羅馬 4 大最佳特賣場

如果你搵緊匯聚多國時裝品牌嘅一站式好去處，咁 Castel Romano Designer Outlet 就會係旅程嘅好開始！呢個大型露天商場雲集超多間折扣店，亦有好多長櫈同櫈仔，俾你喺「血拚」過程中歇一歇腳。

場內雖然冇 Prada 同 Gucci 之類嘅意大利頂尖名牌，但係 Versace、Hugo Boss、Burberry、Levi’s 同 Tommy Hilfiger 咁嘅一般大牌子都應有盡有，同場加映 Nike 同 Adidas 等等嘅國際體育品牌門市，都夠哂好行啦！Castel Romano 距離羅馬市中心以南大概 45 分鐘車程。

由羅馬市中心向東揸 45 分鐘車去到遠郊，你就可以喺呢個大型購物中心行足一日喇！Valmontone Outlet 設有寬敞嘅購物廣場，開滿大約 180 間名牌店，以季節性折扣出售人氣產品，當中嘅國際知名品牌都唔少，例如 Calvin Klein 同 United Colors of Benneton 咁，同你可能聞所未聞、但又值得一睇嘅意大利優質時裝牌子相映成趣。

除咗 Shopping，小朋友仲可以去埋隔籬嘅 Rainbow Magicland 遊樂場，玩刺激過山車同其他機動遊戲添！

Gente Roma 旗艦店坐落喺 Via Cola di Rienzo 同 Via Sila 嘅交匯處，距離梵蒂岡博物館 (Vatican Museums) 以東大約 10 分鐘步程，自 1981 年以嚟一直屹立，歷年雲集咗 Alexander McQueen、Saint Laurent、Givenchy、Prada 同 Gucci 等等眾多頂級設計師品牌，

貨色大多數都啱女仔，有鞋、袋、珠寶以至各種各樣嘅配飾任你襯，俾你一站式搵齊各個設計師系列至潮至正嘅當季產品。每年 1 月同 7 月左右，Gente Roma 嘅正版名牌貨仲會有瘋狂 Discount，你又點可以錯過？

羅馬嘅 Vestiti Usati Cinzia 係特色設計師品牌折扣店，專賣二手優質產品，俾平價名牌時裝「重獲新生」！呢間舗頭位於 Via del Governo Vecchio，由納沃納廣場 (Piazza Novana) 行幾步就到，場內雲集羅馬最時尚嘅復古服飾。

其中，Cinzia 嘅服裝設計師兼老闆將各個時裝品牌過季系列嘅原創產品拼埋一齊，同新貨同場陳列，打造出最新潮流，方便你根據個人品味，Mix and Match 出唔同造型。