卡塔爾 10 大節慶
卡塔爾最佳年度慶典
卡塔爾全年舉辦各種萬眾期待嘅節慶同活動。部分節慶反映咗呢個國家豐富嘅文化底蘊，亦有一部分展現佢井然有序的嘅現代性同國際視野。
從奔騰嘅駱駝到廚藝高超嘅名廚，從阿拉伯帆船 (Dhow) 排列於岸邊嘅寧靜風景到令人眼花繚亂嘅煙花表演，呢度嘅節慶體驗實在多姿多彩。卡塔爾嘅活動既會頌揚宗教信念，亦會歌頌突破界限嘅藝術家。攞個日曆出嚟記低啲重要日子，睇吓下次去卡塔爾參加邊個精彩節慶啦。
沙哈尼亞駱駝比賽
終極沙漠運動
- 拍照
- 歷史文化
- 非一般行程
卡塔爾嘅駱駝比賽已經發展咗幾百年，而家已經成為一項價值幾百萬美金、競爭激烈嘅競技運動。呢項運動運用遙控「騎師」騎駱駝，以獨特嘅方式將傳統與現代技術融合。
10 月到 2 月逢星期五都有賽事，而主要賽事就喺 3 月同 4 月進行。喺 4 月嘅 HH 埃米爾大賽 (HH the Emir’s Main Race) 贏得冠軍嘅話，可以獲得金劍獎 (Golden Sword) 呢個全國榮譽。比賽喺多哈-杜漢 (Doha-Dukhan) 高速公路上嘅沙哈尼亞駱駝比賽徑 (Al Shahaniya Camel Racing Track) 舉行，距離多哈市中心約 1 小時車程。
延伸閱讀
卡塔爾國際藝術節
欣賞搶眼藝術品，與藝術家交流
- 伴侶
- 經濟實惠
卡塔爾國際藝術節 (Qatar International Art Festival) 於 10 月下旬或 11 月初舉行，為期 6 日，為世界各地嘅藝術家提供表現自己同創意交流嘅平台。活動包括現場繪畫示範、工作坊、研討會、時裝表演同展覽，吸引超過 200 位藝術家參加。
藝術節於卡塔拉文化村 (Katara Cultural Village) 舉行，有意參加嘅藝術家可以提前申請，而公眾可以免費參觀展覽同欣賞現場繪畫示範。
卡塔拉傳統阿拉伯帆船節
標誌性嘅阿拉伯帆船同大家見面
- 拍照
- 歷史文化
- 經濟實惠
幾個世紀以嚟，阿拉伯帆船 (Dhow) 帶領水手遊遍阿拉伯海域同其他地區，而卡塔爾每年都會喺多哈嘅卡塔拉文化村 (Katara Cultural Village) 舉辦傳統阿拉伯帆船節 (Traditional Dhow Festival)，紀念呢種宏偉嘅帆船。帆船節通常喺 12 月舉行，
展出大約 70 艘不同大小、採用傳統設計嘅帆船；參加者仲可以參觀藝術展覽，同埋欣賞以海洋為主題嘅煙花表演。到時嘅傳統市集亦會販賣海洋相關嘅產品、手工藝品同食品。只要俾少少錢，就可以坐上阿拉伯帆船出海 30 分鐘，前往卡塔爾之珠 (The Pearl)，沿途欣賞如畫風光。
相片由 Alex Sergeev 提供 (CC BY-SA 3.0) (經修改)
多哈文化節
深入了解卡塔爾嘅習俗同歷史
- 家庭
- 拍照
- 歷史文化
多哈文化節 (Doha Cultural Festival) 係卡塔爾一項重要活動，各種當地傳統同藝術百花齊放。呢個地區嘅文化同創意，通過音樂表演、舞蹈、攝影、藝術展覽等大放異彩。當中最受歡迎嘅表演節目就係唱歌同詩歌朗誦，由此可見呢個國家口耳相傳嘅傳統相當豐富。文化節嘅活動喺多哈多個地點舉行，經過精心設計嘅表演節目務求滿足一家大細嘅口味。
卡塔爾王子殿下哈馬德 (Al Sheikh Hamad Ben Khalifa Al Thani) 每年都會親自主持活動。文化節每年 2 月或 3 月舉行。
開齋節
齋戒月尾聲嘅節慶活動
- 家庭
- 歷史文化
齋戒月係卡塔爾全國都會舉行嘅宗教慶祝活動，經過 1 個月嘅齋戒、祈禱同反思之後，以為期 3 日嘅開齋節節慶活動結束。開齋節係卡塔爾嘅公眾假期，等大家好好聚首一堂，一齊享用開齋餐。雖然有啲公司會暫停營業，但係全國各地都掛滿燈飾同彩旗，仲有晚間煙花表演，節日氣氛滿瀉。
家庭通常都會喺自己屋企慶祝，同時好多當地餐廳同酒店為咗體現節日嘅慷慨精神，都會提供折扣、特別套餐同活動。伊斯蘭曆中閃瓦魯月 (Shawwal) 嘅第一日就係開齋節，每年嘅日子都唔一樣。
卡塔爾國際美食節
創意美食，名廚坐陣
各位為食貓同埋鍾意飲飲食食嘅遊客，一定要喺 3 月或者 4 月去卡塔爾旅行，去一年一度嘅卡塔爾國際美食節觀摩，品嚐由世界各地嘅廚師烹調嘅絕妙佳餚。活動包括著名廚師現場烹飪表演、健康食品工作坊、農貿市集，仲有親自到農場採摘嘅體驗。當地廚師同企業家當然亦會把握機會，喺美食節展現實力。
美食節每年都有唔同主題，並配以貼題嘅現場表演同娛樂活動。美食節多年嚟曾經喺卡塔爾唔同地方舉行，包括多哈嘅卡塔爾之珠 (The Pearl) 同氧氣公園 (Oxygen Park)。