台北 19 大最好玩樂活動
台北最出名嘅係乜嘢？
1. 台北 101
由頂層盡賞美景
推介： 伴侶, 家庭, 拍照, 經濟實惠
台北 101 曾經擁有「世界第一高樓」嘅美譽，既係文化瑰寶，亦係建築奇蹟。大樓融合中國文化嘅傳統設計元素，望落就好似珍寶塔，位處台北市金融區嘅中心地帶，裡面設有世界級購物商場，奢華名店、時裝店同高級餐廳林立。
台北 101 大樓之所以抵抗得到地震同颱風，部分原因都要歸功於頂層附近重 660 噸嘅鋼製擺錘—踏足 89 樓嘅觀景台，除咗飽覽台北市嘅絕色靚景之外，你亦都可以睇下呢個巨型調質阻尼器係點樣透過鐘擺活動，抵銷大樓嘅移動幅度。只要乘搭破記錄嘅加壓升降機，37 秒就嚟到觀景台架喇！ 閱讀更多資訊
位置： 110 台灣台北市信義區信義路五段 7 號
開放時間： 每日 09:00 至 22:00 (購物商場營業時間不同)
電話： +886 (0)2 8101 8800
台北 101
2. 中正紀念堂
遊覽花園，享受寧靜
推介： 家庭, 歷史文化, 經濟實惠
中正紀念堂位於台北市中心佔地 25 萬平方米嘅公園裡面，係為咗紀念台灣已故前總統蔣介石而興建。蔣介石為現今嘅台灣奠定堅實根基；所以，後人就以呢座耀眼奪目嘅白色大理石配藍色玻璃頂建築，嚟向佢表達稱頌之情。
行上 89 級樓梯 (每級代表蔣介石嘅壽歲) 嚟到入口之後，你可以參觀下層嘅圖書室同博物館，裡面嘅展覽詳細介紹呢位領導人嘅生平同台灣發展史；堂內上層就係大廳，豎立咗蔣介石嘅大型雕像，俯瞰住每日定時進行嘅三軍儀隊交接儀式，場面莊嚴。
位置： 10048 台灣台北市中正區中正南路 21 號
開放時間： 每日 09:00 至 18:00
電話： +886 (0)2 2343 1100
中正紀念堂
3. 龍山寺
台北最古老嘅寺廟
推介： 家庭, 歷史文化, 拍照
龍山寺由中國移民於 1738 年興建，係台北同類寺廟裡面最古老嘅一間，亦係台灣最重要嘅寺廟之一。龍山寺供奉慈悲為懷嘅觀音，但係歷史對佢一啲都唔「仁慈」—第二次世界大戰期間，龍山寺一直受地震、火災甚至空襲破壞，寺內獨一無二嘅藝術品同文物慘遭摧毀。
每次災難之後，熱心嘅台北居民都會致力重建龍山寺 (最後一次全寺重建工程喺 1924 年進行)，保存寺身嘅精密設計，令佢成為台灣古典建築嘅典範。時至今日，寺內依然珍藏住好多瑰麗文物，每件都具有象徵意義，蘊藏引人入勝嘅故事。 閱讀更多資訊
位置： 10853 台灣台北市萬華區廣州街 211 號
開放時間： 每日 06:00 至 22:00
電話： +886 (0)2 2302 5162
龍山寺
4. 貓空纜車
遊逛市外，好玩方便
推介： 伴侶, 家庭, 拍照
貓空纜車系統全長 4.3 公里，連接台北動物園同台北南郊小鎮貓空之間，沿途穿過絢麗青翠嘅山脈，終點站嘅前一站係指南宮，
搭哂全程大約需時 17 至 37 分鐘，視乎系統當日嘅運行速度而定。隨住纜車登山，你可以輕鬆遊覽台北南部嘅傳統茶室同茶園，沿路細賞城市景觀同周圍嘅鄉村靚景。
位置： 116 台灣台北市文山區新光路二段 8 號
