佛羅倫斯 11 大最好玩嘅活動

大教堂廣場 (Piazza Del Duomo) 係佛羅倫斯嘅主要公共廣場，以聖母百花聖殿 (Santa Maria del Fiore cathedral) 為中心地標，場內行人如鯽，有時尚餐廳同店舖林立喺保存完好嘅文藝復興風格建築物之間，第一眼就會帶俾你新舊融合嘅寫意感覺。大教堂嘅哥德式前廳飾有 3 個巨型青銅門，門簾仲鑲咗彩色大理石同浮雕，美輪美奐；入到教堂裡面，精美嘅馬賽克裝飾琳瑯滿目，令人嘆為觀止。教堂入場費全免。

喬托鐘樓 (Giotto’s Campanile) 位於主教座堂 (Duomo) 旁邊，亦係佛羅倫斯天際線上最高聳嘅歷史建築之一，同隔籬嘅大教堂完美相襯，展現出佛羅倫斯最蔚為奇觀嘅哥德式建築典範。呢座鐘樓以亮白色為主調，中部以下嘅四面牆全部飾有數之不盡嘅雕塑，繽紛悅目。大多數遊客嚟到主教座堂，都會預鬆少少時間 (同埋帶定 EUR15 入場費)，爬到 84 米高嘅塔頂，將市內全景盡收眼底。由塔底到塔頂，中間有成 400 級樓梯—不過，行到半路都仲可以留步 3 個中層，一路唞啖氣，一路睇靚景嘅！

老橋 (Ponte Vecchio) 係佛羅倫斯最古老嘅橋樑之一，橫跨阿諾河 (Arno)，連接城市兩半。企喺西邊嘅聖三一橋 (Saint Trinity Bridge) 上面，老橋如畫似詩嘅景色旋即盡收眼底；橫過老橋，沿路有唔少珠寶鐘錶小店，全日都人頭湧湧，衰在商品一般針對遊客定價，有少少「離地」。唔講唔知：老橋其實係你踏足佛羅倫斯市中心共和國廣場 (Piazza della Repubblica) 同阿諾河南岸皮蒂廣場 (Piazza dei Pitti) 嘅主要通道嚟架！

米開朗基羅廣場 (Piazzale Michelangelo) 係建於 19 世紀嘅山頂廣場，可以遠眺阿諾河對岸嘅佛羅倫斯全景。廣場中央，米開朗基羅全尺寸青銅雕塑複製品《大衛 (David)》面向城市昂立，而原作就喺市中心學院美術館 (Galleria dell'Accademia) 展出。由朱塞佩·波吉廣場 (Piazza Giuseppe Poggi) 一路行上波吉樓梯 (Poggi's Ramp)，又或者沿住綠樹成蔭嘅米開朗基羅大道 (Viale Michelangiolo) 揸車，由市中心出發，大約 15 分鐘就會嚟到米開朗基羅廣場，可以免費入場參觀。

新聖母瑪利亞大教堂 (Santa Maria Novella) 建於 15 世紀，係佛羅倫斯最扣人心弦嘅哥德式教堂之一，立面設計完美展現意式哥德建築風格，牆身主要以大理石建成，綠白相間，色彩鮮艷。要參觀呢座宏偉嘅大教堂，入場費只需要 EUR7.50 起。行入中央拱門，有更多繽紛色彩映入眼簾，而你仲可以欣賞到意大利知名藝術家嘅傑作—當中最享負盛名嘅作品，肯定要數出自馬薩其奧 (Masaccio) 手筆嘅《聖三位一體 (Trinity)》。唔講唔知—有評論認為新聖母瑪利亞大教堂嘅壁畫裝飾遠勝主教座堂 (Duomo) 添架！

如果你已經玩轉佛羅倫斯中央都會，咁奧爾特拉諾區 (Oltrarno Quarter) 就係你必到嘅下一站！呢區除咗被視為佛羅倫斯最靚地帶，亦都係歷史文化搖籃，蘊藏住佛羅倫斯最瑰麗宏偉嘅古蹟，當中包括美輪美奐嘅彼提宮 (Palazzo Pitti) 同埋附近相連嘅波波里花園 (Boboli Gardens)，由米開朗基羅廣場 (Piazzale Michelangelo) 出發，向西揸車大約 15 分鐘就到。你可以橫過老橋 (Ponte Vecchio) 等等幾座地標大橋，嚟到奧爾特拉諾區；而大部分路段都有綠樹遮陰，沿路散步都咪話唔寫意！

