台北 5 大夜市

士林夜市係台灣多個夜市中最大型、最著名嘅一個，成日都逼滿當地人同遊客！夜市中央部分大多都有上蓋，免受天雨影響；而場內商店遍佈周圍街道，令成個區域都變成「平貨天堂」，

當中又以紀念品、服裝、同埋超過 500 間小食檔所出售嘅美食最受歡迎。另一方面，你仲會搵到各式中國茶具、瓷器同埋陶器，你可以買啲返去當係有趣新穎嘅手信。一場嚟到台北，又點能夠錯過呢個燈火通明、充滿活力嘅夜市呢？

饒河街係台北最古老嘅夜市街，全長 600 米，自 1987 年開業以來，一直都係廣受歡迎嘅旅遊景點。通過入口處嘅裝飾拱門後，就可以見到各式各樣嘅商店同小食店，貨色應有盡有，從花多眼亂嘅食品同電器、遊戲、DVD、美容產品、服裝配飾，以至小型兒童遊樂場等等，都一應俱全。饒河街夜市深受民眾推崇，難怪成日都人頭湧湧！

喺夜市入面，街頭小食就最具吸引力，你不時都會見到電視台攝製隊喺出售各式地道美食嘅小食檔拍攝烹飪節目。要數最具人氣嘅菜式，就非藥燉排骨、蚵仔麵線同辛辣臭豆腐莫屬！

師大夜市位於國立臺灣師範大學後面，堪稱市內「至潮地帶」，以售賣時裝聞名。師大路附近嘅橫街開設咗好多攤檔同商店，當中唔少由年輕企業家經營，出售自家設計嘅特色產品；而且好多年輕音樂家都會成日嚟呢度賣藝，場內仲有各種當地傳統食品出售。師大夜市周圍都洋溢仿波希米亞式精緻風格，所以亦深受當地學生歡迎。如果你想搵與別不同嘅商品，喺師大夜市可能會有收穫！

寧夏夜市標榜古早台灣風味，俾人一種與眾不同嘅感覺，呢個夜市以傳統小吃聞名，如油炸芋頭球、蚵仔煎同帝王廣東粥等，統統價格相宜，深受旅客同當地人歡迎。

夜市周圍仲有懷舊嘅街機景點，同埋千奇百怪嘅攤檔，值得去行下！呢條全長 300 米嘅夜市街喺台北算係歷史比較悠久，亦係辦年貨嘅好去處。

華西街夜市有「蛇街」之稱，以超乎尋常嘅獨特食品聞名，並喺台北萬華區提供耳目一新嘅購物體驗。呢度嘅特色名物包括鹿陰莖、龜睾丸、蛇肉同蛇血，而夜市嘅花名正正嚟自蛇肉店。另一方面，含有中草藥同藥材嘅菜餚都深受歡迎。

夜市入口有一道傳統中式大門，將各種奇特攤檔同商店匯聚埋一齊，深受遊客推崇。華西街夜市附近規模較細嘅廣州街夜市同梧州街夜市，而龍山寺名勝亦喺附近，令呢度成為遊覽台北舊城區嘅理想第一站。