艾雷恩 5 大超正玩樂活動

巴爾贊塔建於 19 世紀末，宏偉壯觀，原初用途係保護多哈水源，連接城市保育嘅其他重要元素，並且面向大海，掃視迎面而嚟嘅船隻。塔樓群高 16 米，坐落於烏姆薩拉爾穆罕默德村莊，距離海岸大約 25 分鐘車程。

呢座堡壘令人望而生畏，係卡塔爾建築嘅典範，分層屋頂由木桿、竹同紅樹林樹枝打造，仲配備木製嘅 marazims 排水溝，保護屋頂免受過盛雨水嘅沖襲。由堡壘俯瞰，水面一覽無遺，有助觀察採珠人嘅一舉一動。2003 年，塔群恢復舊日輝煌面貌，塔內仲加配咗現代化設施。

謝赫費薩爾博物館位於城外阿爾薩姆里亞農場嘅傳統堡壘裡面，算得上係歷史同文化寶庫，珍藏過去歷代超過 15,000 件文物，數量龐大，當中嘅有形寶藏包括嚟自世界各地嘅舊式車輛，同埋充滿異國情調嘅手工編織地毯。

想行勻呢個娛樂景點，至少要預留 2 個鐘。不妨放慢腳步，探索謝赫費薩爾嘅個人珍藏，另外仲有私人收藏嘅書法、蒸汽動力車輛、地毯同傳統服裝，豐富多彩。

穆斯富爾天坑距離多哈大約 45 分鐘車程，既係扣人心弦嘅自然奇觀，亦係避暑勝地。卡塔爾各地有唔少洞穴開放參觀，其中又以穆斯富爾天坑最深邃，確切深度目前仲係一個謎，據稱深達 100 米。

鳥類同小動物都鍾意匿喺黑暗嘅洞穴裡面築巢，而洞內岩石仲會見到刻字。攀爬穆斯富爾天坑嘅巨石，絕對係刺激嘅極限運動。想追求平靜嘅話，就可以喺與世隔絕嘅空間冥想。

杜漢公共海灘嘅海岸線風景優美，距離艾雷恩以西大約 75 公里，以金黃色嘅沙灘同日落映襯海岸，係你喺卡塔爾度過悠閒一日嘅好去處。不妨喺海灣嘅澄澈海水之中暢泳，享受合家歡海濱氣氛。

想 BBQ 又或者喺沙灘露營過夜？杜漢公共海灘空間廣闊，小朋友仲可以喺淺水區盡情玩水。如果想浮潛，離岸比較遠嘅岩礁值得探索，但就要記得帶埋沙灘鞋，以免俾海底嘅尖利岩石𠝹傷。

馬特哈夫：阿拉伯現代藝術博物館係艾雷恩嘅文化寶藏，坐擁區內規模最大嘅現代同當代阿拉伯藝術展品，場館位於多哈教育城，珍藏咗 20 世紀至今 9,000 幾件精彩奪目嘅藝術品，透過繪畫、雕塑同影片裝置，呈現出藝術領域嘅重大趨勢。

博物館嘅藏品凸顯阿拉伯藝術家嘅多樣性同創造力，難怪成為藝術發燒友嘅必遊之地。參觀完展覽之後，你仲可以喺場內嘅 Cafe 唞返陣，又或者行下成日舉辦公共研討會同課程嘅圖書館。