卡塔爾 10 大好玩活動

行博物館、欣賞建築、發掘隱世歷史遺跡，都係卡塔爾嘅精彩活動。再加上乾燥沙漠連綿萬里，寧靜嘅私人海灘遍佈波斯灣悠長嘅海岸線，沙漠飆沙又咁刺激，你專屬嘅卡塔爾探險秘訣一秒到手。

由首都多哈嘅壯觀摩天大樓同獨特建築，到沙漠探險、購物遊覽、街頭巷尾展現嘅阿拉伯文化，以下為你推介卡塔爾最引人入勝嘅活動。

卡塔爾有啲乜最好玩？

1. 沙漠探險觀光團

起伏嘅沙丘同壯觀嘅內海

推介： 家庭, 拍照, 遊歷

參加多哈嘅沙漠探險觀光團，就可以喺優美嘅沙漠地帶度過刺激嘅一日。起伏有致嘅沙峰，點綴住南部嘅梅薩伊德沙漠，而駕駛全地形車或者四驅車馳騁「沙場」，的確令人振奮。

再向南行，就會去到豪爾艾阿戴德內海，可以欣賞海洋同沙漠交匯嘅景色，超凡脫俗。而且，你仲可以參加騎駱駝之旅，體驗傳統嘅交通方式。如果想去沙漠探險，最好跟團出發，由熟悉沙丘地形嘅導遊帶領。

2. 祖巴拉考古遺址

卡塔爾近代歷史嘅真實呈現

推介： 歷史文化, 拍照

如果「認識歷史」都係你卡塔爾行程嘅一環，咁就一定要參觀祖巴拉考古遺址。位處古蹟核心嘅城堡喺 1938 年建成，而沙馬爾沿海小鎮嘅歷史就可以追溯至 1760 年代，展現出卡塔爾早年珍珠貿易嘅全段動人故事。

呢個聯合國教科文組織世界文化遺產距離多哈以北 100 幾公里，要 1 個鐘車程先去到，但係穿梭沙漠沿途嘅風景優美，一秒就帶你「回到過去」。漫步祖巴拉考古遺址旁邊嘅阿爾朱梅爾廢棄村莊，歷史一課畫上圓滿句號。

位置： 卡塔爾祖巴拉

查看附近住宿

3. 香蕉島

豪華海島度假村

推介： 伴侶, 家庭, 豪華住宿

香蕉島距離多哈只有 20 分鐘路程，有別於市中心嘅煩囂，為你送上另一番景象。登上豪華遊艇之後，你會穿越碧藍海水，踏足私人海灘，赤腳踩沙玩水。呢座私人島嶼歸安納塔拉連鎖酒店擁有，但係就算唔住嗰度，都可以買張日票玩餐飽。

由超好味嘅阿拉伯美食、到服務周到嘅職員，呢座幽靜島嶼主打「世界一流服務」。橫跨水面到水底，活動多籮籮，你可以搭明輪船、試玩電動快艇滑水，又或者靜靜哋望住小朋友瀡滑水梯。

位置： Banana Island Resort Doha by Anantara, 23919, Doha, Qatar

立即預訂

4. 世界級體育賽事

多項運動嘅世界頂尖運動員

推介： 家庭, 伴侶

由足球、板球，到賽馬、手球，甚至賽駱駝，卡塔爾舉辦嘅世界級體育賽事豐富多樣，全年無休。講到促進運動文化嘅催化劑，要數 2006 年嘅亞運會。自此之後，卡塔爾籌辦嘅賽事一年比一年更盛大、更豪華。

卡塔爾坐擁幾個世界一流嘅運動場，海濱觀賽區視野廣闊，無論你想喺哈利法國際運動場感受足球熱烈氣氛，定係去多哈濱海大道為游泳選手打氣，都一定睇得盡興。其中最出名嘅比賽，包括 2019 年世界沙灘運動會，同埋 2022 年 FIFA 世界盃。

5. 謝赫費薩爾博物館

卡塔爾兼容並蓄嘅歷史面貌

推介： 歷史文化

謝赫費薩爾博物館係全中東地區最獨特嘅博物館之一，珍藏過去歷代嘅文物，數量龐大，當中嘅有形寶藏包括嚟自世界各地嘅舊式車輛，同埋充滿異國情調嘅手工編織地毯。

想行勻呢個娛樂景點，至少要預留 2 個鐘。不妨放慢腳步，探索謝赫費薩爾嘅個人珍藏，另外仲有私人收藏嘅書法、蒸汽動力車輛、地毯同傳統服裝，豐富多彩。

位置： Dukhan Road, Al Shahaniya, Qatar

開放時間： 星期一至星期四 09:00 至 17:00；星期五 14:00 至 19:00；星期六 10:00 至 18:00 (逢星期日休館)

