羅馬 11 大最好玩活動

一場嚟到羅馬 (Roman)，參觀市內地標、感受古蹟壯觀之勢，絕對係「指定動作」啦！羅馬廣場 (Roman Forum) 佔地 10 英畝，坐擁巨型柱廊林立嘅大教堂、優美嘅雕塑花園，同埋令人印象深刻嘅農神廟 (Temple of Saturn)；而羅馬鬥獸場 (The Colosseum) 距離呢度大約係 10 分鐘嘅步程，用攝位車 (Segway) 觀光都係唔錯嘅選擇。

你可以喺羅馬鬥獸場參加導賞團，由導遊帶你行入廣闊無邊嘅競技場，探索將道具同野獸運到致命戰場嘅活板門同通道。只要喺帕拉蒂尼山 (Palatine Hill) 買一張聯合套票 (大約 EUR12)，就可以直接入場參觀羅馬廣場同羅馬鬥獸場喇，唔使大排長龍！如果你嘅主要目標係體驗羅馬嘅獨特城市氣氛，建議你揀返間羅馬廣場附近嘅酒店落腳。

特雷維噴泉 (Trevi Fountain) 嘅闊度大約有 50 米，可謂世界上最華麗嘅噴泉之一，糅合好多座羅馬眾神、人魚海神同馬匹嘅雕像，設計極為壯觀。唔少人都會向許願池掟銀仔祈求好運，又或者同後面豪華嘅波利宮 (Palazzo Poli) 自拍一番。不過，嚟呢度朝聖之前，都仲可以漫步周圍嘅狹窄街道，探索羅馬數一數二嘅古樸街巷；

其中有啲街道仲遍佈唔少出色食肆同 Gelato 雪糕店添！沿住 Via di San Vincenzo 同 Via della Dataria 大街向前行，就會到達奎里納爾宮 (Quirinal Palace) 同奎里納萊廣場 (Piazza del Quirinale)，而後者擺放咗方尖碑同埋「卡斯托耳與波魯克斯 (Castor and Pollux)」噴泉，都好值得一遊架！

萬神殿 (The Pantheon) 係古羅馬 (Ancient Rome) 最出名嘅地標之一，至今仍然發揮住教堂嘅功能，外型似圓頂寺廟，以花崗岩建成，坐擁意大利最重要偉人嘅墳墓，當中包括文藝復興時期嘅畫家拉斐爾 (Raphael)。羅通達廣場 (Piazza della Rotonda) 正面有一座高達六米嘅方尖碑；爬到碑頂，萬神殿噴泉 (Fontana del Pantheon) 旋即一眼睇哂！

廣場仲定期有街頭音樂表演，啱哂散步閒逛，不過就記得要小心扒手。由鮮花廣場 (Campo de'Fiori) 經由 Corso Vittorio Emanuele II 行大約 10 分鐘，就嚟到萬神殿架喇！

羅馬角鬥士學校 (The Gladiator School of Rome) 獨樹一幟，喺正羅馬鬥獸場 (Colosseum) 附近，可以俾你報名參加歷時兩個鐘嘅「角鬥士訓練營」，以學生身分「回到過去」，學習古老劍術。你仲會著埋腰帶、束腰外衣、劍等嘅傳統服飾，體驗古羅馬時代嘅生活風情添，

不失為了解古代羅馬歷史嘅好玩活動。而且，大人細路都無任歡迎架！學校亦會安排格鬥表演，由辦學機構羅馬歷史小組 (Roman History Group) 嘅成員向大家示範招式。

納沃納廣場 (Piazza Navona) 係羅馬市中心最迷人嘅廣場，採用咗宏偉嘅巴洛克風格而建，日夜都有街頭藝人表演同攤販擺檔，氣氛相當熱鬧。其中，四河噴泉 (Fontana dei Quattro Fiumi) 係納沃納廣場上嘅矚目地標之一，由吉安·洛倫佐·貝尼尼 (Gian Lorenzo Bernini) 喺 1651 年雕刻而成；而廣場亦背靠聖阿涅塞教堂 (Chiesa di Sant'Agnese in Agone)，構成與別不同嘅如畫景致。

雖然呢度嘅餐點偏貴，但係食客可以置身地標靚景之中，亦不失為難忘嘅用餐體驗吖！由萬神殿 (Pantheon) 向西行大約 200 米，就會嚟到納沃納廣場。

梵蒂岡博物館 (Vatican Museums) 設有 50 幾個畫廊，珍藏咗達文西 (Da Vinci)、拉斐爾 (Raphael)、貝里尼 (Bellini)，提齊安諾維伽略 (Titian) 同卡拉瓦喬 (Caravaggio) 等藝術家嘅曠世傑作。行完博物館，不妨沿住皮奧克萊門蒂諾博物館 (Pio Clementino Museum) 內鼎鼎大名嘅 Bramante'double helix' 樓梯漫步，感受吓箇中嘅震憾氣勢。