嚟到佛羅倫斯，點可以唔食返杯馳名意式 Gelato 雪糕？之但係，要搵款至夾你嘅心水雪糕，都唔係咁易架，皆因每間雪糕店都有獨家口味，問你點揀！除咗雪糕之外，舖頭入面仲有得買質素無與倫比嘅 expresso 特濃咖啡。講你都唔信—市內最出色嘅 Gelato 雪糕店，大多數竟然唔係位於佛羅倫斯嘅主要舊城中心！要數我哋嘅推介之選，Cantina del Gelato 一定名列前茅，佢喺市內各地都有分店，其中一間開正喺老橋 (Ponte Vecchio) 附近；店內嘅雪糕口味多達 20 款，豐富創新，大膽鮮明，由熱帶水果到香料味都有，中杯份量售價大約 EUR3 起。

烏菲茲美術館 (Uffizi Gallery) 位於佛羅倫斯市中心嘅 16 世紀 Office Building 裡面，館內有好多一字排開嘅房間，收藏咗大量文藝復興時期嘅藝術作品，按照面世時間排序，當中仲有往日唔同時期嘅宗教文物代表作添！館藏之中，鼎鼎大名嘅經典作品琳瑯滿目，包括波提且利 (Botticelli) 嘅《維納斯的誕生 (The Birth of Venus)》、卡拉瓦喬 (Caravaggio) 嘅《美杜莎 (Medusa)》，同埋達文西 (da Vinci) 嘅《聖母領報 (Annunciation)》 等等。美術館門票大概由 EUR6.50 起，建議俾多少少錢參加導賞團，喺導遊帶領之下深入認識藏品—最重要嘅係…導賞團遊客可以直入展館，唔使同「水蛇春」咁長嘅人龍逼！

佛羅倫斯中央市場 (Mercato Centrale) 行程豐富，係唔少人嘅必遊景點；場內美食攤檔一籮籮，新鮮地道嘅托斯卡尼 (Tuscany) 名物索價實惠，俾你盡情「吃玩買」，難怪人氣爆燈。選購任何商品之前，你都可以睇過試過，保證至啱心水；如果你夠早嚟到，仲可以睇住大師傅點樣炮製美食添！

玩盡人稱「托斯卡尼首都」嘅佛羅倫斯之後，不妨嚟杯經典基安蒂 (Chianti Classico)？呢啲嚟自托斯卡尼嘅紅酒嚴選桑嬌維塞 (Sangiovese) 葡萄釀製，同佛羅倫斯特色菜簡直係絕配；而丁骨牛扒 (T-bone Florentine Steak) 就係其中不容錯過嘅名菜之一，選用托斯卡尼飼養嘅契安尼娜 (Chianina) 牛上肩胛切成雪花牛扒，再用木火烤製，肉質嫩滑，入口即溶。佛羅倫斯唔少餐廳都有供應牛扒，但講到最好味之選，首推新聖母瑪利亞教堂 (Santa Maria Novella Church) 附近 Trattoria dall'Oste Chianineria 嘅出品。

佛羅倫斯歌劇院 (Opera di Firenze) 係佛羅倫斯郊區嘅現代化場館，亦係主辦全球歷史最悠久嘅音樂歌劇節—「佛羅倫斯五月音樂節 (Maggio Musicale Fiorentino)」嘅場地。每年「音樂節季」期間，歌劇院都會雲集意大利最優秀嘅管弦樂團、劇場導演同藝術家，傾力演出；當中劇目包括朱塞佩·威爾第 (Giuseppe Verdi) 改編莎士比亞嘅《馬克白 (Macbeth》通俗版本，每場共設四幕，門票由 EUR35 至 EUR200。由市中心新聖母瑪利亞教堂 (Santa Maria Maggiore) 搭 22 號巴士，只需 18 分鐘車程就會嚟到佛羅倫斯歌劇院，交通方便。