卡塔爾 10 大最刺激歷險運動

喺卡塔爾飆沙，係睇盡沙漠獨特景觀嘅好方法。你可以租架沙丘越野車，又或者請埋經驗豐富嘅四驅車司機，帶你向豪爾艾阿戴德內海進發：呢個自然保護區受聯合國教科文組織認可，坐擁風景如畫嘅海灘、清澈嘅海水同金黃色嘅沙丘，舉世知名。

溫馨提示：沙丘飆沙會令你腎上腺素激增，細膽啲都玩唔到。但係如果你自問「天不怕地不怕」，咁就千祈咪錯過。

阿拉伯灣嘅海水碧澄溫暖，係豐富海洋生物嘅家園，亦令到水肺潛水成為卡塔爾必試活動之一。要數全國最受歡迎嘅潛水地點，老俱樂部人造珊瑚礁肯定榜上有名，你可以包船出發，喺馬卡登號沉船遺跡暢快潛水。

卡塔爾有好多潛水學校，為初學者以至資深潛水達人開辦潛水課程，其中最受歡迎嘅水肺潛水中心包括 Poseidon Diving Center、Qatar Scuba Center 同埋 Qatar Divers。

想體驗攀石刺激腎上腺素飆升嘅感受？卡塔爾有好多選擇。比爾西格利位於卡塔爾西岸，擁有奇岩怪石，絕對係攀石好地方，當你登上頂峰，將遼闊景色盡收眼底，嗰份興奮同成就感無與倫比。

如果你想試下攀岩，咁就一定要去位於烏姆沙布魯姆嘅穆斯富爾天坑。一家大細或者鍾意留喺室內嘅人，可以去位於加拉法伊茲丹購物中心嘅 Galaxy Sports 運動店行下。

跳傘係卡塔爾必玩冒險活動。Skydive Qatar 之類嘅跳傘公司擁有良好嘅安全記錄，仲提供專業指導員教你有關跳傘嘅知識，啱哂「膽大包天」嘅探險達人同初哥。

飛上天際，卡塔爾嘅景色就喺腳下。由飛機上一跳，感受空氣喺身邊急促流動，多哈未來感十足嘅市景同沙漠嘅遼闊風光映入眼簾，呢種體驗畢生難忘。

風箏滑浪係卡塔爾必試水上運動，當地有好多地方適合進行呢項歷險活動。其中，富威里特距離多哈只係一小段車程，交通非常便利，有別於卡塔爾大多數海灘，所以吸引好多風箏滑浪客。

由多哈出發揸一個鐘車，就會到西格利潟湖，湖面廣闊而淺水，屬於內灣地形，最啱初哥練習風箏滑浪。卡塔爾其他受歡迎嘅風箏滑浪熱點仲有阿爾馬夫賈爾、蘇馬西馬同艾莉亞島。1 月至 6 月係卡塔爾風箏滑浪嘅旺季。

世上有好多地方都可以近距離接觸駱駝，但卡塔爾嘅駱駝活動絕對超哂班。你可以喺卡塔爾觀賞駱駝比賽，或者騎駱駝穿越沙丘。亞沙哈尼亞賽場有舉辦本土同國際賽駱駝盛事，為遊客提供觀賞駱駝賽跑嘅珍貴機會，值得一去。

如果你想一邊騎駱駝，一邊欣賞迷人沙漠風光，可以選擇預訂套餐，內容一般包一個鐘騎駱駝環節、酒店接送服務，仲送埋阿拉伯咖啡或香茶。

人在沙漠，一定要揸四輪電單車。卡塔爾嘅沙漠飆沙同四輪電單車適合老手同新手暢玩，不過新手通常會留喺平地，而老手就會挑戰陡峭嘅沙丘。

海岸線海灘係卡塔爾深受歡迎嘅四輪電單車熱點之一，而你可以喺好多鋪頭租到四輪電單車。係時候馳騁沙漠，開闢穿越沙丘嘅路徑，沿途欣賞卡塔爾令人嘆為觀止嘅壯闊風景。

花式滑水結合雪地滑板同滑水，近年成為卡塔爾熱爆活動。未玩過？唔駛怕：花式滑水好易上手，玩熟咗仲樂趣倍增。

Diplomatic Club 俱樂部位於卡塔爾之珠附近，係多哈玩花式滑水嘅好去處，另外仲有唔少由水上運動發燒友經營嘅滑水熱點，為旅客帶嚟耳目一新嘅滑水體驗，一試難忘。

卡塔爾嘅地理位置令帆船可以全年航行，帆船運動嘅新手老手都想把握機會，環繞呢座半島乘風破浪。

Regatta Sailing Academy 令你喺阿拉伯灣水域上揚帆變得輕而易舉。經驗豐富嘅教練為唔同年齡同能力嘅學員，提供各種帆船認證課程。你亦都可以喺 Boat Lagoon Yachting 租船店租用各式各樣嘅船仔同帆船。

鍾意揸水上電單車嘅你，一定要喺卡塔爾參加水上電單車團。你可以同一大班人一齊欣賞卡塔爾之珠同埋濱海大道等地方嘅壯麗景色，又或者自己一個揸水上電單車四圍探索。

貴為半島，卡塔爾四面環海，係時候向海灘進發，追波逐浪，享受浪花撲面嘅爽快感覺。