11 間價格超值豪華酒店

美憬閣旗下皇家梭羅古典酒店設計精美細緻，配備一流設施，而且位置仲喺梭羅市中心嘅黃金地段。酒店啱啱位於瓦斯頓堡要塞嘅對面，離幾個大型購物中心同市內主要歷史景點只係幾步遠。例如迷人嘅 Kraton Surakarta 大清真寺同 Kasunanan 宮殿，離酒店都只係唔到一公里。如果你去梭羅係為咗參觀歷史古蹟，咁呢度絕對啱晒你！

不過，無論你係因為咩原因而嚟到呢座城市，美憬閣旗下皇家梭羅古典酒店都可以帶俾你無比舒適嘅住宿體驗，而且價格實惠。裝修雖然充滿歷史味道，但建築本身就相當現代化，當中設有一個中等大小嘅泳池、健身中心、SPA 水療中心，同埋一間廣受好評嘅餐廳。

大維納斯住宅酒店係一個別緻嘅小小度假村，距離著名嘅吳哥窟唔遠。酒店位於市內嘅寧靜一處，附近多條道路仍然係泥路，俾你喺探索鄰近古老高棉遺址嘅行程之間，享受到安靜祥和嘅休憩之地。

大維納斯住宅酒店係你放鬆身心嘅好去處，唔單只係因為環境清幽憩靜，而且收費唔高，豪華程度不減。成個度假村圍繞主泳池而建，池邊設有躺椅甚至飯枱，俾你一邊放鬆、一邊享用美食。無論係奢華嘅浴缸，定係酒店入面嘅 SPA 水療中心同餐廳，裝修同樣乾淨企理！

大愛恩德雷蒙酒店係環境優雅嘅現代化酒店，位於蒂迪旺沙山脈嘅山頂，離吉隆坡只係一個鐘車程。雖然酒店位於迷人嘅自然環境之中，但你唔駛擔心住宿環境係咪好簡陋。相反，酒店嘅設計相當別緻，簡約之中帶華麗風格。

如果對雲霧密佈嘅山脈露台景觀已經麻木，咁大愛恩德雷蒙酒店嘅眾多娛樂活動一定會令你玩到唔捨得走！呢度有室內同戶外泳池、獨立兒童泳池、寬敞嘅健身中心、飛狐纜繩同埋攀石設施，仲有各種好玩嘅合家歡活動。酒店仲有多種有趣工作坊同活動，絕對係一家大細旅遊嘅好去處，而且沿路一直走，仲有雲頂天城世界樂園㖭！

溫莎馬拉潘迪酒店位於美麗嘅里約熱內盧，係一間精緻嘅海濱酒店。位置正正喺巴拉達蒂茹卡海灘嘅道路對面，既方便前往海岸，離市中心又唔遠，環境寧靜之餘價格仲相當實惠，而且仲坐擁無與倫比嘅海景。

酒店採用大理石同桃花心木嘅經典豪華風格，同時配備現代化嘅設施，包括天台泳池、健身房、桑拿，以及頂級餐廳。

顧名思義，布宜諾斯艾利斯中央歷史 NH 精選酒店座落於阿根廷首都歷史中心嘅心臟地帶。事實上，酒店毗鄰極其重要嘅五月廣場同玫瑰宮，離其他幾間博物館同地標只係幾步遠。

環境雖然充滿歷史痕跡，但酒店設計卻非常現代化，客房時尚又寬敞。天台泳池唔大，但由露台俯瞰四周古舊建築嘅景色， 一定會令你嘩嘩聲！

Villa Chinka 位於黑海岸邊，係一座美麗古典嘅豪華度假勝地。度假村採用羅馬式同現代風格之間嘅優雅設計，高雅嘅柱廊同拱門以及時尚寬敞嘅客房相得益彰。

Villa Chinka 最引人注目嘅，莫過於係眾多嘅水上玩樂選擇。度假村設有室外泳池，離黑海亦只係幾步遠，自設嘅防波堤仲可以營造出平靜嘅海灘，另設室內泳池同埋可以俯瞰大海嘅桑拿浴室。就算全部都客滿，房內又大又深嘅浴缸都一定可以滿足到你！

蒂沃里納哈達多哈酒店嘅設計同規模富麗堂皇，但房價竟然唔貴。餐廳高樓底、池畔酒吧環境優雅、SPA 水療中心極之豪華，加上靚裝修，統統都俾你有如皇室般嘅感覺。客房採用極具代表性嘅阿拉貝斯克式裝修，配上現代化嘅家具，集傳統優雅同現代舒適於一身。

蒂沃里納哈達多哈酒店嘅位置亦相當方便，正正就位於多哈市中心，鄰近瓦奇夫市集、單桅帆船港口，以及濱海大道。你仲可以輕鬆探索市內形形色色嘅文化景點，包括伊斯蘭藝術博物館、卡塔爾國立博物館，同埋美夏雷博物館。

The Marmorosch Bucharest 位於布加勒斯特老城區，既優雅又豪華。前身係羅馬尼亞最具影響力嘅銀行前總部，由內到外都係觸目嘅建築傑作。實際睇起嚟同羅馬尼亞議會宮或者皇宮亦相當似，而兩者距離酒店都只係幾步遠。

酒店採用不經意嘅方式，將古典之美同現代便利融為一體，正因為咁，附設嘅優質 SPA 水療中心、高級餐廳同埋室內泳池一啲都唔突兀，客房本身亦配有現代化傢俬同別緻裝修。記得要去埋前身係銀行古老保險箱金庫嘅酒吧睇睇！

茱麗葉山莊園唔單只將喬治亞風格莊園嘅迷人之處發揮到極致，同時亦可提供現代化嘅舒適設施，而且價格實惠。莊園經過全面現代化改造，當中設有室內泳池、健身房、SPA 水療中心同埋兩間餐廳，其中一間仲榮獲米芝蓮星級同埋 4 項 AA Rosette 獎。客房仍然保留相當經典嘅裝修，但就配上現代化嘅陳設。

呢個度假村最吸引人嘅一點，就係佔地廣闊嘅空間。除咗流經莊園同園內高爾夫球場嘅諾爾河之外，呢度仲有遠足徑、騎馬場，同埋可以欣賞基爾肯尼郡綿延起伏嘅鄉村美景。

帕可德普林西皮酒店時尚氣息十足。裝修雖然簡單，但充滿獨特嘅里維埃拉風格，令酒店展現永恆嘅優雅，尤其同拿坡里灣嘅閃亮藍海互相輝映，更顯迷人。客房、餐廳、酒吧、泳池、崖頂露台統統都採用極具代表性嘅藍白色設計。

酒店充分利用周邊極美嘅環境，令旅客可以喺佔地 3 公頃嘅植物園同埋附設另一間餐廳嘅私人海灘，享受悠閒時光。防波堤令海灘一帶嘅水域平靜如鏡，而酒店位處嘅峭壁，全日大部分時間都陰涼舒適！

位於安塔利亞嘅阿克拉酒店係大型度假村，設有多個室外泳池、私人海灘、網球場，以及優美如公園嘅場地等設施。面積雖然大，但風格同舒適度不減，為旅客提供真正嘅豪華住宿體驗，同時亦有現代化嘅便利設施。

亞克拉酒店更設有新一代嘅 SPA 水療中心、健身俱樂部、桑拿同埋室內泳池。仲有四間頂級餐廳，以及兩間別緻嘅酒廊酒吧任你揀。如果你帶住小朋友一齊去旅行，呢度免費嘅兒童俱樂部同埋專人監督嘅托兒服務，就一定幫到你！