巴塞隆拿 10 大親子活動

提比達伯遊樂場 (Tibidabo Amusement Park) 係歐洲最古老嘅主題公園之一，雖然公園唔喺城市內，而係市中心西北面嘅山上，但絕對值得特地前往。你唔單止可以喺海拔 500 米高處 (如果乘坐摩天輪仲可以更高！) 飽覽巴塞隆拿美景，仲可以玩盡各式有趣遊樂設施，例如搭過山車穿梭附近起伏嘅山地。按照現代標準嚟睇，呢啲遊樂設施可能唔算刺激，所以更適合年幼小孩遊玩。園內亦有好多餐廳可供選擇，等你不愁醫肚！

宇宙科學館 (CosmoCaixa Science Museum) 位於提比達伯遊樂場 (Tibidabo Amusement Park) 嘅山下，係歐洲最大型嘅科學博物館之一。館內主題出乎意料地多，所以無論小朋友鍾意天文學定係生態學同地質學，都一定可以喺呢度盡興一番！呢度大多數展覽都要親身動手玩，當中尤其以「Touch, touch!」展覽嘅互動元素最為豐富。喺工作人員嘅監督之下，小朋友可以了解到地中海四周有邊啲植物同動物比較安全，可以接觸互動。最重要嘅係小朋友可以免費入場，所以絕對值得順便嚟玩吓！

各位小朋友，你最期待嘅畫面出現了：朱古力博物館！係咪既期待、又興奮？呢間博物館規模中規中矩，但處處都甜蜜蜜，連入場券都係用朱古力製成。博物館位於城堡公園 (Cuitadella Park) 附近嘅歷史建築內。苦中帶甜嘅可可豆喺巴塞隆拿擁有悠久而有趣嘅歷史，呢座博物館會為你講述當中一啲故事，亦會展示朱古力藝術，仲可以俾你喺工作坊親手製作同加工朱古力！喺遊覽之前先下載語音指南 App，參觀期間就可以獲得更多豐富資訊！

城堡公園 (Ciutadella Park) 唔單止係遠離城市繁囂嘅閒靜勝地，仲有好多有趣嘅景點同活動等你發掘！小朋友對歷史悠久嘅加泰羅尼亞國會大廈 (Catalan parliament) 或者三龍城堡 (Castle of the Three Dragons) 可能未必感興趣，但自然歷史博物館 (Natural History Museum) 就最適合佢哋喇！園內仲有可以俾人划船嘅湖，亦有醉人嘅噴泉同穿梭樹林嘅宜人小徑，再加上眾多遊樂區同一比一大小嘅猛獁象模型，大人小朋友都一定會樂而忘返！

巴塞隆拿附近有幾個戶外歷奇公園，大部分距離市中心一段頗長車程。Bosc Urbà 繩索公園嘅與別不同之處，就係公園正位於對角線大道 (Avinguda Diagonal) 嘅盡頭。公園全範圍設有上蓋，令遊客免受風吹雨打。園內設有三條路線，每條都有唔同難度嘅障礙物等住遊客挑戰！最難嘅路線專為 12 歲或以上嘅旅客而設，沿途有 20 個景點設施，包括沙包、吊索同笨豬跳。即使最安全、最簡單嘅路線，亦配備咗高級安全帶同安全設備，等大家玩得安心又盡興！

歷奇公園唔係咩新鮮事物，但泡泡公園 (Bubbleparc) 就一定會為你帶嚟耳目一新嘅歷險體驗！12 米高嘅 Bungydome 彈床絕對係園內嘅星級景點，俾你隨意向任何方向彈跳，好玩刺激！其他精彩景點包括泡泡球 (浮喺水面嘅太空球)，仲有適合幼童嘅充氣艇 (水上版碰碰車)。公園位於 Maremagnum 購物中心頂樓，不設入場費，但每個景點獨立售票。

無論你幾多歲，近距離觀賞海洋生物無疑都會係難忘嘅經歷。巴塞隆拿水族館 (L’Aquarium Barcelona) 設有 35 個水族箱，展出大約 450 種海洋生物。館內有 80 米長嘅水底隧道，穿越呢間海洋水族館，一定可以令小朋友格外歡喜！如果喺星期二或星期五嘅午飯時間嚟到，你仲可以觀賞駐館潛水員餵鯊魚。巴塞隆拿水族館位於市內港口地區，內設兒童互動學習專區。

錯覺畫廊有趣又好玩，難怪喺世界各地都紛紛湧現！構圖巧妙嘅畫作加上精心計算嘅角度，旋即令你拍攝到自己置身鐵達尼號、逃離喪屍群，或偷取珍貴藝術品嘅搞笑相片。有興趣？只要到位於蘭布拉大道 (La Rambla) 附近嘅幻象博物館 (Museum of Illusions) ，你就可以影到以上相片！快啲帶埋相機前往，盡情發揮豐富想像力！

海事博物館 (Maritime Museum) 位於蘭布拉大道 (La Rambla) 盡頭，為遊人講解呢座歷史悠久港口城市嘅造船同航海業知識。你可能會覺得呢個主題對小朋友嚟講有啲悶，但呢間博物館嘅展出方式別出心裁，所以非常適合一家大細嚟參觀！博物館設於舊船廠內，展出一啲實物比例嘅歷史戰艦仿製品，附近水面停泊咗一艘三桅縱帆船，館內仲有多個按比例製作嘅模型船同航海儀器。博物館可以「落手玩」嘅部分可能唔算多，比較適合年紀較大嘅小朋友，但館內嘅多媒體展品一定可以令大家嘅學習過程生色不少！

呢個歷時 10 分鐘嘅纜車之旅，可以帶你由貝殼海灘 (Playa de San Sebastián) 前往蒙特惠奇山 (Montjuïc Hill) 山頂，沿路越過繁忙海港，飽覽沿海同埋整座城市嘅醉人風光。巴塞隆拿港纜車 (Barcelona Port cable car) 於 1929 年開幕，紅白相間嘅車廂復古味十足！雖然纜車已使用多年，但都仍然非常安全，亦不失趣味！不過要留意，纜車喺大風日子會暫停行駛，旅程期間記得做足兩手準備！