台北 10 大最好購物商場

台北 101 大樓舉世知名，咁你又知唔知原來呢度低層係個頂級購物商場呢？台北 101 購物中心一共 6 層，主打各式各樣嘅名牌奢侈品，當中以高級時裝舖為主，包括 Armani Exchange、Versace 同 French Connection 等為人熟悉嘅大牌子，仲有 Montblanc、Chanel 同 Dior 等頂級名店。

呢度嘅餐飲食肆亦一啲都唔輸蝕，你可以去 B1 樓層嘅美食廣場試匀各款菜式。商場設計大方得體，大理石柱同拱形天花板非常典雅。

Bellavita 寶麗廣場係經過精心設計嘅豪華購物中心，建築物外型十足一座大教堂，風格典雅。雖然裡面舖頭唔算好多，但呢度仍然係台北數一數二嘅商場，有啲人甚至視佢為亞洲第一！

呢度嘅名店品牌品質一流，包括 Vera Wang、Tiffany & Co. 同 Giorgio Armani 等等，另外仲有藝術畫廊同埋林寶堅尼跑車陳列室；B2 層係美食廣場，而頂樓就有齊台北數一數二嘅頂級餐廳。

台北一共有 3 間微風品牌百貨公司，而微風廣場就係當中最早開幕、最突出嘅一間；另外兩間門店分別係微風二館同微風台北車站店。微風廣場 B2 樓層係微風超市，上面嘅購物同娛樂熱點足足跨越 11 層樓，中高檔次嘅舖頭比比皆是，當中有 Armani Exchange、Gucci、UNIQLO、Louis Vuitton、Jimmy Choo 同埋 Calvin Klein 等等；商場 9 樓有間戲院，附近樓層亦都有多間水準一流嘅餐飲食肆任你揀。

喺台北嘅 4 間新光三越百貨之中，最大同最受歡迎嘅就莫過於台北站前店。呢間百貨公司位於新光大廈內，開設咗各式各樣嘅商舖，從廉價品牌到高級名牌都應有盡有。無論你想買咩都好，幾乎都可以喺呢度搵到。新光三越百貨台北站前店位處幾個交通網絡嘅核心，一定可以為你送上一站式完美購物體驗；而店內仲設有大型美食廣場，種類繁多嘅餐廳林立，美食任君選擇。

美麗華百樂園絕對唔係浪得虛名，唔單止有全台灣數一數二嘅超高摩天輪，仲有超大螢幕戲院，同時又係一座大型購物商場，

樓高共 6 層，吸引 Chanel、Roberta di Camerino、Montblanc 等中、高檔品牌進駐。有別於台北其他商場，美麗華百樂園除咗注重時裝外，仲售賣各種運動器材、玩具、配飾同化妝品，Food Court 亦相當出色。

台北地下街有多達幾百間舖頭任你行，更加有條地下通道可以直達台北車站。呢個地下市場主要賣衫褲、電子嘢同埋各式食品，各類舖頭集中開喺所屬專區。不過呢度嘅賣點又點止咁簡單呢？呢度開滿數唔晒嘅動漫專門店，動漫迷點可以錯過？

而且地下街前身係中華市場，賣嘅嘢多數價錢親民啲，保留咗價廉物美嘅傳統。呢度同好多市集一樣，周不時都會有街頭音樂家演奏，令人有種親切地道嘅感覺。

京華城購物中心 (簡稱京華城) 前門有座 11 層花崗岩球形建築，外型吸晴，辨認度十足。呢座商場係名副其實嘅「城中城」，樓高 12 層，另設地底 7 層，

亦係 Mira 百貨公司所在之處，佔地廣闊，專售優質時尚名牌產品。另一方面，商場坐擁各式各樣嘅餐廳、一座大型戲院、同埋面積廣達 1,650 平方米嘅護理同化妝銷售專區；而位於 1 樓嘅鞋廊亦特別令人印象深刻，同樣佔地 1,650 平方米，有超過 10,000 款鞋履任君選擇；如果試鞋試得太攰，仲可以喺同一層嘅足部 SPA 水療中心舒展吓。

呢間誠品生活店樓高 4 層，主角係超人氣嘅誠品書店。周圍都開滿精品店，出售文創商品，當中包括二樓專售嘅獨特手工藝品，同埋一樓嘅高檔時裝產品。

三樓名為「書卷沏」，亦係書店嘅所在地，仲設有各式各樣嘅咖啡店；B2 樓仲開設咗出色嘅美食廣場、藝術畫廊同表演廳。誠品生活毗鄰松山文創園區，正係探索台北別樹一幟文化氛圍嘅好地方。

遠東 SOGO 百貨公司高 14 層，樓面廣闊，坐擁眾多知名品牌，主打時裝產品，貨色數之不盡，由童裝、運動裝備、內衣到配飾不等，種類繁多，要買咩都應有盡有！

最底層 (B2 樓) 設有超級市場，頂樓 (12 樓) 就設有活動大廳，而 11 樓仲有各種各樣嘅餐廳。如果你幫屋企人搵緊買衫好地方，呢度就係你喺台北市嘅必到之處。百貨公司同捷運忠孝復興站直接相連，位置方便。

ATT 4 Fun 百貨公司匯聚大量國際時尚名牌，同時又有台北首屈一指嘅頂級夜店，同埋可以容納 500 人嘅場館。Zara、Che Che New York、Nami＆Yami、GAP 等名牌服飾都進駐場內，時尚愛好者絕對不容錯過！

行街行到肚餓？ATT 4 Fun 嘅五樓設有各式精緻餐廳，任君選擇；而你仲可以盡情採購別緻嘅家居用品同手工化妝品，實可以滿載而歸！