馬德里 10 大浪漫活動

雖然馬德里皇宮 (Royal Palace of Madrid) 係西班牙皇室嘅正式宮邸，但皇室成員其實另有住處，所以你都應該冇乜機會遇見佢哋架喇 (笑~)。呢座宏偉建築早在 18 世紀由國王菲利普五世 (Philip V) 下令建造，融合咗新古典風格同巴洛克風格，

裡面共有 3,418 間客房，當中包括皇座大廳、軍械庫，同埋全歐洲保存得最完整嘅皇家廚房。醉心藝術嘅你，仲可以喺呢度欣賞到路易斯莫拉萊斯 (Luis Morales)、戈雅 (Goya)、胡安德法蘭德斯 (Juan de Flandes)、卡拉瓦喬 (Caravaggio)、維拉斯奎茲 (Velázquez) 同費德里科馬德拉索 (Federico Madrazo) 等知名藝術家嘅曠世傑作添！

馬德里皇家植物園 (Royal Botanical Garden of Madrid) 佔地 8 公頃，位於穆里略廣場 (Plaza de Murillo) 普拉多博物館 (Prado Museum) 附近嘅綠化地段，早喺 1755 年落成，園內總共有 4 個露台同 2 間溫室，種咗 6,000 幾種植物。

春風吹暖，花園有鬱金香、百合同玫瑰等鮮花盛開；而熱帶植物所在嘅溫室就全年開放。一場嚟到，梗係要參觀花園嘅植物標本室啦—呢座標本室規模冠絕西班牙，珍藏咗世界各地約 100 萬個草藥標本，而當中部分標本嘅歷史仲可以追溯到 18 世紀添！

阿穆德納聖母主教座堂 (La Almudena Cathedral) 係一幢揉合新古典主義同哥德式復興風格嘅 19 世紀教堂，位於 Calle de Bailén 附近，距離馬德里皇宮 (Royal Palace of Madrid) 以南大約 700 米，堂內設有新羅馬式地下室，珍藏住早喺 16 世紀畫成嘅阿穆德納聖母 (Virgen de la Almudena) 畫像。

此外，呢度亦設有博物館，詳細介紹教堂歷史。大教堂同地下室可以免費參觀，而博物館就酌量收取大約 €6 嘅入場費。

麗池公園 (El Retiro Park) 位於獨立廣場 (Plaza de la Independencia) 上面，寬敞舒適，園內最受歡迎嘅景點一定要數雕像步道 (Statue Walk)！呢條步道沿路有 18 世紀西班牙皇室成員嘅雕像「列陣」，而阿方索十二世 (Alfonso XII) 嘅紀念碑旁邊仲有人工湖，俾幾蚊歐元就可以租船遊湖。

公園入面另一個必遊景點，係建於 1887 年嘅水晶宮 (Palacio de Cristal)：呢個涼亭望落都幾似溫室，設計經典，飾有五彩繽紛嘅鮮花，絕對係最華麗嘅求婚勝地！

馬德里皇家劇院 (Teatro Real) 創於 1818 年，係馬德里 (Madrid) 最古老嘅歌劇院之一，全年都有世界一流節目上演，當中大部分係自家作品，又或者同歐洲其他主要歌劇院合編嘅歌劇表演。

每日 10:00 至 13:00，皇家劇院導賞團會帶大家一齊探索舞台區、工作坊、更衣室同排練室；導賞團設有西班牙文、英文、法文同德文版。

美術中心 (Círculo de Bellas Artes) 係建於 19 世紀嘅綜合文化建築，專門舉辦藝術、音樂、電影同文學相關活動，裡面設有 4 個畫廊，展覽出自歐洲各地新晉藝術家手筆嘅大約 1,200 件藝術品。此外，呢度亦都有一間劇院，播放獨立電影，而且全年都會為唔同年齡嘅遊客開辦工作坊同課程。

只要俾每人 €4 嘅入場費，你就可以行入屋頂陽台，欣賞馬德里 (Madrid) 天際線嘅日落美景，遠眺格蘭大道 (Gran Vía) 同皇宮 (Royal Palace) 等歷史地標。時值春夏，不妨點杯飲品，喺度 Relax 一下！

國家浪漫主義博物館 (Museo del Romanticismo) 展出咗超過 16,000 件源於 1833 年至 1868 年嘅藝術品、畫作同傢俱，蔚為奇觀！呢間博物館位於聖馬特奧 (San Mateo) 嘅 18 世紀 Marquis of Matallana 宮殿之中，

館內人氣最旺嘅展品包括 Goya、Madrazo、Alenza 同 Esquivel 嘅傑作；而瓷器公仔、鋼琴，同埋西班牙浪漫主義時期嘅華麗銀器亦都大受歡迎。博物館入場費大約 €3；逢星期六 14:30 起、同埋星期日全日免費入場。

貴為馬德里 (Madrid) 最大型嘅城市公園，田園之家 (Casa de Campo) 擁有佔地約 17.5 平方公里嘅綠化空間，中間仲有個湖添！遊客可以搭纜車來往田園之家同西方公園 (Parque del Oeste)，沿途欣賞遼闊都會全景。

公園入面設施多多，當中包括野餐枱，同埋俯瞰湖泊嘅遊樂場；而你仲可以喺馬德里競技場 (Madrid Arena) 綜合大樓試玩各類運動，又或者去馬德里遊樂園 (Parque de Atraciones de Madrid) 親子遊樂設施，同小朋友玩餐飽！

喺距離馬約爾廣場 (Plaza Mayor) 大約 5 分鐘步程嘅 Hammam Al Andalus，你會享受到正宗土耳其浴 (Hammam) 同 Spa！呢個澡堂裡面有 3 個唔同溫度嘅熱水池，由燭光通道相互連接，另外仲設有洋溢精油香氣嘅蒸汽浴室，同埋一張熱石枱，用嚟做全身磨砂同按摩。90 分鐘療程只需 €35 起，全程無限量供應清爽薄荷茶同清水。

馬德里 (Madrid) 文學區 (Literary Quarter) 滿載藝術氣息，位於普拉多大道 (Paseo del Prado) 同市中心聖亞納廣場 (Plaza de Santa Ana) 之間，素以鵝卵石街而聞名，街上佈滿 Lope de Vega、Cervantes、Quevedo 等西班牙偉大作家嘅名言。

喺聖亞納廣場附近，仲有唔少舊式小酒館、高檔餐廳同露台 Café；你可以喺玫瑰園 (Villa Rosa) 觀賞 Flamenco 舞蹈表演，度過浪漫一晚；去 Café Central 細聽爵士樂，又或者喺 RADIO ME Rooftop Bar 飽覽馬德里嘅天際線。