維羅納 8 大最好玩活動

布拉廣場 (Piazza Bra) 嘅規模冠絕維羅納 (Verona)，係市內嘅中央公園，坐擁茂密嘅花園同挺直嘅大樹，仲有一座噴泉，同埋「意大利國父」國王維托里奧·埃馬努埃萊二世 (Vittorio Emanuele II) 嘅雕像。不妨搵個位坐低，慢慢欣賞維羅納嘅壯麗建築物同歷史地標吖！廣場背靠氣勢磅礡嘅維羅納圓形競技場 (Verona Arena)，同時亦都鄰近維羅納市政廳 (Palazzo Barbieri)，記得去埋西北一帶設有露天茶座嘅典雅 Café，一邊嘆杯靚咖啡，一邊飽覽無敵靚景喎。

維羅納圓形競技場 (Verona Arena) 係羅馬帝國最大型嘅圓形劇場之一，喺正布拉廣場 (Piazza Bra) 隔籬，建於一世紀，宏偉碩大，到而家仲有上演大型歌劇，當中大部分都係夜晚演出嘅。想喺日頭參觀維羅納圓形競技場？只要俾大約 EUR10，你就可以入場飽覽佢嘅建築特色，順便 Check 埋最新節目表，即日買飛都仲得！石階上嘅觀眾席票價大約 EUR18；而競技場中間有背墊嘅座位會舒服啲，票價最高可以去到足足 EUR226。

馬齊尼大街 (Via Mazzini) 由大理石鋪成，係一條狹窄嘅步行街，連接維羅納 (Verona) 兩個主要廣場：布拉廣場 (Piazza Bra) 同百草廣場 (Piazza delle Erbe)，可以俾你順道去勻兩度。呢條街全長半公里，同時亦係維羅納嘅主要購物勝地，開滿一排排時尚專門店同精品店，有售 Gucci、Zara、Swarovski、Stradivarius 同 Michael Kors 呢類名牌時裝同首飾。無論買唔買到「戰利品」都好，一定要去馬齊尼大街行番轉，先可以話自己嚟過維羅納架！行到馬齊尼大街盡頭，你仲會搵到茱麗葉故居 (Juliet's House) 添。

百草廣場 (Piazza delle Erbe) 係維羅納 (Verona) 最主要嘅市鎮廣場，距離新門 (Porta Nuova) 火車站大約 10 分鐘的士車程。要數全場最矚目嘅焦點，莫過於裡面一座 14 世紀嘅維羅納聖母雕像同噴泉！呢兩座地標俾好多座古老嘅多層建築物環抱，體現咗維羅納嘅歷史魅力同城鎮生活面貌。廣場上亦都開咗唔少意大利餐館 (osterias) 同酒吧，當中有啲設有露天雅座，你可以坐低嗌杯咖啡、啤酒或者 Gelato 雪糕，一路望住人來人往嘅街道，一路享受人生。唔講唔知—百草廣場仲係好受歡迎嘅購物勝地嚟架！喺設計師帽飾名牌 Borsalino 專門店前面，架設咗一系列嘅帳篷攤位，一眾「購物狂」記得要嚟掃平貨喇。

蘭貝爾堤塔 (Torre dei Lamberti) 大約有 84 米高，堪稱維羅納 (Verona) 最高嘅塔樓之一，可以俯瞰百草廣場 (Piazza delle Erbe)。呢座 12 世紀塔樓中間有個巨型時鐘，上面有兩個古老鐘鈴，其中一個每小時敲響一次。只要俾大約 EUR6，你就可以入場參觀隔籬嘅理性宮 (Palazzo della Ragione)，之後沿住迴形樓梯攀登蘭貝爾堤塔；雖然攻頂要行成二百幾級樓梯，但居高臨下嘅靚景非常震撼，幾辛苦都值得！不過，如果你行程緊迫，都可以改搭電梯嘅。

茱麗葉故居 (Juliet’s House) 重現莎士比亞經典名著《羅密歐與朱麗葉》裡面露台情深嘅一幕，帶你走入文學大師嘅浪漫悲劇世界！由百草廣場 (Piazza delle Erbe) 沿住卡佩羅大街 (Via Capello) 向東南行幾分鐘，就會嚟到茱麗葉故居。大多數人一抵達呢座 13 世紀哥德式房屋，都會湧去屋外嘅庭院，爭住同茱麗葉青銅雕像合照；有啲人亦會摸吓雕像，希望好運同愛情降臨。難得一場嚟到，梗係要親身參觀埋博物館 (入場費約 EUR6)，重憶羅密歐與朱麗葉嘅動人愛情故事啦—你仲會有機會扮演朱麗葉，企喺大名鼎鼎嘅石露台上面添！

羅馬劇院 (Teatro Romano) 係個一世紀露天劇院嘅遺址，歷史仲耐過維羅納圓形競技場 (Verona Arena)，但至今仍然保存得好好，仲會定期舉辦夏季音樂會添！呢個圓形劇場坐落於阿迪傑河 (Adige) 東岸嘅山坡上，山頂有座專門珍藏古羅馬文物嘅考古博物館，館外嘅小庭院遠眺對面河岸維羅納嘅城市風光，入場費由 EUR1 起。如果想更加「居高臨下」咁睇盡靚景，不妨由羅馬劇院行樓梯上去聖彼得城堡廣場 (Piazzale Castel San Pietro castle) 吖！唔想行到「氣來氣喘」，都可以搭纜車上去，車費大約 EUR2。

Terrace Bar Al Ponte 係維羅納嘅一流河畔酒吧，坐擁佩雅托橋 (Ponte Pietra) 嘅醉人美景。參觀完羅馬劇院 (Roman Theatre)、又或者去維羅納圓形競技場 (Verona Arena) 睇完歌劇之後，嚟呢度 hea 吓就最好不過。之不過，呢間舖頭地方有限，露台亦都略嫌狹窄，嚟之前記得要 Book 定位先！入黑之後，Terrace Bar al Ponte 搖身一變，成為情侶拍拖嘅浪漫場地，你可以帶埋另一半嚟，喺潺潺水聲同璀璨燈光嘅襯托下，品嚐特色橙味開胃酒 Aperol Spritz 同西班牙惹味 Tapas 小食。