卡塔爾 11 個必去美術館同博物館
探索卡塔爾歷史、藝術 + 文化
卡塔爾熱愛藝術，更加係全球最豪氣嘅當代藝術品買家，你可以行勻哂全國最出色嘅美術館同博物館，探索傳統文化同具爭議嘅藝術品，了解卡塔爾嘅豐富歷史。由阿拉伯書法、點線旋轉畫到大型青銅雕塑，卡塔爾嘅藝術同歷史受到傳統加海外文化嘅影響。
講到底，藝術家嘅終極目標都係透過現代藝術挑戰卡塔爾嘅傳統觀念，令卡塔爾晉身中東藝術樞紐兼文化之都。近年，隨住多哈藝術同博物館展覽空間增加，卡塔爾嘅文化日漸蓬勃發展。以下介紹嘅頂級畫廊同博物館，正好體現出卡塔爾嘅文化同歷史。
卡塔爾邊啲美術館同博物館最好行？
1. 姆謝里卜博物館
4 座古屋訴說多哈捕魚歷史
推介： 歷史文化, 拍照
姆謝里卜博物館介紹多哈昔日作為樸實小漁村嘅歷史。呢間博物館向位於市內古區嘅 4 座歷史建築致敬，分別係本耶爾穆德樓、企業樓、穆罕默德本賈西姆樓同拉德瓦尼樓。
每座建築都重點介紹卡塔爾唔同方面嘅歷史，包括古代奴隸制、石油同天然氣嘅發現、傳統文化，同埋阿拉伯灣各國發展。參觀完博物館之後，你仲可以去埋館內嘅禮品店同餐廳，品嚐卡塔爾現代美食。
位置： Msheireb Downtown Doha, Doha, Qatar
開放時間： 星期一至星期四 09:00 至 17:00；星期五 15:00 至 21:00；星期六 09:00 至 17:00 (逢星期日休館)
電話： +974 4006 5555
姆謝里卜博物館
2. 卡塔爾國立博物館
感受卡塔爾歷史嘅心跳
推介： 歷史文化, 拍照
卡塔爾國立博物館資訊豐富，帶你深入了解卡塔爾嘅歷史。呢座建築奇觀位於多哈濱海大道旁邊，設計宏偉又充滿活力，更加坐擁海灣嘅壯麗景色。
全館分為三個部分去講述卡塔爾嘅獨特故事：昔日卡塔爾、卡塔爾日常生活，同埋卡塔爾現代史。其中，巴羅達珍珠地氈飾有 150 萬粒手工刺繡珍珠、藍寶石同鑽石，係全館最出名嘅展品。不妨順道去埋博物館外打理完善嘅公園，欣賞卡塔爾本土植物。完成參觀行程之後，返到館內嘅 Cafe 仲可以品嚐傳統美食。
位置： Museum Park St, Doha, Qatar
開放時間： 星期六至星期四 09:00 至 19:00；星期五 13:30 至 19:00
電話： +974 4452 5555
卡塔爾國立博物館
3. 伊斯蘭藝術博物館
展現 1,400 年伊斯蘭文化
推介： 歷史文化, 拍照
卡塔爾嘅伊斯蘭藝術博物館 (簡稱 MIA) 古今交融，以石灰岩建造而成，係多哈海濱嘅地標建築，入到去就算未睇到宗教展品，都已經感受到藝術同伊斯蘭文化嘅聯繫。
MIA 博物館收藏咗源自 3 個大陸歷史超過 1,400 年嘅伊斯蘭工藝品，每件作品都揉合咗中東同亞洲各地嘅傳統風格技藝，各自承載唔同嘅故事，帶領遊客以視覺方式了解卡塔爾多個世紀嘅發展。博物館仲設有圖書館，收藏咗嚟自世界各地 15,000 幾份稀有手稿同文本，當中包括 7 世紀嘅可蘭經。
位置： Doha Port, Doha, Qatar
開放時間： 星期六至星期四 09:00 至 19:00；星期五 13:30 至 19:00
電話： +974 4422 4444
伊斯蘭藝術博物館
4. 馬特哈夫：阿拉伯現代藝術博物館
世界一流嘅阿拉伯當代藝術珍藏
