艾華卡拉 5 大超正玩樂活動

艾華卡拉市集活力四射，你可以喺呢度買手信、去地道 Cafe 食下嘢，再沿住海濱長廊散步，而街道兩邊仲有唔少海岸餐廳同當地攤販，俾你過足「行街癮」。市集氣氛質樸，當地人同遊客都會買返啲手作產品，感覺好似時光倒流一樣。

艾華卡拉市集揉合傳統建築同廣場佈局，行街體驗正宗地道，氣氛輕鬆，啱哂你同屋企人、朋友仔度過悠閒一日。而且，大人細路都鍾意嘅海岸海灘就喺幾分鐘路程之外，反方向行一小段路仲會去到艾華卡拉大街。

想喺艾華卡拉「瘋狂血拼」，伊茲丹購物中心 (艾華卡拉) 就係你嘅必去選擇，場內雲集環球名牌同當地出品嘅服裝、珠寶同鞋類，任你買到爽。商場仲成日舉辦推廣活動，錫住你荷包。

行行下街想醫肚？餐廳選擇同樣多元化，你實會搵到最啱口味嘅美食。講起上嚟，美食廣場地方寬敞，仲可以欣賞到時尚嘅建築。如果帶埋小朋友一齊嚟，Fun Ville 兒童活動中心嘅遊樂設施同遊戲多不勝數，豐富好玩，細路仔一定唔會悶親。伊茲丹購物中心就喺艾華卡拉醫院隔離。

喺艾華卡拉市立家庭海灘度過一個下晝，包保一家大細玩得開心。呢個海灘配備枱凳同 BBQ 設施，啱哂野餐。而小朋友可以去遍佈金黃海岸嘅遊樂場玩，年齡大啲仲可以同父母喺排球場同足球場「較量一番」。

淺水區風平浪靜，玩水算係安全，但就唔建議落水游泳。想 Chill 一陣？海岸線夠哂寬闊，空間充足，鋪塊毛巾瞓低，就可以曬一身古銅膚色。艾華卡拉市立家庭海灘距離艾華卡拉市中心大約 6 公里。

喺艾華卡拉港撒網捕魚，係好多當地人珍視嘅傳統，亦都反映咗艾華卡拉漁村嘅悠久歷史。你會見到唔少漁船停泊喺碼頭，又或者巡航水域，為小鎮帶嚟新鮮海產。就算冇漁獲，眼前嘅海濱景色咁迷人，喺艾華卡拉度過嘅一日悠閒得嚟夠哂充實。

要去艾華卡拉港，租車自駕最方便：由艾華卡拉大街轉個彎，向岸邊行駛，一路去到阿爾米納街就得。去到碼頭，不時都有幾十位釣魚客拎住魚桿，等緊大魚上釣。

南部體育場堪稱建築奇蹟，曾經舉辦 2022 年 FIFA 世界盃，足球迷同建築發燒友千祈咪錯過。場館距離艾華卡拉市中心好短車程，獨特嘅設計靈感源自傳統潛水採珠所用單桅帆船嘅帆，座椅就模仿海浪。

體育場置身於南部公園之中，除咗舉辦精彩賽事，園內活動設施仲多到數唔哂，包括散步慢跑徑、健身區同兒童遊樂區等。