台北 12 大最好餐廳

鼎泰豐靠簡單好味嘅小籠包起家，一步一步走到依家，成為一間國際連鎖餐廳！品牌旗下第一間餐廳位於信義路，喺 1980 年代開業，隨即大受歡迎，之後轉型為特許經營食肆，依家已經喺台北增設咗 4 間分店，另外喺台灣其他地方仲有 4 間分店，業務甚至遍佈日本、中國大陸、新加坡、印尼、韓國、馬來西亞、香港、泰國、澳洲同美國。

呢間餐廳承載住中華傳統色彩，供應樸實無華嘅地道中菜，而且一直保持高水準發揮。餐廳人氣度超高，每間門市一到食飯時間就人頭湧湧。

No. 168 Prime Steakhouse 牛排館係維多麗亞酒店旗下 3 間著名餐廳之一，由有「台灣牛排教父」之稱嘅主廚鄧有癸主理。扒房除咗供應高級入口牛扒之外，用餐室亦行現代鄉村路線，同時設有開放式廚房同 2 個木烤爐，喺度食飯別有一番風味。

餐廳最貴最高級嘅套餐包括 6 安士美國農業部黑安格斯頂級牛扒、前菜、湯、沙律、烤時令蔬菜同埋甜品，價錢大約 TWD1,500。牛扒在鄧大廚的專業監督下炮製，入口即融，軟滑多汁；佐以精心挑選的葡萄酒享用，風味更佳。

台北 L'Atelier de Joël Robuchon 餐廳主打法式高級美食，菜式好味之餘，環境仲好有格調。呢間餐廳 2009 年開業，創辦人兼主廚 Joël Robuchon 係全球公認嘅星級大廚，仲俾米芝蓮封為 3 星級廚師，實力超哂班。餐廳位於優雅嘅 Bellavita 寶麗廣場，裝潢採用搶眼嘅紅黑色，堂食可以招呼 36 位客人，圍著餐廳中央開放式廚房嘅 32 個座位最受客人歡迎，你可以欣賞到行政總廚 Olivier Jean 領導嘅專業團隊，係你面前表演刀功廚藝，然後由優秀嘅服務人員為你奉上每一道美食。無論係麵包、甜品抑或酒窖裡面嘅靚酒，呢間餐廳嘅食物全部都大獲好評；特別推介嘅菜式包括走地鵪鶉釀鵝肝醬配薯蓉。

RAW 餐廳由台灣頂級廚師江振誠坐鎮，體現獨特生活風格，主打豐富「bistronomy」小酒館美食，務求以經濟價格為客人送上高級佳餚。具體黎講，餐廳走法式路線，融入台灣本土風味，大量採用本地時令食材，打造嶄新格調嘅菜式。

店內設有 50 個座位，裝修設計既新潮又時尚，中央酒吧好似現代藝術雕塑咁別致，餐枱仲有放餐具嘅櫃桶，設計好貼心。RAW 餐廳只供應套餐，價錢大約每人 NT1,850 左右，其中以燒白菜/鱈魚/蘇比斯調味汁特別受歡迎，係店長推薦菜式。

林東芳牛肉麵館雖然外表平平無奇，不過佢嘅牛肉麵始終係台北人心目中嘅 No.1，其中最出名嘅就係半筋半肉牛肉麵湯 (價錢約 NT220)，湯麵裡面放滿左上等牛肉，湯底清甜微辣，麵條爽口彈牙，真係好味到唔停得口！

前菜「花干」(小麥麵筋) 同樣非常出名，大獲食家好評，價錢仲好抵，每碟只係 NT30。林東芳牛肉麵館基本上係間街頭食店，主要對象係當地人，餐牌無英文翻譯，外國遊客落單或者有啲困難，不過食物太好味，真係好值得推介。

微熱山丘 Sunny Hills 雖然只係間蛋糕店，不過佢紅遍台北甚至成個台灣，仲被譽為台北最佳食肆之一，人氣一時無兩。呢間店嘅鳳梨酥已經成為最熱賣手信，佢地採用黎自八卦山嘅新鮮菠蘿，製成濃郁果醬，然後加入牛油麵團裡面一齊烤焗，味道一流！鳳梨酥一盒 10 件價錢大約 NT350。微熱山丘嘅「陽光美點」絕對係遊客黎台灣必買嘅手信，呢度嘅鳳梨酥和蛋糕已經成功俘虜中國大陸、日本、香港和新加坡食客嘅心，佢地仲係呢啲地方開設特許經營店，可想而知幾受歡迎。

上海醉月樓被譽為台北最優秀嘅上海菜餐廳，更加係台北香格里拉遠東國際大飯店中 6 間著名餐廳之一。主餐區和私家房都採用傳統紅黑色中式裝潢，仲可以飽覽全市靚景。

唔少名人都曾經慕名而來，食過主廚戴忠麟巧手炮製嘅美食，美國前總統克林頓曾經同台灣前總統陳水扁一齊幫襯過呢間餐廳。上海醉月樓菜式嘅獨到之處，在於將現代元素融入傳統上海口味之中，係烤肉、燒肉、燉肉和蒸肉裡面添加帶有紅酒嘅醬汁，金字塔形嘅紅燒豬肉片配梅乾菜係呢度嘅首本名菜。

欣葉餐廳本來係家族式小店，1977 年係後巷開業，最初得 11 張枱，發展到而家已經係台北有 5 間分店，全部門市採用現代裝修設計，主打傳統福建風味台式美食。所有廚師都經驗豐富，注重每個細節，非常重視菜式品質，呢個亦係餐廳嘅成功之道。

其中，蛋酥炒蘿蔔係餐廳嘅出名必食前菜，值得一試；另一道招牌菜就係炒米粉，佢係 7 道菜套餐嘅其中一款，套餐價錢 NT1,200 起。

紅廚 Pasta West East 嘅室內設計非常古典優雅，餐廳嘅歐洲風情美食亦相當出名，呢間餐廳係慶祝特殊場合、或者開商務會議嘅好地方，佢地逢週末更加會炮製豐富嘅燒烤大餐！餐廳提供澳洲和法國精選葡萄酒，適合配搭不同嘅主菜，雖然餐飲價錢都偏貴，不過都好值得嚟豪返一次。

Bellini Caffe 意大利餐廳，位於台北金融區，走優雅時尚路線，單睇午市和晚市食客人流暢旺，就知道呢間餐廳係當地有幾受歡迎喇！菜單選擇好多元化，意粉、沙律到薄餅都應有盡有，價錢仲好經濟抵食添。餐廳內部裝潢圍繞地中海風格，地板鋪左清涼地磚，打造高雅清新感覺。

清真昆明園裡裡外外都係走簡約樸實路線，菜式價錢好親民，店員亦相當親切，令客人有賓至如歸嘅感覺。店內裝修唔算華麗，不過環境非常舒服，絕對係食晚飯嘅好地方，除左美味嘅印度美食，佢地仲有幾款亞洲菜式俾你選擇。

Tutto Bello 係高級餐廳，主打意大利料理，服務一流，餐廳酒牌有好多選擇，中高檔紅酒白酒都一應俱全，價錢有平有貴，你可以慢慢揀。餐廳位置係台北華國大飯店附近，供應多款美味肉類和海鮮菜式，唔好錯過佢地嘅自家製意粉，特別推介龍蝦天使麵，廚師將天使麵砌成龍蝦尾形狀，美觀又可愛，仲突顯廚師對食物嘅細緻用心。