開放時間： 星期二至四 09:00 至 21:00；星期五 09:00 至 22:00；星期六 08:30 至 22:00；星期日 08:30 至 21:00 (逢星期一休息，每月第一個星期一及公眾假期除外)
電話： +886 (0)2 2181 2345
貓空纜車
5. 北投溫泉
水療天堂
推介： 伴侶, 家庭, 豪華住宿
北投溫泉位於全球雲集最多 SPA 水療勝地嘅其中一個區域之中，北投公園周圍嘅建築幾乎都係各式各樣嘅溫泉酒店，充分善用流經山谷、富含礦物質嘅地熱水。呢一區嘅硫磺溫泉水通常喺 37℃ 至 40℃ 之間，帶弱酸性，據聞具有治療功效；而位於較上游嘅地獄谷 (或地熱谷) 水溫更高達 100°C！
北投公園本身設有北投溫泉博物館，館外綠地純潔不玷，好比荒郊，風光不殊。
位置： 112 台灣台北市北投區中山路 2 號
開放時間： 星期二至日 09:00 至 17:00
電話： +886 (0)2 2893 9981
北投溫泉
6. 國立故宮博物院
世界上最受歡迎嘅博物館之一
推介： 家庭, 歷史文化, 拍照
國立故宮博物院珍藏咗超過 69.6 萬件中國古代帝皇時期文物同藝術品，同類館藏數量冠絕全球，同時亦係世上最受推崇嘅博物館之一！如果你想了解中國源遠流長嘅精彩歷史，呢個博物館正係盡覽全局嘅不二之處。
館內部分文物已有超過 1,000 年歷史；而館身華而不俗嘅建築於 1965 年落成，相對上比較「後生」，博物館喺之後幾十年間經過多次擴展，先至可以容納常設展覽。順帶一提：建議你著舒適嘅鞋到訪，喺館內慢慢遊走。
位置： 111 台灣台北市士林區至善路二段 221 號
開放時間： 星期日至四 08:30 至 18:30；星期五至六 08:30 至 21:00
電話： +886 (0)2 2881 2021
國立故宮博物院
7. 象山
愉快散步，欣賞美景
推介： 家庭, 經濟實惠, 遊歷
喺「四獸山」之中，象山喺最出名嘅一座山，又因為坐擁台北金融中心嘅美景而深受歡迎。毋庸置疑，台北 101 地標雄據全市天際線，而象山正係最多人觀賞同拍攝呢座摩天華廈嘅地方。
山頂高 183 米，沿住南港親山步道向前行，就可以直達—呢條步道係全台北最易走嘅行山徑，所以亦最受歡迎；步道標示清晰，修葺良好，雖然有無盡石級令人望而生畏，但係其實路程一般只需 20 至 40 分鐘，連登山新手都可輕鬆登頂！
象山
8. 國父紀念館
台灣國父一生功業
推介： 家庭, 歷史文化
孫中山先生一般被稱為「台灣國父」，而國父紀念館就係專為頌揚佢嘅畢生貢獻而建。佔地 29,464 平方米嘅國父紀念館位於精心裝飾嘅中山公園內，擺設咗關於孫中山生平、以至中華民國誕生歷史嘅展品。孫中山喺 1912 年出任中華民國第一任總統；而國父紀念館如今就成為台北嘅重要文化中心，呢個紀念館其中一大特色就係儀隊交接儀式。
位置： 110 台灣台北市信義區仁愛路四段 505 號
開放時間： 每日 09:00 至 18:00
電話： +886 (0)2 2758 8008
國父紀念館
9. 國民革命忠烈祠
觀賞儀隊交接儀式
推介： 家庭, 歷史文化, 拍照
國民革命忠烈祠建喺翠綠山坡上，俯瞰基隆河，供奉住中華民國嘅戰爭死難者，祠內有接近 39 萬個靈位，撫慰喺辛亥革命、第二次世界大戰、中國內戰同其他戰事中喪命嘅生靈。
