卡塔爾 10 大最盛大節慶

每年 3 月，一年一度嘅風箏節會喺多哈嘅志向公園舉行，世界各地嘅放風箏高手齊集，五彩繽紛嘅風箏喺空中飛舞，蔚為壯觀，不妨把握機會，試下親手操縱風箏穿梭雲間。

風箏節會展出傳統設計嘅風箏，每日舉行嘅工作坊可以俾一家大細磨練吓製作風箏嘅技巧。為期 3 日嘅節慶活動中，仲有學生組比賽、巡遊同文化表演，節目豐富。

卡塔爾嘅駱駝比賽發展咗幾百年，而家已經成為價值幾千萬嘅競技運動，競爭激烈。賽事之上，遙控「騎師」會騎住駱駝，以獨特嘅方式融合傳統與現代技術。

每年 10 月到第二年 2 月，逢星期五都有賽事，而主要賽事就喺 3 月同 4 月進行。喺 4 月嘅「埃米爾殿下賽 (HH the Emir’s Main Race)」贏得冠軍嘅話，可以獲得「金劍獎 (Golden Sword)」呢個全國榮譽。比賽喺多哈 - 杜漢高速公路上嘅亞沙哈尼亞駱駝賽道舉行，距離多哈市中心大約 1 個鐘車程。

卡塔爾國際藝術節喺 10 月尾或者 11 月初舉行，為期 6 日，為世界各地嘅藝術家提供表達自我同創意交流嘅平台，活動包括現場繪畫示範、工作坊、研討會、時裝表演同展覽，吸引超過 200 位藝術家參加。

藝術節選址卡塔拉文化村，有意參加嘅藝術家可以提前申請，而公眾就可以免費參觀展覽同欣賞現場繪畫示範。

每年 11 月尾，歷時 1 星期嘅阿賈爾年度電影節都會喺多哈嘅卡塔拉文化村揭幕，歌頌電影藝術。喺阿拉伯文入面，「阿賈爾 (Aiyal)」有「世代」嘅意思，所以呢個電影節係希望吸引各個年齡層嘅人士，除咗電影放映會同論壇之外，仲有角色扮演活動、電子遊戲錦標賽同埋現代音樂表演。

世界各地嘅電影製片人、音樂人同藝術家不惜遠道而來，喺多哈嘅卡塔拉文化村參與電影節，場面熱鬧。所有活動免費入場。

幾個世紀以嚟，單桅帆船 (Dhow) 帶領水手遊遍阿拉伯海域同其他地區，而卡塔爾每年都會喺多哈嘅卡塔拉文化村舉辦傳統阿拉伯單桅帆船節，歌頌呢種宏偉嘅帆船，通常訂喺 12 月舉行。

大約 70 艘唔同大細、採用傳統設計嘅帆船會展出，參加者仲可以參觀藝術展覽，同埋欣賞以海洋為主題嘅煙花表演。場內傳統市集就會賣同海洋相關嘅產品、手工藝品同美食。只要俾少少錢，仲可以坐上阿拉伯帆船出海 30 分鐘，向卡塔爾之珠航行，沿途欣賞如畫風光。

多哈文化節係卡塔爾嘅一項重要活動，當地傳統同藝術百花齊放。區內嘅文化同創意，透過音樂表演、舞蹈、攝影、藝術展覽等大放異彩，當中最受歡迎嘅表演節目就係唱歌同詩歌朗誦，由此可見呢個國家口耳相傳嘅講故事傳統源遠流長。文化節嘅活動喺多哈多個場地舉行，表演經過精心設計，務求滿足一家大細嘅口味。

文化節每年 2 月或 3 月舉行，會有皇室成員親自主持活動。

齋戒月係卡塔爾全國盛行嘅宗教慶祝活動，經過 1 個月嘅齋戒、祈禱同反思之後，以為期 3 日嘅開齋節慶典畫上句號。開齋節係卡塔爾嘅公眾假期，等大家好好聚首一堂，一齊享用開齋餐。雖然有啲公司會暫停營業，但係全國各地都掛滿燈飾同彩旗，夜晚仲有煙花表演，節日氣氛滿瀉。

家庭通常會喺屋企慶祝，同時好多當地餐廳同酒店為咗體現節日嘅慷慨精神，都會提供折扣、特別套餐同活動。伊斯蘭曆法閃瓦魯月嘅第一日就係開齋節，每年嘅日子都唔一樣。

各位「為食貓」同埋鍾意飲飲食食嘅遊客，一定要喺 3 月或者 4 月嚟卡塔爾旅行，去一年一度嘅卡塔爾國際美食節觀摩，品嚐由世界各地廚師烹調嘅滋味佳餚。節慶活動包括名廚現場烹飪表演、健康食品工作坊、農貿市集，仲有農場直送餐桌體驗。當地廚師同企業家當然亦會把握機會，喺美食節展示實力。

美食節每年都有唔同主題，並配以貼題嘅現場表演同娛樂活動，咁多年嚟曾經喺卡塔爾唔同地方舉行，包括多哈嘅卡塔爾之珠同氧氣公園。

一年一度嘅卡塔爾海洋節係為咗歌頌卡塔爾悠久嘅航海傳統而設，喺多哈嘅卡塔拉文化村會舉辦各種活動，主題圍繞海洋教育、文化、環境、娛樂及體育。其中一個重點節慶活動，就係精心製作嘅話劇，由 300 幾位表演者喺高科技舞台上忘我演出，令人拍案叫絕。

蒞臨節慶嘅遊客仲有機會深入了解採集珍珠、編織漁網同埋建造阿拉伯單桅帆船嘅方法，玩到餓有美食奉上，另外仲有合家歡活動，例如迷你高爾夫球同沙雕藝術品展覽。而小朋友就可以參加造紙、繪畫、陶瓷等等嘅手工藝品工作坊。

卡塔爾瓦奇夫傳統市集相當出名，每年 12 月尾到 1 月初嘅春節期間仲變得更有活力，連續 15 日氣氛熱烈，到時市集裡面會迫滿美食車同攤檔，而小朋友都忙住喺艾哈邁德廣場騎馬仔、玩嘉年華機動遊戲，樂而忘返。

除咗購物之外，呢度仲有好多體育活動俾你玩餐飽，包括排球比賽同撐橡皮艇。而且，遊客亦都有機會觀賞馬戲團、雜技、魔術表演同藝術展覽。