多哈 10 大夜蒲活動

望住多哈嘅天際線，你會見到嘅係一個充滿摩天大廈嘅現代城市。但係喺瓦基夫市集 (Souq Waqif) 嘅小巷行吓，你又會覺得自己好似返咗去以前咁。呢啲充滿特色嘅街道有好多阿拉伯歷史建築傑作、傳統街頭攤檔同高級餐廳。

當炎炎夏日過去，嚟到涼爽嘅夜晚時，瓦基夫市集 (Souq Waqif) 就會熱鬧起嚟。喺呢度，你可以買到當地嘅手工藝品、欣賞街頭表演、睇下獵鷹市場，同埋參觀藝術館。如果你想感受當地文化，建議你花幾個鐘探索瓦基夫市集 (Souq Waqif) 四周圍嘅小巷。

好多人都知道多哈有唔同國家嘅環球美食，如果你想喺環境光猛同友善嘅氣氛度過美好一晚、品嚐令人流晒口水嘅美味菜式，咁就要去 Sazeli Qatar 啦。餐廳座落喺麥迪納市中心 (Medina Centrale) 嘅便利地段，就喺 The Pearl 嘅精彩夜生活心臟地帶。

佢哋專門供應正宗嘅土耳其美食，你一定唔會對佢哋多汁嘅科夫塔肉丸或鐵鍋烤肉失望。食飽之後，你可以喺佢哋色彩繽紛嘅優雅樓上休息室坐多陣，佢哋有大銀幕播放足球比賽，不妨喺度嘆番杯優質嘅啤酒，又或者試下水煙。

如果你鍾意日落景色，應該喺多哈旅行嘅時候出海。當你啱啱出發嗰陣，可能要忍受一下炎熱嘅氣溫，但係當開始入夜，你就會慶幸自己喺傳統嘅單桅帆船上面。大部分嘅河上遊嘅行程都係大約 2 個鐘，就啱時間準時出發，就可以睇到日落。

如果想體驗傳統嘅遊船河體驗，可以去 Corniche — 嗰度嘅木製單桅帆船會用唔同顏色嘅燈光照亮水面。想享受更高級嘅體驗，包埋高級餐飲嘅話，就要去卡塔爾珍珠島；嗰度嘅遊艇有好多都有大玻璃窗、又有冷氣，更加有會議廳式座位嘅開放式甲板。

要欣賞經典嘅多哈天際線嘅日落，最好嘅地方一定係 La Cigale Hotel 嘅 Sky View。當然，佢嘅室內貴賓廳都好靚，但係室外露台更加令人驚嘆。坐喺型格嘅皮凳又或者鮮艷嘅黃色木桶凳上面，不妨飲番杯招牌 Sky Cocktail 雞尾酒，一邊享受靚到難以置信嘅城市美景。

如果你偏好休閒輕鬆嘅氣氛，可以早少少嚟食美味嘅壽司，同埋享受歡樂時光優惠。鍾意參加派對嘅你，多哈最好嘅 DJ 音樂清單同現場樂隊定可滿足你，俾你跳舞跳到清晨。記得要著輕鬆休閒服裝，同埋要預先預約，先可以有呢一段精彩難忘嘅回憶。

多哈有多間運動主題酒吧，你絕對唔會因為旅行而錯過世界體育盛事嘅最新消息。由於喺公眾地方飲酒係犯法嘅，所以你只可以喺酒店入面搵到大部分嘅體育酒吧，例如 Radisson Blu 酒店、Sheraton 酒店同 Vacation Inn。

位於多哈市中心 Marriot Marquis 酒店裡面嘅 Champions，係一間屢獲殊榮嘅運動主題酒吧，裡面有多部大型平面電視，播放住世界各地嘅頂級體育盛事。想要緊貼一級方程式賽車、板球同 NFL 呢啲體育賽事嘅最新消息？Champions 就係不二之選 — 呢度連住 DECC 地鐵站，因此大受歡迎。

喺夜晚想遠離人群同埋享受刺激嘅活動，最好就係去卡塔爾沙漠嚟次沙丘冒險。與其騎住駱駝喺荒蕪沙漠慢慢行，不如揸住越野四驅車喺沙丘上面暴走。呢段刺激車程，你唔單止可以睇到令人嘆為觀止嘅風景，仲可以去到珍珠咁白嘅海灘。有啲旅行團仲會帶你去多哈以南大約 80 公里嘅 Khor Al Udaid 水域游吓水。

想體驗非常顛簸嘅旅程？唔好怕醜，即管同你嘅司機講，佢哋會好樂意喺星光閃閃嘅星空下，帶你去感受刺激緊張嘅沙漠體驗。大部份嘅夜間旅行團需時大約 5 個鐘，由晏晝 2 點至 3 點之間出發。

卡塔爾珍珠島係多哈嘅一個人工島嶼，面積 130 平方公里。呢個島出名住咗好多有錢嘅多哈居民。呢度嘅餐廳雖然出咗名好貴，但係都係最好嘅高級餐廳。除咗有幾十間海邊餐廳供應嚟自世界各地嘅美食之外，你仲可以喺「Arabian Riviera」搵到高級精品店、超級跑車陳列室同沙灘俱樂部。

就算你唔打算喺卡塔爾珍珠島嘅餐廳享受美食或者去名牌店購物，你都應該參觀一下令呢個島獨一無二嘅別墅、高級住宅大廈同地中海式碼頭。

多哈嘅天際線無論從咩角度睇都係咁壯觀，但係置身喺多哈海濱大道 (Doha Corniche) 呢個城市嘅海濱長廊，你就可以睇到最靚、最啱影相嘅城市景色。多哈海濱大道係一個非常受當地人歡迎嘅地方，大家都會喺涼爽嘅夜晚嚟呢度，呢度有開到好夜嘅景點，例如伊斯蘭藝術博物館。

由於呢度有適合一家大細一齊嚟玩嘅綠色空間、高級餐廳、遊輪旅程，所以海濱大道都係多哈最人氣嘅旅遊景點之一。日落之後，Set 好部相機，影低呢個城市即將出現嘅摩天大樓金色燈光、喺水面上反射嘅靚景。

相當出名嘅地中海連鎖餐廳 Bagatelle，深知卡塔爾有啲咩係最特別，又吸引遊客嘅地方，所以佢哋決定喺 Al Maha 島嘅心臟地帶，開設高級餐廳 Bagatelle Beach Club Doha 。無論係喺高科技、地方寬敞嘅餐廳、涼爽嘅露台，又或者喺私人沙灘用餐，都非常適合嚟 Al Maha 島過一個極難忘嘅精彩晚上。

你可以喺開揚嘅泳池浸下水，然後品嚐受法國里維埃拉啟發嘅精緻美食，再配杯水果雞尾酒就更完美啦。趁住 Party Time，可以順便投入 DJ 或者樂隊精心挑選嘅音樂，甚至可能有現代舞表演欣賞。一場嚟度，記得要欣賞一下極迷人嘅岸邊景色。