呢座祠屹立喺超過 33,000 平方米嘅草原中間，寧靜莊嚴，喺華美大門前面有三軍儀隊好似雕像咁駐守大門，而佢哋嘅交接儀式亦成為重要觀光節目。
位置： 10491 台灣台北市中山區北安路 139 號
開放時間： 每日 09:00 至 17:00
電話： +886 (0)2 2885 4162
國民革命忠烈祠
10. 臺北市立動物園
探望大熊貓
推介： 家庭, 拍照
要數臺北市立動物園內最出名嘅住客，梗係非大熊貓「團團」和「圓圓」、同埋喺台灣出世嘅第一隻熊貓 BB「圓仔」莫屬！佔地 165 公頃嘅動物園裡仲有 12,000 多隻雀鳥，並設有極受歡迎嘅兒童動物區 (飼養家畜)、昆蟲館、兩棲爬蟲館，另外園內仲有企鵝、樹熊同夜行動物。
此外，園入面亦有台灣本土野生動物專區，等你一探野豬、食蟹獴、雲豹、黃麂等嘅蹤影。臺北市立動物園嘅展覽富娛樂性，園內動物健康良好，因而獲享極高評價。
位置： 11656 台灣台北市文山區新光路二段 30 號
開放時間： 每日 09:00 至 17:00
電話： +886 (0)2 2938 2300
臺北市立動物園
11. 圓山大飯店
推介： 歷史文化, 豪華住宿
圓山大飯店位於圓山附近，早喺 1952 年開業，極盡奢華，店內亭閣同餐廳遠近馳名，幾十年來一直係台灣旅遊業嘅瑰寶。
飯店另一出名特色，就係店內 70 米長嘅地下旋轉滑梯—2012 年，當地一位新聞記者曾經喺電視直播瀡滑梯，期間仲不斷發出招牌尖叫聲，就令呢條滑梯自此打響名堂。飯店開業嘅時候正值台灣史上嘅危險時期，而滑梯係店內兩條逃生秘道之一，以便重要賓客喺空襲時撤離，亦方便傷健貴賓四圍穿梭，唔需要佢哋行螺旋樓梯。有傳言指呢條秘道嘅出口連接總統府；事實上，終點只係去劍潭公園。密道開放俾公眾參觀，但係必須預訂觀光團名額。
位置： 10491 台灣台北市中山區中山北路四段 1 號
電話： +886 (0)2 2886 8888
圓山大飯店
12. 欣賞表演藝術
推介： 歷史文化, 晚間娛樂, 團體
台北嘅戲劇同表演多不勝數，本地同國際節目定期上演，種類涵蓋俄羅斯芭蕾舞、百老匯音樂劇，以至傳統音樂舞蹈；
而場地選擇亦都同樣多元化—位於台北自由廣場嘅國家兩廳院會舉辦多項精彩活動，邀請世界各地嘅藝術家登台表演；中山堂和國立國父紀念館則位於台北 101 附近，方便易達。
欣賞表演藝術
13. 漫步於「天堂之路」之上
推介： 歷史文化, 拍照, 遊歷
台北市內宗教建築林立，當中包括各種寺廟、神社、清真寺同教堂，特別係新生南路附近地區—所以，新生南路又稱為「天堂之路」。呢個屬於大安區嘅地帶可謂專為「外來」宗教而設，而大安公園嘅對面就建有華麗嘅天主教堂同伊斯蘭清真寺。
只要喺台北市周圍行吓，唔難發現專門供奉佛教、道教同中國古代神明嘅地方，種類之多，令人目不睱給。呢區嘅特色景點包括保安宮、霞海城隍廟同孔子廟，全部都有悠久嘅歷史。
位置： 106 台灣台北市大安區新生南路二段
14. 貓空茶道
推介： 美食
貓空區位於台北南部，乘搭貓空纜車就可以輕鬆到達。呢個地區以種植茶葉而聞名，坐擁多間傳統茶館，更提供台式茶道體驗活動，絕對係一試台式茶道嘅最佳場所！
