馬德里 5 大美食

同世界上每個國際都會一樣，馬德里都有為遊客送上各式各樣嘅優質餐廳，俾大家盡情享用美味佳餚。講到馬德里最出名嘅習俗，就梗係食 Tapas 小食啦；之但係，如果你想品嚐傳統嘅西班牙美食，都仲有好幾道菜式份屬必試之選！

馬德里酒店

1. 馬德里雜燴肉菜鍋

推介： 美食

馬德里雜燴肉菜鍋 (Cocido madrileño) 係出名嘅蔬菜燉肉料理套餐，一般會包含 3 道菜，多數餐廳都會喺星期二提供，佢仲係冬季名物嚟添！每道菜都稱為「Vuelco」—第一道菜用湯汁配以少量米飯奉客，第二道菜係鷹嘴豆配蔬菜，而最後一道菜就係肉類。想搵試食呢款名菜嘅好去處？位於市中心嘅 La Bola 餐廳係唔錯嘅選擇，而且附近相當好住，鄰近東方廣場 (Plaza de Oriente)，不妨喺呢度嘅酒店落腳吖！

2. 西班牙傳統煨豬肉

推介： 美食

去到西班牙，不妨一試西班牙傳統煨豬肉 (Callos a la madrileña) 吖！呢道燉菜由牛肚﹑牛鼻、牛蹄﹑香腸﹑血腸﹑蕃茄﹑辣椒﹑洋蔥同大蒜製成，亦都同大多數西班牙菜一樣，會配搭新鮮麵包用嚟點汁，零舍好味，冬天食暖笠笠，最啱口味！

3. 西班牙薯仔蛋餅

推介： 美食

講到馬德里嘅傳統美食，西班牙薯仔蛋餅 (Tortilla de patata) 一定榜上有名，佢簡約又好味，就咁放薯仔同雞蛋整就得，又可以加埋洋蔥﹑紅椒甚至吞拿魚，滋味無與倫比！！

4. 大蒜湯

推介： 美食

大蒜湯係你遊覽馬德里嗰陣嘅必試菜式，佢雖然源自卡斯蒂利亞-萊昂 (Castilla y Leon)，但係而家已經被視為馬德里嘅傳統美食之一。呢道菜之所以聲名大噪，皆因知名作家亞歷杭德羅·杜馬斯 (Alejandro Dumas) 都大讚佢好味道！

5. 傳統甜品

推介： 美食

鍾意食甜嘢嘅你，點可以唔試吓馬德里嘅甜品？如果「傳統甜品」係你嘅心頭好，咁臨走之前就一定要食返次聞名世界嘅牛軋糖喇！以前，呢款糖係「聖誕限定」，而家就一年四季都食得到，仲有五花八門嘅口味添。

對於甜嘢麻麻哋？不妨試勻西班牙 Tapas 小食，好似辣味番茄醬拌薯仔 (patatas bravas)、煎雞蛋炸薯條 (huevos rotos) 等等，喺當地任何一間酒吧飲啤酒嗰陣，佢哋都係好惹味嘅送酒菜嚟架！

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。