推介： 歷史文化, 拍照
馬特哈夫：阿拉伯現代藝術博物館位於多哈教育城，由舊校舍改建而成，25 年以嚟收藏咗 9,000 件珍品，件件都印證住卡塔爾社會嘅變遷，展品數量係全區最多。
要數博物館最出名嘅展覽，又點少得「霍魯菲亞 (Horoufiyah)」阿拉伯字母書法藝術？你可以參加免費導賞團，由導賞員為你介紹每件收藏品背後嘅故事。唔知點去博物館？好彩可以搭免費穿梭巴士直達，夠哂方便。
位置： Education City, Doha, Qatar
開放時間： 星期五 13:30 至 19:00；星期六至星期四 09:00 至 19:00
電話： +974 4402 8830
馬特哈夫：阿拉伯現代藝術博物館
5. 卡塔拉藝術中心
去熱鬧村莊欣賞新穎藝術
推介： 歷史文化, 拍照
卡塔拉藝術中心被譽為文化樞紐，帶你探索非傳統藝術。顧名思義，呢間藝術中心位於卡塔拉文化村，展品涵蓋現代同新穎藝術，而村內嘅藝術空間仲持續發展緊。雖然每件藝術品所用嘅媒介不盡相同，但係大多數都採用咗跨媒介嘅表達方式。
卡塔拉藝術中心會舉辦藝術活動同展覽，幫助阿拉伯地區嘅新晉藝術家建立本地同國際網絡。同場仲定期有講座、課程同工作坊，活動主題眾多，由基本嘅毛筆書法同再生藝術、再到漫畫泥塑都應有盡有。
位置： Katara Cultural Village, Building 5, Doha, Qatar
開放時間： 星期六至星期四 09:30 至 16:30 (星期五休息)
電話： +974 4408 0244
卡塔拉藝術中心
6. 謝赫費薩爾博物館
體驗謝赫費薩爾對卡塔爾藝術嘅熱愛之情
推介： 歷史文化, 拍照
謝赫費薩爾博物館盛載住卡塔爾一位成功商人嘅私家藝術珍藏，場館好比文化莊園，位於阿爾薩姆里亞農場裡面，外牆採用本地石頭砌成，配搭傳統砲塔，望上去好特別。
館內展出咗 50 幾年來喺 4 大洲收集嘅藝術品，件件珍藏都呈現侏羅紀時代到今時今日嘅伊斯蘭同卡塔爾風俗。全館設有 15 個展廳，收藏咗 15,000 件文物，並分為四個主題：伊斯蘭藝術、車輛、硬幣同貨幣，仲有卡塔爾文物。你會喺館內欣賞到珍寶古物、化石、稀有硬幣、手稿同紡織品。
位置： Dukhan Road, Al Shahaniya, Qatar
開放時間： 星期一至星期四 09:00 至 17:00；星期五 14:00 至 19:00；星期六 10:00 至 18:00 (逢星期日休館)
電話： +974 4490 2340
謝赫費薩爾博物館
7. 維珍尼亞聯邦大學卡塔爾藝術館
由學術角度探索卡塔爾藝術
推介： 歷史文化, 拍照
維珍尼亞聯邦大學，又名為卡塔爾 VCUarts，係維珍尼亞州著名藝術學校嘅中東分校。呢間大學係教育城入面，教育城嘅面積有 12 平方公里，裡面有 多間教育機構。雖然展覽會喺校園裡面舉行，但係全部都向公眾開放。
VCUarts 係一間研究暨教育中心，係卡塔爾最好嘅平面設計、室內設計兼藝術史嘅教育機構。呢度收藏咗包括國際藝術家、VCU 學生同教職員嘅藝術品。當中好多作品都係從學術角度去欣賞藝術。如果你自己冇揸車，咁去 VCUarts 嘅路程可能就有啲複雜，所以最好事前規劃路線。
位置： Al Luqta St, Education City, Doha, Qatar