台式茶道繁複而精密，過程涉及多個茶壺嘅運用、多次倒茶動作，務求令熱水同新鮮茶葉完美混合；用呢個方式泡出嚟嘅茶非常可口，適合同一眾親朋好友同享，一邊飲茶，一邊欣賞壯麗山景。區內有多間茶館可供選擇，而邀月茶坊就係我哋首推之選。
位置： 116 台灣台北市文山區指南路三段 40 巷 6 號
電話： +886 (0)2 2939 2025
貓空茶道
15. 乘坐美麗華摩天輪
推介： 家庭, 拍照
美麗華摩天輪坐落於美麗華百樂園嘅屋頂，外表璀璨迷人，高 70 米，係台北市最高嘅摩天輪。由於摩天輪位於商場屋頂，所以當車廂到達最高點時，實際離地高達 100 米！喺呢個時候，本市北部、以至基隆河對岸嘅台北松山機場，都可以盡收眼底。摩天輪總共有 48 個車廂，每個車廂可搭載 6 名乘客，旋轉一圈大約需時 17 分鐘。
位置： 10491 台灣台北市中山區敬業三路 20 號
開放時間： 每日 11:00 至 23:00 (星期五和星期六至 00:00)
電話： +886 (0)2 2175 3456
乘坐美麗華摩天輪
16. 全天候營業嘅卡拉 OK
推介： 伴侶, 家庭, 晚間娛樂, 團體
台灣人熱愛唱卡拉 OK（當地稱之為 KTV），你當然唔可以錯過！台北有幾間主要嘅 KTV 連鎖店，最大嘅一間叫「錢櫃」—身處店內，你可以不分晝夜、隨時隨地熱唱中外名曲。只須花 TWD400 (週末收費較高)，就可以包私人房 3 個鐘，更係任食自助餐。店內設施一流，而且打理完善，一定可以俾你盡「唱」心中情！
全天候營業嘅卡拉 OK
17. 河畔踩單車
推介： 伴侶, 家庭, 遊歷, 團體
台北設有幾條單車徑，當中又以台北松山機場附近河邊嘅單車徑最舒適。旅客可以透過悠遊卡公共交通系統，或喺指定單車區附近嘅官方出租店租用單車。
單車徑唔單止俾你充分欣賞到台北嘅美景，而且更屬無車地帶，適合一家大細安全遊玩。台北有超過 100 公里嘅河邊單車徑任君選擇，絕對令你樂而忘返！
18. 公園耍太極
推介： 家庭, 團體
台北市唔少人都喜歡喺公園入面耍太極，一邊運動，一邊練武，當中又以二二八和平公園最受晨運客推崇。清早身處園內，你不時會見到一大班當地居民慢條斯理咁耍太極，而佢哋都歡好迎你加入晨運行列；當中仲有一啲太極班可以報名參加，由導師指導你完成各種招式。
另一方面，只要喺二二八和平公園、又或者喺市內其他公園中四圍睇吓，唔難發現有人大跳社交舞！台北公園有時會人頭湧湧，清晨時分特別熱鬧。
位置： 100 台灣台北市中正區襄陽路二二八和平公園
公園耍太極
19. 密宗腳底按摩
推介： 單人旅客
密宗腳底按摩係一種全方位療法，原理係：腳底唔同部分都會同身體嘅另一部位相連；例如，刺激大腳趾可以醫治頭部疾病，按摩腳踭就可以治療痔瘡。
呢種古老嘅中式療法喺台北好受歡迎，市內有多間腳底按摩店可供選擇，當中以 6 星集按摩會館為首選。就算你唔相信全方位療法，按摩療程都可以令疲憊嘅雙腳恢復生氣同活力，值得一試！
密宗腳底按摩
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。