羅馬最佳購物區

身處羅馬舊城中心，你可以寫意遊覽蜿蜒曲折嘅街道，行勻一間接一間商舖！嚟到科羅納里大街 (Via dei Coronari)，羅馬風嘅手工藝品、古董同翻新傢俱琳瑯滿目；戈韋諾維奇歐大街 (Via del Governo Vecchio) 嘅精品店主打型格古著、特色茶飲同手工珠寶；而擁有幾百年歷史嘅鮮花廣場 (Campo de' Fiori) 就專賣新鮮農產品，任你體驗當地人嘅生活日常—其中，Forno 麵包店散發陣陣誘人香氣，絕對會令你忍唔住停低腳步，一試新鮮出爐嘅 Pizza！

科爾索大道 (Via del Corso) 由威尼斯廣場 (Piazza Venezia) 一路延伸至人民廣場 (Piazza del Popolo)，雲集 H&M、Gap 同 Swarovski 等知名連鎖品牌門店；而喺科爾索大道同西班牙廣場 (Piazza di Spagna) 之間，仲有唔少型格街巷，開滿設計師名店、高檔時裝店同餐廳。西班牙階梯 (Spanish Steps) 最底層嘅康多提大街 (Via Condotti) 可謂奢侈品朝聖地；波爾哥尼奧納大街 (Via Borgognona) 就透現優雅高貴氣息，街上深受法國人推崇嘅 Ladurée 同 Fratelli Rossetti 豪華鞋店都吸引唔少遊人駐足參觀架！

科拉迪里恩佐大街 (Via Cola di Rienzo) 係普拉蒂 (Prati) 嘅「血拚」殿堂，更加係 Zara、United Colors of Benetton 及 Geox 等多個知名品牌嘅發源地。行到餓餓哋？Castroni 主打自家製特色意大利 espresso，仲配備木砌吧枱，為顧客奉上世界各地嘅美食、飲品同調味料。飲飽食醉，繼續 Shopping—羅馬最大型、經營歷史最悠久嘅 Trionfale 市場攤檔林立，有販賣新鮮農產品、進口商品等，貨色豐富！

每逢星期日，波特賽門 (Porta Portese) 嘅街道都會結集成羅馬最大型嘅戶外市場，有古著新衫、亞麻布料、家居用品等各款商品，任你親身發掘！如果你鍾情古董，仲可以喺特拉斯提弗列 (Trastevere) 入口附近行下，話唔定會物色到水晶吊燈、木椅同裱框畫等心頭好。波特賽門跳蚤市場人氣爆燈，有興趣「搜掠」一番嘅話，不妨早啲嚟到。溫馨提示：市場地方，難免混雜不法之徒，要小心睇實個人財物啊！

想選購價廉物美嘅心頭好？羅馬每年兩度舉行嘅購物節一定會令你熱血沸騰！第一波購物節由 1 月上旬延續至 2 月下旬；而第二浪就喺 7 月至 8 月中旬上演。屆時，各大店舖都會促銷劈價，奢侈鞋類、衫褲同家居用品折扣驚人；而科拉迪里恩佐大街 (Via Cola di Rienzo) 同科爾索大道 (Via del Corso) 都係購物節嘅熱門「血拚」戰場！一般嚟講，商店日常營業時間為 13:00 至 17:00，但係主要旅遊區有唔少店舖都會開足 24 個鐘，全日無休。