羅馬 8 大家庭休閒活動

羅馬鬥獸場 (Colosseum) 係羅馬 No. One 歷史古蹟，啱哂你帶埋小朋友遊覽，一齊想像吓古羅馬嘅生活風情！呢座圓形劇場宏偉壯闊，有提供導賞服務，包括專門為小朋友而設嘅導賞團，以引人入勝嘅故事形式，帶遊客穿越偌大鬥獸場裡面嘅活板門同通道，細路仔一定會大讚得意。講真，身為現代人，竟然可以踏足真正角鬥士喺幾個世紀之前行過嘅通道，感受佢哋英勇應戰嘅決心，無論咩年紀嘅人都會覺得興奮啦！

呢間獨一無二嘅學校簡直係你體驗成為角鬥士嘅必遊聖地！角鬥士學校 (Gladiator School) 喺正羅馬鬥獸場 (Colosseum) 旁邊，有開辦歷時兩個鐘嘅「新手訓練營」，帶你感受戰鬥嘅滋味—著好傳統長袍、束好腰帶之後，身為羅馬歷史小組 (Roman History Group) 成員嘅資深角鬥士導師就會為你示範古代戰鬥技術，內容包括揮劍比武，同埋善用其他各式各樣嘅古代武器擋招，都不失為認識古羅馬歷史嘅好玩活動架！

賈尼科洛山 (Gianicolo/Janiculum) 嘅觀景台出哂名可以遠眺台伯河 (Tiber) 同梵蒂岡嘅全景，不妨帶屋企人行吓山上嘅 Spotlight 景點—加里波第廣場 (Piazzale Garibaldi) 吖！講到最吸引小朋友嘅地方，肯定就係賈尼科洛木偶劇院 (Teatrino di Pulcinella) 喇，佢喺正旋轉木馬旁邊，每逢週末通常都有 Show 睇，雖然用意大利文演出，但係 Punch & Judy 靠動作傳達嘅打鬧喜劇已經夠哂搞笑，足以引發全場笑場雷動！

呢個「5D」體驗超級好玩，會帶你經歷一趟多感官視聽之旅！羅馬時光穿梭機 (Time Elevator Roma) 主打羅穆路斯 (Romus) 同雷穆斯時代 (Romulus) 嘅古羅馬「穿越」旅程，可以俾你親眼見證呢個古代帝國嘅發展、衰落，以至今日嘅境況。快啲戴好立體 3D 眼鏡，扣埋櫈上面嘅安全帶喇，因為張櫈會喺寬屏螢幕前面隨住場景移動架！喺呢節 45 分鐘嘅節目入面，你仲會感受到疾風同水花添，像真度極高。成人門票要大約 EUR12，兒童門票就索價 EUR9。

喺羅馬行咗咁耐、去咗咁多個歷史觀光景點，年紀比較細嘅小朋友不妨嚟呢座博物館唞唞，喺互動環境之中學吓嘢又玩吓吖！由人民廣場 (Piazza del Popolo) 出發，行一陣就會搵到 Explora，館內嘅活動各式各樣，包括高空飛索、用呔盤同控制桿操縱水流嘅設施，同埋縮細版雜貨舖，啱哂細路哥玩煮飯仔；而逢星期日通常都有烹飪班開辦，每位小朋友嘅票價大概係 EUR10。

漫步羅馬街頭，你會發現其實周圍有好多流浪貓經過；於是乎，羅馬政府喺 1991 年制訂咗一條保護城內貓貓嘅政策，愛心爆棚！如果想好好探索羅馬嘅貓貓社區，不妨去銀塔廣場 (Largo di Torre Argentina) 一遊吖！呢個貓貓收容所位於古廟遺址之中，市內義工定期會嚟照顧啲貓仔；而唔同毛色嘅貓貓喺羅馬高柱上面玩，又或者喺大理石雕像度瞓覺，可愛到暈啊~~而且，佢哋統統都可以領養，當地人真係幸福喇！

由羅馬市中心向南揸半個鐘車，就會嚟到 EurPark，園內有兩條環道路線，為一家大細送上戶外歷險體驗。其中，歷險區 (Adventure Area) 入面有懸掛喺樹幹之間嘅樹頂障礙物，另加 4 面攀岩牆同一個射箭場，仲有休閒區，俾爸爸媽媽睇住小朋友傾力完成各項挑戰嘅得意樣。而第二條環道叫能量區 (Energy Area)，專為刺激戶外運動而設，裡面有啲活動超級搞笑，例如充氣人肉足球就係例子之一。全日票價大概 EUR30。

兄弟姊妹唔使日鬥夜鬥喇，有咩「恩怨」就去 Kart Roma 嘅高卡車賽道解決啦 (笑~)！由羅馬市中心向西南揸 45 分鐘車，就會嚟到呢個高卡車賽場，都算係市區觀光以外嘅另一個好選擇，你可以喺度磨練賽車技巧，同時感受速度快感。如果你係高卡車新手，Kart Roma 仲有賽車學校俾你學吓基本功；不過，對於本身識得揸車嘅人嚟講，要「舞掂」呢啲靈活嘅車仔，簡直 Easy Job 啦！旁觀比賽又或者等緊落場，不妨去場內餐廳試吓意式家常菜吖。