電話： +974 4490 2340

查看附近住宿

6. 阿爾達基拉紅樹林

撐橡皮艇穿越海岸綠茵

推介： 家庭, 拍照, 遊歷

城市氣氛熾熱得滯，想唞一唞嘅話，不妨去位於壯觀紅樹林海灣嘅阿爾達基拉紅樹林行一轉。而要探索阿拉伯呢片叢林，最好嘅方式就係登上橡皮艇。

沿住卡塔爾東北海岸撐船途中，一定要將礁鷺、燕鷗以至蒼鷺等野生動物嘅身影盡收眼底。運氣夠好嘅話，話唔定仲會見到一兩條魚跳出水面。事實上，阿爾達基拉係大受歡迎嘅釣魚熱點，不過最好喺朝早或者傍晚去，避開日間熱浪。

位置： Mangrove Bay, Al Dhakira, Qatar

查看附近住宿

7. 富威里特海灘

長途跋涉都值得

推介： 拍照, 經濟實惠, 遊歷

富威里特海灘係卡塔爾最靚嘅海灘之一，距離多哈以北近 100 公里，雖然人氣爆燈，但就冇交通工具可以直接去到，遊客要做好「越野駕駛」嘅心理準備。富威里特海灘嘅海域好淺水，海浪輕柔拍打岸邊，就連新手都可以游得暢快又安全。

海灘有啲地方比較崎嶇，但大多數區域都平坦宜人，曬日光浴最 Chill。留意返以下重點：海灘一年之間有某啲日子 (通常係 4 月至 8 月) 會暫停開放，俾玳瑁海龜築巢。

位置： Al Ghārīyah, Qatar

查看附近住宿

8. 艾華卡拉市集

沉浸喺卡塔爾傳統市集文化之中

推介： 購物, 歷史文化, 美食

艾華卡拉市集嘅鵝卵石巷仔蜿蜒彎曲，通往閃閃發光嘅庭院。除咗傳統阿拉伯建築、令人眼花繚亂嘅清真寺、同埋賣香料手信嘅攤檔之外，你仲可以任揀一間舊式餐廳，坐低食嘢唞下。

艾華卡拉市集嘅奇幻氣氛容易令人迷醉，如果你想搵個地方靜靜哋思考人生，可以去隔離嘅海濱鬆一鬆，回味下啱啱買到嘅獨特手信，同時欣賞岸邊停泊嘅傳統單桅帆船。

位置： Al Wakrah, Qatar

查看附近住宿

9. 豪爾艾阿戴德內海

沙丘飆沙、觀賞野生動物嘅好地方

推介： 拍照, 遊歷

鍾意探險嘅你，一定要參加豪爾艾阿戴德內海一日遊，飽覽壯麗景色。呢片海域坐落喺卡塔爾嘅壯闊沙漠之中，活動豐富好玩，由傳統嘅海灘騎駱駝，到喺阿拉伯灣撐艇仔，樣樣都令人難忘。

內海風景如畫，影相打卡效果冇得頂，靚人靚景一定令親朋好友羨慕到極。臨走之前，記得要揸車沿海濱穿越金黃色沙丘，睇盡醉人海景，行程先算圓滿。豪爾艾阿戴德內海係聯合國教科文組織認可嘅自然保護區，當地嘅動植物不容錯過。

位置： Khawr al Udayd, Qatar

查看附近住宿

10. 艾加沙西亞岩雕藝術遺址

據稱有過千年歷史嘅藝術品

推介： 歷史文化, 拍照

嚟到卡塔爾北部嘅艾加沙西亞岩雕藝術遺址，魚類身影、腳印同船舶標記統統封存喺岩畫之中，別樹一格。艾加沙西亞曾經係石灰岩礦場，當中嘅石刻作品對於卡塔爾嘅傳統文化無比貴重，地位同國內林立嘅清真寺、博物館同市集一樣崇高。

呢片古蹟距離多哈以北 60 公里，位於卡塔爾沙漠嘅開闊地帶，至今基本上冇乜受過破壞，景象令人難忘。如果你請埋當地導遊帶團遊覽，唔使幾耐就可以充分認識大約 900 件雕刻品，了解到形形色色作品所描繪嘅卡塔爾傳統生活風情。

位置： XC24+J9W, Sidriyat Al Kheesah, Qatar

查看附近住宿

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。