有時，羅馬俾人嘅感覺就好似係全世界最大嘅露天博物館咁，市內嘅舊城區景色壯麗，坐擁好多古代建築地標，當中包括完整到嚇你一跳嘅羅馬競技場 (Colosseum)，同埋富麗堂皇嘅羅馬廣場 (Roman Forum)，被列為聯合國教科文組織世界文化遺產實至名歸；而建於意大利文藝復興時期、規模冠絕全球教堂嘅聖彼得大教堂 (St Peter's Basilica) 同屬建築傑作，你又點可以錯過？
不過，即使貴為風格鋪張嘅意大利首都，羅馬並冇貪戀過去，反而致力晉身國際化嘅現代大都會，開設前衛嘅當代美術館，夜生活不落俗套，時尚界獨當一面，仲係美食天堂添！身處貴境，你可以盡情品嚐酥脆炭燒 pizza，仲有勁 creamy 嘅自家製 gelato 意大利雪糕，大快朵頤。
