卡塔爾 10 大壯觀地標

貴為市內地標，多哈塔 (Burg Doha) 喺卡塔爾多哈西灣上拔地 238 米而起，地面有多達 46 個樓層，地底仲有 3 層，由法國建築師 Jean Nouvel 設計。

雖然呢棟高層辦公大樓規模唔係市內最大，但絕對獨特過人，向外延伸嘅斜紋網格柱呼應伊斯蘭馬甚拉比亞建築風格，有效保護大樓免受熱浪侵襲，同時減低沙塵覆蓋嘅影響，比起區內眾多玻璃建築更為優勝。呢座摩天大樓咁特別，夜晚著燈之後更加璀璨，值得影相打卡，為行程留低美好回憶。

阿斯拜爾塔又叫做「多哈火炬酒店」，樓高 298 米，位於卡塔爾多哈嘅阿斯拜爾區建築群，落戶市中心，鄰近多個當地景點，包括比利亞吉奧購物中心同哈利法國際運動場。正因為同運動場只相隔幾步之遙，阿斯拜爾塔喺 2006 年 12 月卡塔爾主辦第 15 屆亞運會同 2022 年 FIFA 世界盃期間，都成為萬眾焦點。

阿斯拜爾塔係卡塔爾最高嘅建築之一，嚟到塔頂嘅觀景餐廳，可以一邊品嚐精緻美食，一邊欣賞城市壯觀景色。

龍捲風塔獨特嘅漏斗形狀非常吸睛，一眼就認得出，亦被稱為 QIPCO 塔，樓高 52 層，向高空延伸接近 200 米。雖然大廈入面大部分地方租咗出去做寫字樓，但都有啲餐廳向公眾開放，當中包括壽司店同扒房。27 樓有間健身室，而 28 樓就有景觀一流嘅高級餐廳。

龍捲風塔位於多哈嘅西灣區。揸車去嘅話，地庫停車場車位充足。大廈外牆嘅燈飾蔚爲壯觀，成為首都天際線嘅一大亮點，夜晚遊覽就有機會睇到。

喺西德拉醫學及研究中心嘅正前方，有一件好出名嘅裝置藝術品，出自備受爭議嘅英國藝術家達米恩赫斯特 (Damien Hirst) 手筆。呢件作品叫做《奇蹟之旅 (The Miraculous Journey)》，由 14 座大型青銅雕塑組成，描繪人類由受孕到出世嘅全個過程。

赫斯特運用 5 至 11 米高嘅雕塑，生動重現人類出生嘅奧妙。雕塑面世初期曾經引來批評，飽歷分歧，但係而家已經得到廣泛讚揚。雖然場景嘅嚴酷現實主義可能令人咋舌，但作為公共藝術裝置的確夠哂吸睛，值得一看。

卡塔爾國家會議中心係區內最重要嘅活動場所之一，獨特嘅建築裡面設有多個頂尖劇院、會議廳同會議室，外觀設計就參照咗沙漠上一種叫做西德拉嘅樹。門廳嘅前面飾有舉世聞名嘅蜘蛛雕塑《馬曼 (Maman)》。

地區及國際頂級盛會都會喺呢個會議中心舉行，一場嚟到，睇返場 Show 都唔錯。由棟篤笑、公眾論壇，以至 Hello Kitty Live 音樂會同古典音樂，呢度咩都有得睇，記得提早 Check 吓有冇啱心水嘅節目。

蘇巴拉堡位於而家已經荒廢嘅同名城鎮附近，規模龐大，主要由 3 座巨型圓塔同 1 座長方形塔樓組成，喺 1938 年由謝赫阿卜杜拉建造，用作海岸軍駐地，嚟到今日就化身博物館，定期舉辦展覽，介紹區內歷史。

呢座堡壘坐落於卡塔爾半島嘅西北海岸，距離首都大約 105 公里，名列聯合國教科文組織世界文化遺產，好值得安排一日遊去觀光一番。不過要留意，景點可以遮蔭嘅地方唔多，記得要帶定零食同充足水份，最好避免喺中午同下晝最熱嘅時候嚟到。

巴爾贊塔嘅歷史可以追溯至 19 世紀末，當時豎立嘅目的係為咗保護附近山谷所收集嘅珍貴雨水。「巴爾贊 (Barzan)」嘅意思係「高處」，個名啱晒呢兩座超過 16 米高嘅瞭望塔。與此同時，塔樓亦會用於觀測月亮，幫助精準確定齋戒月嘅開始日期。

建築物嘅梯級同支柱結構非常宏偉，去到塔頂仲可以睇盡靚景，絕對係遊客打卡勝地。而且，塔樓距離多哈以北只有 14 公里，免費入場，點可以錯過？

姆謝里卜清真寺巧妙融合伊斯蘭同現代主義建築風格，線條簡潔，設計精確，令人讚不絕口。而且，呢座非凡建築採用當地石材同傳統技藝建造，充分善用陽光，日間完全唔需要人工照明。

寺外庭院呈現完美嘅正方形，周圍環繞柱廊，中間仲有一面寧靜池塘。由華麗嘅大門到通孔天花板同屏風，每個角落都會出現卡塔爾風格嘅優雅幾何圖案。夜幕低垂，華燈亮起，建築設計更加突出。參觀期間，記得留意祈禱時間，遵守當地習俗。

卡塔爾國立圖書館唔單止係國家圖書館，仲係研究型公共圖書館，裡面收藏咗超過 1 百萬本書，數碼資源數之不盡。會籍開放俾所有卡塔爾居民申請，亦歡迎遊客參觀。

圖書館位於多哈教育城，除咗藏書量龐大，每個月仲會舉辦多達 80 個對外開放嘅免費活動，種類豐富，包括編織班同藝術展覽等，應有盡有，相當吸引。而且，卡塔爾愛樂樂團每個月都會喺度舉行免費公演。圖書館網站有詳列各個月份嘅所有活動。

毫無疑問，卡塔爾嘅鴿子塔係全國最獨特、最有趣嘅景點之一，無論係遊客定當地人都好鍾意嚟打卡，而鴿子塔本身都有實際用途：呢度係成千上萬隻鴿嘅棲息地，原意亦係想收集鴿子嘅排泄物，俾當地農民當做肥料使用。

鴿子塔位於卡塔拉文化村嘅卡塔拉清真寺旁邊，採用傳統嘅伊斯蘭建築風格設計。單單係文化村就已經非常值得一遊，更加可以作為行程其中一站，同時參觀埋附近嘅景點，例如係圓形劇場、會議中心，甚至係海灘。