、價錢公道嘅皮鞋、皮帶同手袋，咁就要去位於 Via Paolo Sarpi 附近嘅米蘭唐人街行吓！呢度係繁華嘅工業區，位於聖皮奧公園 (Parco Sempione) 北面，鄰近 Via Canonica 同 Via Rosmini 中心地帶，亦雲集玻璃、工藝品同禮品店。溫馨提示：星期六去會多啲嘢揀架！