開放時間： 星期日至星期四 09:00 至 17:00；星期六 10:00 至 16:00 (星期五休息)
電話： +974 4402 0555
維珍尼亞聯邦大學卡塔爾藝術館
8. 多哈嘅公共藝術
世界級街頭藝術
推介： 拍照, 經濟實惠
當你喺多哈四周圍行嘅時候，會見到一啲當地同國際藝術家創作嘅夢幻現代藝術。佢哋係由卡塔爾博物館公共藝術部策展，好多藝術家都努力為雕塑藝術作出貢獻，當中包括 Damien Hirst 嘅 The Miraculous Journey 同 Louise Bourgeois 嘅 Maman。
其他著名嘅多哈公共藝術包括 El Seed 嘅塗鴉同 Anne Geddes 嘅攝影作品。多哈唔同地方都有好多由當地藝術家創作，充滿活力嘅街頭壁畫，係 Jedariart 收藏嘅一部分，由抽象到傳統嘅阿拉伯書法作品都可以見到。
9. 消防局藝術之家
由當地新興藝術人才創作嘅新藝術作品
推介： 歷史文化, 拍照
消防局藝術之家係卡塔爾消防隊曾經佔用嘅民防大廈，而家係多哈主要嘅藝術中心之一。呢個空間再利用嘅藝術場地獲得卡塔爾酋長本人嘅贊助。
博物館非常光猛嘅畫廊收藏咗前衛作品同關於社會議題嘅展覽。呢度仲會舉辦一個為期 9 個月嘅藝術家駐場計劃。博物館有一間叫 Cafe # 999 嘅咖啡店，供應各式各樣嘅有機同冇麩質食物同飲品選擇。一邊欣賞西灣嘅寧靜景色，一邊品嚐當地出名嘅駱駝漢堡包。
位置： Mohammed Bin Thani St, Doha, Qatar
開放時間： 星期六至星期四 09:00 至 19:00；星期五 13:30 至 19:00
電話： +974 4422 4222
消防局藝術之家
10. 東翼 (East Wing)
透過鏡頭創作嘅藝術
推介： 歷史文化, 拍照
喺卡塔爾藝術界，多哈嘅東翼係以國際當代攝影同實踐平台而聞名。東翼冇一個常規展覽實體空間嚟展示全部藝術品，而係城市唔同嘅場地，又有大量由藝術愛好者舉辦嘅藝術活動同展覽。上佢哋嘅網站，緊貼活動嘅最新消息。
展覽主要係網上舉辦，專門涵蓋攝影、錄像同其他特別嘅出版刊物。主要目標係展示同社會相關同發人深省嘅攝影作品。東翼支持當地同國際嘅新興藝術家。
位置： (Various venues) Doha, Qatar
11. 阿尼瑪畫廊 (Anima Gallery)
卡塔爾嘅當代藝術場景
推介： 歷史文化, 拍照
阿尼瑪畫廊每年舉辦 2 場當代展覽。畫廊位於多哈海岸附近嘅人造島上，展示咗好多種風格同藝術形式，包括畫、雕塑同版畫。除咗當地、地區和國際藝術品外，展覽仲包括為專業人士、學生和參觀者舉辦嘅畫廊講座同演講。
阿尼瑪有一個網上畫廊，你可以上網睇到你喺實際場地入面會見到嘅藝術品。參觀完藝術館之後，可以去館內嘅 Anima Lounge ，呢度係一間時尚嘅餐廳，你可以喺嗰度睇到國際藝術品同享受美食。
位置： 27 th floor, Alfardan Twin Towers, West Bay, Doha, Qatar
開放時間： 需提前預約
電話： +974 4002 7437
阿尼瑪畫廊 (Anima Gallery)
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。