每個月最後一個星期日，西斯廷教堂 (Sistine Chapel) 等等好多景點通常都會免費開放，而米開蘭基羅 (Michelangelo) 喺 16 世紀繪畫嘅天花板壁畫代表作就係喺呢度，當中嘅《創造亞當 (The Creation of Adam)》梗係不容錯過啦！另一方面，聖彼得大教堂 (Basilica di San Pietro) 喺正隔離，佢嘅圓頂碩大魁宏，高聳入雲嘅柱身上刻咗耶穌同 12 門徒嘅雕像；遇啱星期三，你仲可以喺教宗公開接見信眾嗰陣，親耳聽到佢嘅祝福添 (呢項活動需要門票，但費用全免)！

鮮花廣場 (Campo de' Fiori Market) 喺羅馬 (Rome) 名氣極大，由納沃納廣場 (Piazza Novana) 沿住 Via de'Baullari 大街行 5 分鐘就到。街道周圍非常熱鬧，開滿各式各樣嘅商舖、Cafe 同麵包店；行入廣場，你就會被無數新古典主義建築物所環繞，

場內度度都有賣家搭起帳篷，而正中間就擺放咗意大利哲學家 Giordano Bruno 嘅雕像。呢度賣嘅手信固然種類繁多，價格吸引，但其實大部分檔主都主打新鮮農產品；水果檔仲會賣啲即切生果添，絕對係最經典嘅觀光小食！

泰斯塔西奧 (Testaccio) 喺意大利全國新鮮農產品貿易領域上，擁有豐富歷史，區內飲食文化出色，坐擁唔少「住家菜」美食，仲係傳統內臟菜餚嘅發源地添！嚟到 Checchino dal 1887，你就可以試勻哂泰斯塔西奧 19 世紀嘅美酒佳餚。

另一方面，呢區嘅 Party 氣氛相當濃厚，現場音樂表演精彩，舞池成日爆滿，有機會不妨玩盡一間又一間 Disco—其中，Radio Londra 嘅駐場 DJ 會全晚為你熱播勁歌架！大部分舖頭都設有約 EUR10 嘅最低消費。

Les Etoiles 位於亞特蘭特星級酒店 (Atlante Star Hotel) 裡面，係一間極盡雅緻嘅頂樓花園露台兼酒廊，距離聖彼得廣場 (St. Peter's Square) 大約 7 分鐘步程。你可以攤喺店內嘅梳化度，嘆杯苦艾開胃酒 (Aperitivo) 或者 Cocktail，全方位欣賞羅馬 (Rome) 遼闊市貌，搵吓聖彼得大教堂 (St. Peter’s Basilica) 嘅巨型圓頂，將隱約可見嘅絢麗花田盡收眼底。想順道食餐飯？不妨喺樓下嘅餐廳試吓三道菜晚餐，配埋葡萄酒都只需 EUR70 咋！

羅馬 (Rome) 嘅 Pizza 種類繁多，每間 Pizza 店嘅麵團配方都有啲唔同，唯一不變嘅特點，就係喺麵團度加入橄欖油，令佢變得更香脆，同時風味十足！

想一試「羅馬風」Pizza，去 Campo de'Fiori 係唔錯嘅選擇，而大家一般都會叫呢間 Pizza 店做 Forno Campo de'Fiori 或者 Antico Forno Roscioli。講到羅馬嘅餐飲同夜生活熱點，梗係要數泰斯塔西奧 (Testaccio) 啦！嗰度有唔少高檔 Pizza「老字號」，而主打炭火製作餐點嘅 Da Remo 就係例子之一。

仲未試過手工製 Gelato 雪糕，又點可以離開羅馬 (Rome)？羅馬嘅 Gelato 雪糕界競爭激烈，所以雪糕店紛紛推陳出新，創新口味同配方層出不窮。炎炎夏日，Gelato 人氣爆燈，有啲款式會混合蜂蜜、異國熱帶水果、玫瑰花瓣，甚至意大利葡萄酒，創意爆棚！

行勻羅馬市內每個角落、以至特雷維噴泉 (Trevi Fountain) 等知名地標，周圍都會搵到賣 Gelato 雪糕嘅地方，其中名氣最大嘅雪糕店包括 Il Dolce Sorriso、Fatamorgana、dell'Angeletto、San Lorenzo 同 Grom，分店遍佈全市。