卡塔爾 10 大滋味美食 + 多哈覓食指南

卡塔爾燉菜 Saloona 係一款經典嘅阿拉伯燉菜，當地人經常喺屋企煮嚟做晚餐。你可以用你屋企有嘅任何食材嚟整，但通常都係以牛肉、羊肉或者魚做基本配料，再加入用蒜蓉同薑調味嘅時令蔬菜。最好配大量嘅麵包點湯汁一齊食。

Walima 將呢道菜同其他傳統卡塔爾菜加入現代演繹， 係一間非常時尚嘅現代餐廳，而且裝修以淺色同中東風格為主，例如彩色玻璃燈。佢哋嘅卡塔爾燉菜 (Saloona) 版本更豐富、更令人滿足，用雞肉做底，配上薄薄嘅青檸片更是一絕。

葡萄葉包飯係相當常見嘅中東菜式，而卡塔爾嘅版本就特別好味。葡萄葉包飯嘅常見配料，有切碎嘅牛肉或羊肉同飯，並以大蒜、胡椒同香菜調味。最好就係配新鮮檸檬片嚟享用呢道卡塔爾菜。

Shisha Garden 位於 La Cigale 酒店嘅庭院裡面，嚟呢度不但可以感受到寧靜氛氛，更可以遠離多哈市中心嘅煩囂。翠綠嘅植物同柔和嘅瀑布營造出清幽、寧靜嘅氛圍。呢度係休休閒閒咁享受小食 (例如葡萄葉包飯)、飲返杯咖啡或食水煙嘅好地方。

馬茲布斯係卡塔爾嘅國民美食，所以去到多哈一定要試。呢款美食通常係用羊肉或者雞肉整，經過慢煮，令到佢嘅風味更有層次。通常配有調味嘅飯，加上沙律同自家製蕃茄醬。

你幾乎可以喺多哈任何一間卡塔爾餐廳食到呢款菜式，但係 Majboos Al Walaida 嘅版本就更加特別。你唔單止可以食到經典嘅雞肉或者羊肉版本，亦可以揀相當美味嘅西紅魚或者係泥鯭，當然唔少得有熱情好客同專業嘅員工服務你。Majboos Al Walaida 係一間外賣餐廳，為大家供應完美嘅街頭美食晚餐，等你可以盡情享受多哈充滿活力嘅夜生活。

雞粥係一種鹹味嘅米粥，一日三餐都可以食。雞粥係用牛奶、牛油、豆蔻同雞肉煮，有時仲有豆，然後慢煮幾個鐘，直至變成濃厚嘅質地。唔同地方都有特別嘅做法，但係配料通常會有豆蔻酥油或者炸洋蔥。

喺 Souq Al Wakrah 如同迷宮一樣嘅庭院同小巷，係品嚐呢道傳統菜嘅好地方。Café Easir 位於海濱附近非常涼爽嘅黏土建築入面，供應一系列卡塔爾小食同美食，包括極之美味嘅雞粥。

庫薩馬希係中東釀西葫蘆菜式，餡料係羊肉碎同蔬菜，仲用番茜同薄荷調味。而且大部分多哈餐廳都為素食者提供鷹嘴豆版本。將佢哋浸喺蕃茄膏或者乳酪，就可以品嚐到完整嘅美食體驗。

喺 Al Shami Home Restaurant 餐廳食飯，係一個非常獨特嘅體驗。餐廳裝修令你好似身處傳統嘅阿馬齊格帳篷裡面，天花板掛住好多布料，仲有個大理石噴泉。呢度嘅正宗庫薩馬希味道豐富，同時份量十足。

小甜球係卡塔爾周圍都可以見到嘅甜品，係用小荳蔻同藏紅花調味嘅甜餃子，經過油炸再淋上糖漿，食落有啲似冬甩。最理想嘅小甜球，就係外脆內軟。

Chai Halib 嘅小甜球有多種口味，由非常傳統嘅棗、甚至係非常創新嘅朱古力 Snickers 都有。呢間咖啡館係由一間傳統嘅阿拉伯茶室改建而成，佢哋嘅小甜球同濃烈嘅阿拉伯咖啡，簡直係絕配。

Umm Ali 係一種非常代表到埃及文化嘅甜品，但係卡塔爾有當地同樣咁好味嘅款式。佢同麵包布甸好似，用提子乾、切碎嘅果仁同甜牛奶整成，焗到表面啡色脆脆地，然後灑上肉桂粉。呢個可能係其中一種卡塔爾最甜嘅甜品。

即使 Karaki 專門製作以佢個名命名嘅甜 Karak 茶，但佢哋嘅甜品同糕點都一樣咁出名。呢度嘅 Umm Ali li 非常濃厚同紮實，有好多果仁同香料混合埋一齊。

Khanfaroosh 係介於餅乾和蛋糕之間嘅美食。用玫瑰水同藏紅花製作嘅麵團先炸過，然後再灑上糖霜或者蜂蜜。玫瑰水令甜品有少少花香同細緻嘅香味。

Hawn Café 嘅餐牌唔係好多選擇，但幾乎所有嘢都做得好出色。khanfaroosh 亦都唔例外，因為佢會炸到外面脆脆地，然後完全浸喺蜂蜜裡面。喺咖啡廳其中一個高高嘅拱形窗邊搵個位坐低，嗌一碟呢款當地小食同薄荷茶，然後睇下周圍發生嘅事。

你可以喺 rogag 睇到印度對卡塔爾菜嘅影響，一層薄薄嘅麵漿，類似多薩， 裡面可以加入肉、蛋或者係蔬菜。呢個係一款傳統嘅早餐，但係全日都可以食呢款好味嘅特色菜，鍾意食甜嘢嘅人可以揀芝士同蜂蜜。

Shay Al Shoomos 嘅 rogag 供應多種配料。雞蛋配百里香特別好食。呢間位於瓦基夫市集 (Souq Waqif)、環境舒適嘅餐廳全日都好受歡迎，你可以透過開放式廚房睇住啲食物新鮮整好，然後送到你張枱度。嗌一壺甜茶，享受完美嘅地道卡塔爾早餐。

庫納法係一種傳統甜品，喺中東各地都好受歡迎，有啲由佢啟發嘅類似甜品都成為咗歐洲美食。聽聞呢款甜品係喺齋戒月期間發明，甚至係埃及醫生開俾太過餓嘅哈里發。由於佢係一款有一層糖衣同融化芝士嘅酥皮，所以呢個故事好可信。

雖然庫納法傳統上是一種開齋飯美食，但你全年都可以搵得到。喺多哈，其中一個品嚐甜品嘅好地方就係 Al Aker Sweets ，呢間店位於瓦基夫市集 (Souq Waqif) 嘅中間。如果你想食再甜啲，就一定要試佢哋嘅 Nutella 庫納法。