卡塔爾周邊交通

卡塔爾幅員廣闊，而且道路保養得宜，周圍遊覽相對輕鬆。雖然大多數人都會揀自駕旅行，但係卡塔爾嘅公共交通近年其實有明顯改善，主要歸功於巴士同地鐵服務嘅擴展。

卡塔爾境內嘅大多數道路都可以往返首都多哈，而旅客會喺哈馬德國際機場落地。由國家嘅一端去到另一端，只需要幾個鐘嘅車程。有時，公路可能會擠塞，揸車要多加留心。好多旅客都選擇搭的士、又或者租用連埋司機服務嘅豪華轎車，咁樣遊覽卡塔爾方便到極 (雖然價格不菲)。而家就嚟睇下我哋嘅多哈同周邊地區公共交通指南，揀定啱你預算嘅選擇。

卡塔爾酒店

1. 的士

推介：

當地人同遊客都鍾意搭的士，除咗容易截車，仲價格相宜，短途行程甚至去城外旅行 (另收附加費) 同樣抵搭。亮藍色嘅 Karwa 的士由國營 Mowasalat 運輸公司經營，車隊規模最大，仲係唯一獲得許可喺哈馬德國際機場營運嘅的士品牌。其他服務商就可以透過 Uber App Call 車。

多哈的士由最低收費起標，之後日間每公里收費 1.6 里亞爾，夜晚就每公里 1.9 里亞爾，喺街邊的士站、以至幾乎每間酒店同購物中心都好易搵到車。唔用的士 App 嘅話，可以打 Karwa 免費電話 +974 4458 8888 Call 車。

2. 租用豪華轎車

卡塔爾嘅豪華轎車連司機服務貴過的士，但係既然難得放假，唔想自己揸車的話，呢個選擇就夠哂方便。租車價格因應乘客需求而異，分為標準豪華轎車服務、大型團體車輛、VIP 同奢華體驗，可以按小時或者按日預訂。

卡塔爾嘅豪華轎車出租公司多到極，當中包括由政府營運嘅 Mowasalat 運輸服務，既提供豪華車款，亦配搭訓練有素嘅司機，可以打去 +974 4458 8888 預約。另一方面，Karwa 的士 App 都 Book 到豪華轎車。

3. 租車

推介：

喺卡塔爾，租車自駕係相對實惠嘅交通選擇。多哈國際機場有好多間租車公司，亦可以提前打電話或者上網預約。Hertz、Budget、Europcar 同 AVIS 等國際品牌，同埋當地租車公司都有提供服務。

喺卡塔爾租車嘅最低年齡限制係 21 歲，海外駕駛者要出示護照，同埋帶備國際車牌或者海灣合作委員會 (GCC) 國家簽發嘅駕駛執照。

4. 巴士

推介：

Mowasalat 交通服務喺多哈周邊、以至卡塔爾各地營運現代化空調巴士，當中包括由哈馬德國際機場出發嘅多條路線。

巴士路線連接多哈至北部嘅沙馬爾、烏姆薩拉勒同阿爾科爾，西部嘅杜漢市，仲有南部嘅布薩姆拉同埋梅薩伊德。多哈境內車程票價由 3 里亞爾起，首都以外票價就由 4 里亞爾起。

乘客要買定 Karwa 智能卡，可以喺機場自動售票機、多哈巴士站、卡塔爾之珠、以至好多間店舖買到。有關巴士路線同埋 Kawra 卡參與商戶嘅詳情，可以瀏覽 Mowasalat 網站了解。

巴士智能卡分為可以增值嘅標準卡 (30 里亞爾)、購買後 24 小時內最多搭 2 程車嘅限額卡 (10 里亞爾)，同埋購買後 24 小時內無限次搭車嘅無限卡 (20 里亞爾)。如果冇帶智能卡搭車，要俾 10 里亞爾嘅手續費。

多哈嘅西灣接駁車服務深受卡塔爾遊客歡迎，路線涵蓋西灣好多景點，包括市中心、濱海大道同阿爾比達街，每日 06:00 至 21:00 服務，每 12 分鐘一班車。

5. 地鐵

推介：

多哈地鐵係卡塔爾最新興嘅公共交通工具之一，網絡由 3 條路線 (紅線、綠線同金線) 組成，涵蓋 37 個車站。

多哈地鐵分為標準車卡同黃金俱樂部車卡呢兩種等級。如果搭標準車卡或者家庭車卡，每程車資 2 里亞爾，全日無論搭幾多程車，最高收費都係 6 里亞爾。黃金俱樂部車卡嘅價格為每程 10 里亞爾，全日最高收費 30 里亞爾。

紅線

紅線全長 40 公里，往返南部嘅艾華卡拉至北部嘅盧塞爾，仲連接哈馬德國際機場 1 號客運大樓至市中心，18 個熱門站點包括西灣卡塔爾能源公司、卡塔拉同卡塔爾大學，亦可以轉駁萊格塔菲亞同盧塞爾嘅電車網絡。

綠線

綠線由東部嘅阿爾曼蘇拉往返西部嘅卡塔爾阿爾里法購物中心，全線設有 11 個車站，最出名嘅站點包括教育城、哈馬德醫院、阿爾沙卡布同卡塔爾國立圖書館。

金線

金線東西走向，往返拉斯布阿布德至阿齊茲亞，沿線設有 11 個車站，涵蓋卡塔爾國立博物館、瓦奇夫市集、體育城 (哈利法國際運動場) 同阿齊茲亞 (可以去到比利亞吉奧購物中心)。

藍線

藍線係地鐵網絡嘅第四條線路，預計 2026 年通車。

6. 電車

推介：

多哈設有三種電車：

1. 盧賽爾電車：經由盧賽爾站同萊格塔菲亞站連接地鐵，有 4 條路線共 25 個車站，可以用地鐵交通卡乘搭。
2. 姆謝里卜電車：連接多哈姆謝里卜市中心 (MDD) 所有區域，設有全長 2 公里嘅循環線路，可以免費乘搭。
3. 教育城電車 (EC)：設有黃線、藍線同綠線呢 3 條路線，車上配備 Wi-Fi，可以免費乘搭。

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。