台北 8 大最好酒吧同酒館

Barcode 夜店位於台北市，係俾顧客「互相打量」嘅好地方！呢間位於 5 樓嘅時尚現代酒吧設有寬敞露台，可以俾你一邊飽覽信義區嘅美景，一邊細聽各式樂韻，由經典浩室音樂、迷幻爵士樂、鄉土爵士樂以至新浪潮音樂都應有盡有。再加上喺倫敦受訓嘅專業調酒師精心調製多款別樹一幟嘅香檳雞尾酒，難怪 Barcode 門外晚晚都大排長龍！

店內仲供應高質素嘅餐前小食，包括洋蔥魷魚煙肉卷 (約 TWD300) 同羊肉湯 (TWD420) 等，令人流晒口水。

Revolver 引領住台北地下音樂潮流，店面佔據 3 層樓 (但係無任何一層係設於「地下」)，現場樂隊同 DJ 會定期喺 2 樓表演，3 樓設有型格酒廊酒吧，而 1 樓就係時尚街頭酒吧，全部酒吧都洋溢著自在搖滾氣氛，呢度更係暢飲啤酒嘅好去處—店內一杯手工啤酒同進口歐洲啤酒售價大約 TWD180 起，當地啤酒價格更加係低至 ND115！

Carnegie's 係一間酒吧兼餐廳，可以話係外籍人士嘅最愛，亦晉身市內最受遊客歡迎嘅景點之一。呢間店嘅品牌源自香港，屬於英式酒吧，供應典型酒吧食品同印度咖哩；

但係飲品 Menu 先至係真正精彩嘅部分，主打酒品超過 300 款！餐廳內周圍都係酷炫裝飾，播放住流行音樂，洋溢好客氛圍，而顧客更不時喺酒吧「大曬」熱舞技巧，為 Carnegie’s 更添名副其實嘅傳奇格調。

Ounce 係台北第一間隱蔽式酒吧，店內重現 1920 年代美國禁酒氛圍，店外望落去更似係咖啡店！之不過，經過「暗門」嚟到另一邊，一系列精心製作嘅朱古力雞尾酒就即刻映入眼簾。

酒吧採用大量深色木材裝修，營造出舒適而神秘嘅感覺；而調酒師絕對係本店明星，巧手善用好多種獨一無二嘅原材料，以嫻熟嘅技巧調製出特別飲品，仲好擅長帶動親切好玩嘅氣氛，令人印象深刻。

MQ Marquee 酒吧處處散發維多利亞時代優雅風格，而且供應頂級西餐，係台北眾多社會名流同知名人士嘅首選夜店。喺寬敞嘅酒廊入面，設有一個長形吧檯；即使你淨係叫最普通嘅飲品，調酒師都會悉心調製，而且個別調酒師仲參加過帝亞吉歐 (Diageo) 世界級調酒比賽，名列前茅添！

飲品 Menu 有唔少主打選擇，優質酒品琳瑯滿目。店內氣氛典雅，又唔會「作狀」，全部都要歸功於駐場 DJ 才華洋溢！

Woobar 位於台北 W 酒店頂層，算係全市唯一一間屋頂泳池酒吧，仲會定期舉辦泳池派對，難怪成為極具人氣嘅聚會場所！酒吧裝修呈現時尚型格、色彩繽紛嘅情調，店內供應柑橘伏特加等等好多款果味特飲，

而且菜式亦都相當獨特，其中嘅雲呢拿伏特加配優質朱古力忌廉唔試唔得！行到去池邊位置，你即刻可以喺繁囂市中心入面，享受悠閒嘅熱帶氣氛。

On Tap 宣稱自己係「台北唯一正宗酒吧」，不單止完美重現英式酒吧風格，就連店外 LOGO 都勁似倫敦地鐵站嘅標誌！呢度既係觀賞 (甚至參加！) 現場體育賽事嘅熱門場所，亦都係飛鏢聯盟同埋幾隊業餘足球隊嘅主場，

店內氣氛熱鬧友善，而且「店如其名」，有歐洲生啤供應，配搭一流酒吧小食同波枱設備，再加上定期舉辦 Party，難怪成為當地外籍社區最受歡迎嘅景點之一。

銅猴子酒吧盡顯西式 (特別係美式) 體育酒吧風格，唔單止廣受喺台北居住嘅外籍人士歡迎，仲時時吸引唔同背景又富有活力嘅潮人幫襯。店內配備多部大型平面電視，播放全球各地嘅盛大體育賽事，同時設有足球枱同鏢靶，飲品價格又平，所以廣受歡迎。銅猴子酒吧仲會舉辦相當有趣嘅「智力競賽之夜」，駐場嘅 DJ 仲會經常炒熱個場，而友善親切嘅老闆更係「人氣爆燈」，難怪店面成日人頭湧湧。